Tonga Translation Project
BaEfeso 6
Bana aBazyali
Nubana, amuswilile bazyali banu muMwami, nkaambo eechi chililuleme. 1 “Lemeka wuso abanyoko” nkaambo ooyu ngumulawu mutaanzi ula chisyomezyo: 2 “kuti zikweendele obotu, alimwi kuti upone chiindi chilamfu anyika.”
Nimataata, mutababilizyi bana banu, pesi amubakomezye mukululamika amululayo lwaMwami.
Bazike aBasimalelo
Nibazike, amubaswilile basimalelo banu baansi, akulibombya akuyoowa, mumoyo uumwi, mumizeezo mibotu kazizwa mumyoyo wanu ululeme mbuli kuli Kkirisitu; kutabi kwakuupawupa kumeso pe, mbuli sikubotezya bantu, pesi mbuli bazike3 baKkirisitu, mukuchita luyando lwaLeza kuzwa mumoyo, mukuchita mulimu akuyanda kubotu mbuli kuMwami akutali kubantu pe, kamuzi kuti kufumbwa chibotu muntu nchachita, uyootambula nchicho lubo kuzwa kuMwami, nikuba kuti muzike nikuba waangunikide.
Nibasimalelo, amuchite oobo kulimbabo, muleke kubaluvukila, kamuzi kuti ooyo ulinguwe Simalelo wabo antoomwe andinywe ulikujulu, alimwi kuti kulinguwe takukwe kusalulwa pe.
Zilwanisyo Zyoonse ZyaLeza
Kumeelelezyo, amube bakozu muMwami amunguzu zyakwe mpati. Amusame zilwanisyo zyoonse zyaLeza, kuchitila kuti mukakonzye kwimikila mumeeneno aSikuchenga. Nkaambo tatulwani abulowa amubili pe, pesi tulwana abeendelezi abweendelezi anguzu amubwendeelezi bwamudima bwanyika eyino amuuya isofweede mumasena alikujulu. Nkikaako amusame zilwanisyo zyoonse zyaLeza, kuchitila kuti mukakonzye kwiimikila mubuzuba bwabubi, nimwachita zyoonse, mulayimikila nji. 4
Nkikaako amuyimikile, kazizwide zikungu zyanu alukumba lwakasimpe, alimwi musame intobo yabululami, 5 alimwi kamusamide insangu kumawulu aanu kukubambila makani mabotu aluumuno; kunze azyoonse eezi, amubweeze intobo yalusyomo, anjiyo muyokonzya kuzima mivwi yoonse iyaka yamubi. Mpawo amusame nguwani yalubulo 6 yalufutuko, apanga lyaMuuya, chaamba ijwi lyaLeza. Amukombe zyiindi zyoonse muMuuya, ankombyo zyoonse amukukumbila. Kulizeezi kamuchenjede akukakatila koonse, akukumbilila basalali boonse, alimwi andime lubo, kuti kwaambuula kupegwe kulindime mukubbanuna mulomo wangu abusichamba mukukambawuka insiiswa yamakani mabotu, nkaambo kakuti ime ndilimwiiminini mubwaange. Amukombe kuti ndikaambe abusichaamba, mbuli mbundeelede kwaambuula.
Kujuzya Kwakumamanino
Lino kuti andinywe mukonzye kuziba lubo mbundibede anzindiliikuchita, Tayikkikkasi mukwesu ngundiyandisya alimwi mukambawusi usyomekede muMwami uyomwaambila zyoonse. Ndamutuma kulindinywe nkaambo kamabambe aaya, kuti mukonzye kuziba kuti tuli biyeni, akuti azosungwazye myoyo yanu.
Bakwesu luumuno lube kulindinywe aluyando alusyomo luzwa kuli Leza Taata aMwami Jesu Kkirisitu. Luzyalo lube andinywe moonse nimuyanda Mwami wesu Jesu Kkirisitu aluyando luteeli.
Source notes (8)
- Cross-reference Kul 20:12.
- Cross-reference Det 5:16.
- Footnote Naakuti bazike
- Cross-reference Ay 11:5; 59:17; 1 Tes 5:8.
- Cross-reference Ay 52:7.
- Footnote ingwani yankondo
- Cross-reference Inch 20:4; 2 Tim 4:12.
- Cross-reference Kkol 4:7,8.
Tonga Translation Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.