Tonga Translation Project
BaFilipi 4
Malayilile
Nimuyandwa, nkikaako, aabo mbundiyandisya kubona lubo, lukondo lwangu amusini, munzila eeyi amwimikile nji muMwami, nimuyandwa.
Ndamukumbila Iyuwodiya aSiyinteki kuti muzuminane muMwami. 1 Alimwi ndamukumbila andinywe lubo, simulimuma wakasimpe, ugwasizye banakazi aaba, nkaambo bakabeleka lubazu alubazu aamwi andime mukukambawuka makani mabotu aamwi aKkilementi mpawo aboonse bamwi basimulimuma, aabo mazina aabo alimubbuku lyabuumi.
Amubotelwe muMwami chiindi choonse; ndayindulula lubo, amubotelwe.
Amuleke bantu boonse bazibe kulibombya kwanu. Mwami waba afwiifwi. 2 Mutalikatazyi nikubaanzi, pesi mulizyoonse akube akukomba akukumbilila akupa kulumba amuchite kuti kukumbila kwanu kuzibikane kuli Leza. Alimwi luumuno lwaLeza, lwiinda kumvwisisisya koonse, buyoobamba myoyo yanu amizeezo yanu muli Kkirisitu Jesu.
Bakwesu, kumamanino, kufumbwa chakasimpe, kufumbwa chilabulemu, kufumbwa chiluleme, kufumbwa chisalala, kufumbwa chiyandisi, kufumbwa chebeesyi, kuti kakuli bubotu, kuti kakuli chintu cheelela kulumbilizigwa, muyeeye atala azintu eezi. 3Eezyo nzimwakayiya akutambuula akumvwa alimwi nzimwakabona mulindime, muzichite; alimwi Leza waluumuno uyooba andinywe.
Kulumba Kwachipo
Ndilabotelwa muMwami kapati kuti lino kubulamfu mwabukulusya chiyandisyo chanu kulindime; mwakali achiyandisyo choonzyo kulindime, pesi teemwakali amweenya wakuzichita pe. Peepe kuti ndilanyontooka anzindiyanda; nkaambo ndakayiya, kufumbwa muchiimo nchindili nchicho, kuti ndeelede kukkutikana. Ndilikwizi kubula, alimwi ndilikwizi kujana, muli kufumbwa amuzyiimo zyoonse ndakayiya insiinswa yakulangana azyiingi alimwi ndikwiizi kuba anzala, akkuta. 5Ndilakonzya kuchita zintu zyoonse mulinguwe ooyo undipanguzu.
Anukuti chakali chibotu kulindinywe kuti twaabilane penzi lyangu. Alimwi inywe lwanu niba kuFilipi mulizi kuti kumatalikilo akukambawuka amakani mabotu kulindinywe, nindakayeenda kuzwa muMasedoniya, takukwe mbungano yakali kundigwasya mukwiindila muzipo azimwi akutambula kunze kwandinywe luzutu; 6 alimwi nikuba nindakali kuTesalonika mwakalikunditumizya lugwasyo twiinda lumwi. Peepe kuti ndiyanduula chipo, pesi ndiyanduula impindu iyungizya kuli nchimulacho kale. Ndakatambula luliyo luzwide, alimwi zyindilide; ndilizwide, nzindakatambula kulindinywe zyakeetwa aEpafiroditasi zipo nzimwatumizya, chipo chinunkilila, chipayizyo chitambulika akubotezya kuliLeza. Alimwi Leza wangu uyoomwabila zyoonse nzimuyanda mukwiindila mubuvubi mbwajisi mubulemu muliKkirisitu Jesu. Kuli Leza wesu aTaata akube bulemu kwalyoonse alyoonse. Ameni.
Kujuzya Kwakumamanino
Amujuzye musalali woonse muli Kkirisitu Jesu. Bakwesu mbindili aabo balamujuzya. Boonse basalali balamujuzya, kapati balimuŋanda yaSiza. 7
Luzyalo lwaMwami Jesu Kkirisitu lube amuuya wanu.
Source notes (7)
- Cross-reference Luk 10:20.
- Cross-reference Mat 6:25-34.
- Cross-reference Rom 15:33.
- Cross-reference 2 Kkor 11:9.
- Cross-reference 2 Kkor 12:9.
- Cross-reference Inch 17:1-9; 1 Tes 2:9.
- Cross-reference Gal 6:18; Film25.
Tonga Translation Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.