युहान्ना 10

रच्चियायि भारेला पे

1येशुयि नाइसोङ, “तेम्बारे, ङा खेला नाज्याइ, काङ लु राहायि कोने नाङला मिसुबा, हिन्नाङ स्यानयोने झिरे स्युयिन, हतिते कुम्मा राङ डाकुना, 2हिन्नाङ कोने नाङला स्युङानते लुयि रच्चिया ना। 3को भेङानयि ख्युइ चाला को भिन, राङ लु तेबे ख्युइ क्ये ङ्यान किन राङ ख्युइ खुरि रेँ लु तेबाला मिन नेननेन क्ये तोङिन, तेहि हतिबाला फिला खेरिनलो। 4जब ख्युइ खुरि लु पोरोला फिला तोन्दे खेरिन, खो हतिबे ताङताङला ढुन, राङ लु तेबे ख्युइ क्यापला हुन, चिचालानाना हतिबे ख्युइ क्ये ङोस्येयिनलो। 5हिन्नाङ ङो मिस्येङानयि क्यापला हतिबा मिढुवा, हिन्नाङ हति टोइरे ढुनलो। चिचालानाना ङो मि स्येङानयि मि क्ये ङोमिस्येबालो” 6येशुयि हतिबाला हति प्ये नाइसोङ, हिन्नाङ ख्युइ हतिबाला नानाइबि तामयि तोन हतिबे हा:माकुवलो।

येशु रच्चिया ल

7हतिचाला येशुयि याङ हतिबाला नाइसोङ, “तेम्बारे, ङा खेला नाज्याइ, लुबे को ङाराङ ना। 8ङाले ताङला होङान पोरो कुम्मा राङ डाकु ना, हिन्नाङ लुबे हतिबे ताम ङ्यानङान ना।1 9को ङाराङ ना, तेम्बारे सु मि याङ ङाने नाङला स्युना हति सोनङान ना, राङ नाङ फि किङान ना, राङ कोप्पोला छोङान ना।” 2 10“कुम्मानि कुरु, सोतु राङ मासि सोरु मात्रा होङान ना। ङानि खेला मिजे खुहोङ राङ हति लेइराङला खुहोङ नाइरे लेलेबा ना।”

11ङा ल रच्चिया ना। ल रच्चियायि रेँ लुयि चाला उ तेरिन। 3 12आलाइ पिन्दे ख्योख्योबि मिते लुयि मिते लु खुरि रच्चिया च्वरा माना। हतिता वाजे लेलेबा थोङसोङ लुबाला पोरते ढुन, राङ वाजे ल तेबाला गाजिला खेरिन, राङ कार च्युङच्युङला चोँङिन। 13हति टोइरे ढुन, चिचालानाना हति आलाइ पिन्दे ख्योख्योबि मिना, हति लुला ल क्याइरे मिता।

14“ङा ल रच्चिया ना, ङाहि ङारि लुला ङोस्येयिन, तेहि ङाहि लुयि ङाला ङोस्येयिन। 15च्हिरु क्याइरे आकि ङाला ङोस्येयिन, ङाहि याङ आकेला ङोस्येङान ना, तेहि लुबे चाला ङारि उ तेरच्याइ।” 16“ङाहि लु स्यान याङ हति, काङते धि रायि माना। हतिबा लाङ ङाहि ख्योँङ कोहिि दु, राङ हतिबे ङाहि क्ये ङ्यानङान ना, राङ हतिबे तुमझि होङान ना, राङ रच्चिया झिला त्योएङान ना।4 17आकि ङाला हति चाला करि किन, चिचालानाना ङा ङारि, मिजे याङ लक्ते ख्योङ ङ्युइकिन नाइरे तेरिन।” 18सुइ याङ ङाहि चाने ङाहि मिजे खेर मिङ्युइबा हिन्नाङ ङा ङारि धोप्पि ङारि उ तेरिन। ङा ङारि उ तेरयापयि आङ ङाला होतो, तेहि ख्योङयापयि आङ याङ ङाला होतो। धि आदेश ङाहि आकेने खुँखुँबाना। 19धि वचनयि चाला याङ यहुदिबे उइला खा पेसोङ। 20हतिबे नाङने लेइराङ यि नाइसोङ, “धिला ढे कालदु राङ धि ङ्युन दु। खे धि ताम च्हिला ङ्यान किन?” 21स्यान तेबे नाइसोङ, “ढे कालयापयि ताम धि च्वरा मिहा। च्हि ढेयि मि कानायि मि भे ङ्युइकिनाइ?”

