1 Timoti 6

1Bantu boonse bali mujogwe lyabuzike bayeeye basimalelo babo mbuli mukweelela kwabulemu boonse, kuchitila kuti izina lyaLeza anjiisyo zitasampawulwi. 2Aabo bali abasimalelo babo basyoma tabeelede kutondeezya kutabalemeka pe nkaambo kakuti mbabunyina; pesi beelede kubakutawukila zilikabotu mbukunga aabo bajana amulimu wabo mbasyomi abayandwa.

Injiisyo Yakubeja Abuvubi Bwachoonzyo

Amuyiisye akusungwazya milimu eeyi. 3Kuti umwi muntu kayiisya nikuba boobo alimwi katazuminani amajwi akasimpe aMwami Jesu Kkirisitu anjiisyo eeyo yeendelana a bunaLeza, 4uzwide kulisumpula, taakwe nchazi pe; uli abulwazi bwakuyanda kukazya akukangana atala amajwi, aayo azyala bbivwe, kutamvwanana, kutukila, abuumi bwakuyeeyelana bubi, 5alimwi weeta lupyopyongano akati kabantu bali amizeezo isofweede alimwi batakonzyi kuziba kasimpe, kabayeeya kuti bunaLeza niinzila yakujana.

6Kuli kujana kupati mubuleza akukkusikana. 7nkaambo taakwe nchitwakeeta pe munyika, alimwi taakwe nchitubweza kuzwa munyika, 8pesi kuti katuli achakulya azisamo, azeezi tuyookkutikana. 9Pesi aabo bayandisya kuba bavubi balawida mumasunko, mukakole, muzyiingi zyabufubafuba aziyandisyo zichisya eezyo zikwela bantu mukunyonyooka akuloba. 10Nkaambo kuyandisya mali ngiimatalikilo abubi boonse, mukwiinda mukuyandisya eechi kwakapa kuti bamwi basweeke kuzwa kulusyomo mpawo bakayasa myoyo yabo amachise mayingi.

Malayilile Alangene aTimoti

11Pesi mbuli nduwe, muntu waLeza, siya eechi choonse; udunamine busalali, bunaLeza, lusyomo, luyando, lukakatilo alubombo. 12Lwana kulwana kubotu kwalusyomo; ujatisye buumi butamani oobo mbwakayitilwa, nwaakalyambilila kabotu kunembo lyabakamboni mayingi. 131Kunembo lyaLeza upa buumi kuzintu zyoonse, alya Kkirisitu Jesu ooyo mubukamboni bwakwe kunembo lya Pontiyasi Payileti wakachita kulyambilila kubotu, 14ndakulayilila kuti ubambe mulawu kakutakwe kampenda akusampawula mane kuliboniya kwaMwami wesu Jesu Kkirisitu, 15alimwi eecho chiyooyubununwa kuchiindi cheelede awulongezedwe alimwi Mweendelezi aliikke, alimwi Mweendelezi wabeendelezi, Mwami wabami, 16ooyo aliikke nguutalobi mpawo ukkala mumumuni utasikiki, ooyo kutakwe muntu wakalina mubona nikuba ukonzya kumubona. Kulinguwe ngakube bulemu abweendelezi kwalyoonse. Ameni.

17Layilila aabo bavubi munyika eeno, kuti tabeelede kulisumpula pe, nikuba kubikka bulangilizi kubuvubi bwabo butali kabotu pesi ali Leza utupa zyoonse kuti tubotelwe. 18Beelede kuchita chibotu, kuti babe bavubi mukuchita milimu bubotu, alimwi bape chabuuya akwaangunuka. 19Akuchita oobo bayoolibambila buvubi mbuli ntalisyo kuchiindi chiboola, kuchitila kuti bakajane buumi oobo bwachoonzyo.

20Timoti, kwabilila eecho nchuwakapegwa aLeza. Siya bwambuuzi butali bwabunaLeza akukazyaniya kwazyakubeja kazitegwa nduzibo, 21ankaambo kakutobelezya nchicho bamwi bakaleya kuzwa kulusyomo.

Luzyalo lube andinywe moonse.