Tonga Translation Project
BaHebburu 1
Ijwi LyaLeza Mukwiinda muMwana Wakwe Mulombe
Muchiindi chakayinda, Leza wakali kwaambuula kale kumataata mukwiinda mubasinsimi munzila zyiingi zisiyenesiyene, pesi mumazuba aaya ayinda wakaambuula kulindiswe mukwiinda muMwana Mulombe, ooyo ngwaakasala kuti abe sikukona wazintu zyoonse, ooyo mukwiinda mulinguwe alubo wakalenga nyika. Nguunguwe utondeezya bulemu bwaLeza alimwi ujisi chisinizyo chabube bwakwe, mpawo ujisi mulengalenga ajwi lyakwe lyanguzu. Naakasalazya nkaambo kazibi, wakakkala kuluboko lwakululyo lwaSinguzu Usumpukide.
Bupati BwaMwana Mulombe waLeza
Mwana Mulombe waLeza kaali waba ujisi nguzu kubaangelo mbuli izina ndyakakona ipati kwiinda lyabo. 1 Nkaambo kuli uuli mungelo Leza nkwaakati,
“Iwe uliMwana wangu Mulombe,
sunu ndakuzyala”? Nikuba alubo,
“Ndiyooba Wisi kulinguwe, alimwi uyooba mwana kulindime”? 2
Alimwi alubo, Leza natayete Mwana wakwe mutaanzi munyika, waamba kuti,
“Amuleke baangelo baLeza boonse bamukombe.” 3
Kubaangelo Leza waamba kuti,
“Ooyo uchita baangelo bakwe kuti babe myuuwo,
alimwi balanda bakwe kuti babe mabangabanga amulilo.” 4
Pesi Leza atala aMwana wakwe Mulombe waamba kuti,
“Chuuno chanu chabwami, O Leza, nchalyoonse alyoonse,
musako wanu ululeme musako wabwami bwanu.
Inywe nimwaakayanda bululami mpawo mwasula bubi,
nchiinchicho Leza, Leza wako,
wakakunanika amafuta alukondo
ayinda ngaakapa aabo mbulaabo.”
Alimwi wakati, “Inywe, Mwami, ndinywe mwakabikka intalisyo yanyika kumatalikilo,
alimwi majulu njiimilimu yamaboko aanu.
Eezi zyoonse ziyooloba, pesi inywe munooliwo kwalyoonse.
Zintu zyoonse ziyookulumpala mbuli chisamo,
uyoozivunga mbuli muntu uvunga chisamo,
alimwi bayoozwaatununwa mbuli majansi.
Pesi inywe munooli mbuli mbumubede,
alayo minyaka yanu tayikwe kuyoojinka pe.” 5
Kuli bali baangelo Leza nkwakati,
“Kkala kuluboko lwangu lwakululyo
mane ndikachite basinkondonyokwe
bakabe chilyatilo chamawulu aako”?
Eelyo, baangelo tee myuuya ikutawukila Leza na, yakatumwa anguwe kuti izookutawukile, nkaambo kabaabo beelede kuyookona lufutuko?
Source notes (5)
- Cross-reference Int 2:7; 2 Sam 7:14; 1 Mak 17:13.
- Cross-reference Det 32:43; Int 97:7.
- Cross-reference Int 104:4.
- Cross-reference Int 45:6-7.
- Cross-reference Int 110:1.
Tonga Translation Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.