येशुला माना नानाइबा

22यरुश्लेमला मोनलाम क्यासि खिमला कजसुबाला चिगा भुलयापयि कालापसोलयि भेला हिना। हति कुङघायि भेला हिना 23येशु मोनलाम क्यासि खिमयि नाङला सोलोमनयि क्यला ढुनतेतुलो। 24यहुदिबे ख्युइ फालाछुला पोरोला ताते टिसोङ, “जब थु ख्योए ङेला आच्यामाच्याला भोर च्याइ? ख्योए ख्रिष्ट हिन्ना ङेला ल क्याइरे नोइ।”

25येशुयि हतिबाला जवाक पिन्सोङ, “ङाहि खेला नाइ छाछारा होतो हिन्नाङ खे हिछे मिकिता। ङाहि आकि मिनला ङा च्हि लाइ क्ये हति राङ साछि तेरिन।” 26हिन्नाङ खे हिछे मि किता चिचालानाना खे ङाहि लुबे नाङने माना। 27“ङाहि लुबे ङाहि क्ये ङ्यानकिन राङ हतिबे ङाला ङोस्येयिन, राङ हतिबा ङाहि च्येला हुन। 28हतिबाला ङा नामयाङ मिसिनयापयि मिजे तेरच्याइ, राङ हतिबा नामयाङ मासि मिहा, राङ सुइ याङ हतिबाला ङाहि लाने खेर मिङ्युइबा। 29ङाहि आकि ङाला पिपिना होतो; खो पोरोले छेयाना। आकि लाने सुइयाङ खेरमिङ्युइबा। 30आके राङ ङा च्हिराङ ना।”

31यहुदिबे धि ताम थोइरे च्येला याङ येशुला क्याकच्याइ नाइरे टोउ तुइसोङ। 32येशुयि हतिबाला नाइसोङ, “ङाहि खेला ङाहि आकि चाने लेइराङ लाइ ल तान्दे, हति नाङने काङ लाइयि चाला ङाला खे टोउ क्याकच्याइ?”

33यहुदिबे येशुला जवाक पिन्सोङ, “लाइ लयि चाला ङे ख्योएला टोउ मिक्याका हिन्नाङ कजसुबाला अल नानाइबि चाला चिचालानाना ख्योए मि च्युङदे हाङ ख्योराङ ला कजसुबा नेन्दु।”5

34येशुयि हतिबाला जवाक पिन्सोङ, “ठिमला टिटिबा धु, कजसुबा नेन्दु खे ला ना।6 35ङेला छ्या होतो कि पवित्रशास्त्रा च्हि नेन हति बारतै तेम्बा हुन: हतिबाला कजसुबायि ला नाइरे सुला ख्युइ लोन पिन्दे।” 36ख्युइ भारेला च्हि, सुला रेँ पवित्र सोइरे कुरु पोरते राङ संसारला चाँरे? याङ ख्योए ङाला चिला ला ना च्योकिन्दु नाइरे आरोप लाइ किन चिचालाना ङाहि नाइरे, “ङा कजसुबे पिजा ना।” 37तेम्बारे ङाहि आकि धोप्पा क्याक्याइबा लाइ ङाहि मकाइना ङाला हिछे माके। 38हिन्नाङन “तेम्बारे ङा आकि लाइ किन राङ ङाहि थोला हिछे मिकिना धि लाइतेबे थोला हिछे कि, राङ खि हा:कोङान ना, कि आके ङाला होतो, राङ ङा आकेला।”

39हतिबे याङ खोला सुङ ज्याइयि च्युइ क्याइसोङ हिन्नाङ खो हतिबे लाने थारसोङ। 40तेहि याङ येशु यर्दन चाङबोयि यि फारकानला हति साला पुइसोङ, काँहा युहान्नाले ताङला बप्तिसमा तेरिनलो, राङ खो हतिया त्येसोङ।7 41मि लेइराङ ख्युइ तेहा होङाला छेलसोङ, युहान्नायि च्याङ हा:लाइयापयि लाइ माक्याइसोङ राङ “युहान्नायि ख्युइ भारेला च्हि नाइ हति पोरो तेम्बा ना।” 42तेहि हतिया लेइराङ मियि येशुयि थोला हिछे क्याइसोङ।