युहान्ना 16

1“खि हिछे मा तोङ नाइरे राङ ङाहि धि ताम खेला नानाइबा ना। 2हतिबे खेला यहुदि झोमसि खिमने खेला धोन्ङान ना। तेम्बा तेला धि च्वरा भेला हुन्दु, जब खेला मिपसोएयि कजसुबे स्यापच्यि स्युन नाइरे ठानि किङान ना। 3हतिबे धि लाइ किङान ना, चिचालानाना हतिबे आकेला ङोस्येस्येबा मेता, राङ ङा लाङ ङोमिस्येबा। 4हिन्नाङ धि ताम ङाहि खेला स्यास्याता होए, कि जब हति भेला हुन, तेहि खेला च्हि नेन सो स्मरण हुन। ताङला राङ ङाहि खेला धि ताम मानाइबा, चिचालानाना ङा खे ङ्याबो होतो।”

पवित्र आत्मायि लाइ

5“ता ङा ङाला चोँङान यि तेहा ढुन, हिन्नाङ ‘ङा काँहा ढुन?’” नाइरे खे सु याङ ङाला मिढिया। 6हचु हिन्नाङ ङाहि खेला धि ताम नानाइबि तोनयि सम शोकयि खाँखाँबा धु। 7हचु हिन्नाङ ङा खेला तेम्बा ताम नाज्याइ, ङा ढोयाप ला राङ खेला ल हुन। चिचालानाना ङा मापुइना, टोइकिङान खि तेहा होङान मानाना। हिन्नाङ पुइना ङा खोला खि तेहा चोङज्याइ। 8तेहि खो जब हुन, ख्युइ संसारला तिक्पा राङ केवा, ल अल भेयापयि लाइ भारेला दोष सोङान ना। 9तेहि तिक्पि भारेला, गलग दु चिचालानाना हतिबा ङाहि थोला हिछे मिकिता, 10केवायि भारेला, चिचालानाना ङा आकि तेहा ढोज्याइ, राङ खि ङालाङ थोङान मानाना। 11राङ ल अल भेयापयि लायि भारेला संसारयि ठिमयि आङकिङान दोषि सोइछारसोङ। 12“ङाहि खेला नायापयि ताम तरह लेइराङ होतो, हिन्नाङ थाल्ला खि हति ताम ङ्यान मिङ्युइबा।”

13जब खो मदलब तेम्बि आत्मा हुन, तेहि ख्युइ खे पोरोला तेम्बाला ठिङान ना। खो खुरि चाने नाङान मानाना। ख्युइ च्हि थोइ हतिराङ नाङान ना, राङ होङानयि तामतेबा खेला किङान ना। 14ख्युइ ङाहि छे धेङाना, चिचालानाना काङते ङाहि ना, हति ङाने खेरते खेला सो क्याइसोङ। 15चोम आकेला होए, हति पोरो ङाहि ना। हतिचाला ङाहि नाइरे, काङ ङाहि हिन हति ङाने खेरते आत्मायि खेला किङान ना।

तुक्का राङ किप्पो

16“टिझि च्येला याङ खि ङाला थोङान मानाना, याङ टिझि च्येला खि ङाला थोङान ना।”

17तेहि ख्युइ लोब्टु रेनरेन खोरे नाङला नारे क्याइसोङ, “ख्युइ हुला धि नानाइबा चिना? ‘टिझि च्येला खि ङाला थोङान माना ना, तेहि याङ टिझि च्येला ङाला खि थोङान ना, राङ चिचालानाना ङा आकि तेहा ढुन ताताता होए।’” 18हतिबे नाइसोङ, “ख्युइ ‘टिझि थु’ नानाइबि तोन च्हिना? ङेला छ्या मेता, ख्युइ च्हि नानाइबा ना नाइरे।” 19हतिबे येशुला ढिसोम किन्दु नाइरे येशुयि हा:कोदु, राङ ख्युइ नाइसोङ, “‘टिझि च्येला खि ङाला थोङान मानाना, तेहि टिझि च्येला थोङान ना’ नाङानयि तामयि तोन च्हि ना नाङान यि भारेला च्हि खे खिरि उइला नारे किनाइ?” 20तेम्बारे ङा खेला नाज्याइ, खे ङुङान ना राङ सम अल होङान ना। हिन्नाङ संसार काङान ना। खे सम तुङान ना, हिन्नाङ तुका किप्पोला घ्युरङान ना। 21च्यिबा कितुइना पोमुवातेबाला तुका हुन, चिचालानाना हति भेला लेलेबा हुन। हिन्नाङ जब मुइ च्यिबा क्येरु झ्युकिन, हतितुना हति तुका टाम्बा मिहा चिचालानाना संसारला च्यिबा झि क्येसोङ नाङान ला केनलो।1 22हति च्वरा क्याइरे थाल्ला खेला तुका हुन, हिन्नाङ याङ ङा खेला थोङान ना, राङ खि सम किप्पो होङान ना। तेहि सुइ याङ खि किप्पो खेने ठोमिङ्युइबा।

23जब हति ङिन खि ङाला होङान ना खि ङाला च्याङ ढिङान मानाना। तेम्बारे ङा खेला नाज्याइ, खि ङाहि मिनला आके ला च्हि लाँ, ख्युइ खेला हति तेरङान ना। 24थाल्ला थु खि ङाहि मिनला च्याङ लाँलाँबा मेता। लँ, तेहि खेला खुङान ना। धि च्वरा क्याइरे खि किप्पो पुरा सअ।

संसारयि थोला क्याक्याला

25“धि ताम ङाहि खेला प्येला नानाइबा ना। हिन्नाङ भेला हुन्दु, जब ङा खेला ला क्याइरे ताम नाङान मानाना, हिन्नाङ जब ङा याङ खे ङ्याबो प्येला ताम नाङान माना ना, हिन्नाङ आकि भारेला चाङमा क्याइरे नाज्याइ। 26हति ङिन खि ङाहि मिनला लोङान ना। ङा खि चाला आकेला स्युवा क्याकिन नाइरे खेला मिना, 27चिचालानाना आके खुरि खेला करि किन। चिचालानाना खि ङाला करि क्याक्याइबा होतो, राङ ङा कजसुबाने लेलेबा ना नाइरे हिछे क्याक्याइबा होतो। 28ङा आकेने लेप्ते, तेहि संसारला लेप्ते, राङ याङ ङा संसारला ताङदे आकि तेहा ढुन होए।”

29येशुयि लोब्टुतेबे नाइसोङ, “ता ख्योए ताम चाङमा क्याइरे नेन्दु, प्येल माना। 30ता ङाहि हा:कोसोङ, ख्युइ ताम पोरो हा:कुन्दु, तेहि ता ख्योए सुलाङ ढि कोइ मिदु। हतिचाला ङे हिछे किन कि ख्योए कजसुबाने लेलेबा ना।”

31येशुयि हतिबाला जवाक पिन्सोङ, “च्हि ता खे हिछे किनाइ? 32तेहि, भेला हुन्दु, तेम्बा तेला लेप्तु, जब खे थोरते रेँ खिमला ढुन राङ ङाला चिक्पा भोरङान ना। हचु हिन्नाङ ङा चिक्पा मेता चिचालानाना आके ङा ङ्याबो होतो।2 33ङाहि धि ताम खेला धि चाला नानाइबा ना, कि ङाला खे शान्ति होङ। संसारला खेला तुका होङान ना, हिन्नाङ सम छेया कि, ङाहि संसारले क्याक्याला होतो।”