तिचुरोङ क्येला सारबा करारयि किताबतेबा
प्रेरित 5
हननिया राङ सफिरा
हिन्नाङ हननिया मिन क्याक्याबि मि झि राङ हति केरमान सफिरायि सायि तुभु झि चाँरेलो। राङ हति घोङने हति केरमानला छ्या होतोला राङ भाग रेन रेँ तेहा पोरते राङ, भाग रेन खेरते लोब्टुबे काङबाला पोरते। हिन्नाङ पत्रुस यि नाइसोङ ए हननिया, पवित्र आत्मा ङ्याबो चुन नाङान राङ सा चँचँबि घोङयि आलाइने भाग रेन राङ ङ्याबो भोरयापयि ताम तुइयि च्हिरु क्याइरे ख्युइ समला काङसुइ? हति माचँ थु च्हि ख्युरि मेताइ? राङ हत चाँह छारते याङ हति ख्युइ आङला मेताइ च्हि? “धि च्वरा लाइ कियापयि च्युइ च्हिरु क्याइरे ख्युइ समला लेप्सुइ? ख्युइ मिला ता माना, हिन्नाङ कजसुबाला चुन नानाइबा होतो।” धि थोइरे हननिया साला घेलसोङ राङ हति उ च्येसोङ। धि थोइसोङन पोरो लेइराङ झिसोङ। तेहि स्यारातेबा लाँरे खोला कोहिलायि किसोङ राङ फिला खुरते खेरसोङ, राङ कुँसोङ। काङ च्युङ छारते हति हा:माकुवा हा:लाम घण्टा सुम झोम च्येला ख्युइ केरमान याङ नाङला लेप्सोङ। पत्रुसयि हतिला टिसोङ, “ङाला नोइ, खि सा होचोमला राङ चोँचोँबि हिनाइ?” तेहि मुइ नाइसोङ, “ज्यु होचोमला राङ।” हिन्नाङ पत्रुसयि हतिला नाइसोङ, “खि प्रभुयि आत्माला छोएतायाप च्हिरु क्याइरे टोइ क्याइरे? तपि, ख्युइ ख्योबोला कुङानतेबा कोला राङ धु राङ हतिबे ख्योएला खुरते फिला खेरङान ना।” तेहि हतितुइना राङ हति ख्युइ काङबाना घेलसोङ राङ उ च्येसोङ। जब स्यारातेबा नाङला लेप्सोङ, हति स्यिस्यिया थोङदे फिला खुरते खेरसोङ, राङ हति ख्योबोयि धुनला कुँसोङ। चर्च पोरोयि थोला राङ धि ताम थोइङानतेबा पोरो लेइराङ झिसोङ।
शक्तिराङ हा:लाइदु झ्युयापयि लाइ
तेहि लोब्टुबे लाने लेइराङ हा:लाइतु झ्युयापयि लाइ राङ हो:नतोरतु झ्युयापयि लाइ मितेबे उइला हुवाला छेलसोङ, राङ हतिबा पोरो सोलोमनयि क्यला लाम्ला झिला ङ्याबो झोम्दे त्येतु। हिन्नाङ स्यानतेबे नाङने सुइ याङ हतिबा ङ्याबो ढिक्तु होङयापयि आट माच्युङसोङ, हचु हिन्नाङ मितेबा हतिबाला सम्मान किनलो। प्रभुला हिछे किङान पि:जा राङ पुमो ङिकारयि तुम तरह माहा फेलाला छेलसोङ। धि थु कि मितेबे लाम लामला नाप्पातेबाला ख्योसोङ, राङ पत्रुस हुइतुइना ख्युइ टिप्सो मात्र च्युङ नाङ हतिबे नाङने रेन रेनयि थोला परि होङ नाइरे मालसा राङ खाटातेबाला हतिबा ङ्यालदे राङ तोकिनलो। यरुश्लेमयि फाला छुलुइ भजारतेबाने याङ लेइराङ मितेबे नाप्पातेबा राङ भाभा आत्मायि तुरि पिपिनातेबाला ख्योरे हुन राङ हतिबा पोरो टाकिनलो।
लोब्टुबाला तुका पिपिना
घोबा पुजारि राङ हतिबा ङ्याबो होङान (काङते सदुकि तुमयि हिना) ठाधोयि खाँरे लोब्टुबे विरोधला लाँसोङ, राङ हतिबाला लोब्टु पोरोला सुङदे ङिहाला होएता झ्याल्ला च्युसोङ। हिन्नाङ प्रभुयि तेङलायि लोन खेरङान झिकि छाम्मु झ्यालयि कोतेबा पेसोङ, राङ हतिबाला फिला ख्योरे नाइसोङ, “क्यु राङ मोनलाम क्यासि खिमला लाँरे धि मिजेयि लोन पोरो मितेबाला स्योए।” धि थोइरे हतिबा नामे राङ मोनलाम क्यासि खिमयि नाङला स्युसोङ राङ छोइ तेराला छेलसोङ। हिन्नाङ घोबा पुजारि राङ हतिबा ङ्याबो होएतातेबा लेप्सोङ, राङ नेतातेबे तुम छोम्मुवा, अर्थात इस्राएलतेबे नेतातेबे तुम पोरोला क्ये ताङसोङ, राङ लोब्टुबाला झ्यालने ख्योङदु मितेबाला चाँसोङ। हिन्नाङ आङकिङानतेबे हतिबाला झ्याल्ला माठाता राङ लक्ते धि लोन पिन्सोङ, “ङि झ्याल्ला ल क्याइरे कोलच्या क्याक्याइबा राङ कोराबातेबा कोतेबाला लाँलाँबा राङ ठेसोङ, हिन्नाङ को भियेतुइना ङि नाङला सुलाङ माठेसोङ।” जब मोनलाम क्यासि खिमयि घोबा राङ घोबा पुजारितेबे धि लोन थोइरे हतितुइना नतिजा च्हि होङयाप नोम नाइरे हतिबा लोब्टुतेबे भारेला आच्या माच्या च्युङसोङ। हिन्नाङ मिझि लेप्ते हतिबाला नाइसोङ, “तोइ, खि काङ मितेबाला झ्याल्ला पोरते हतिबा मोनलाम क्यासि खिमला लाँरे मितेबाला छोइ लोबिन्दु।” तेहि अफिसरतेबा ङ्याबो घोबा पुते हतिबाला ढिप्पि मिकित ख्योसोङ, चिचालानाना मितेबे हतिबाला टोउयि क्याकिन नाइरे हतिबा झिदु।
हतिबे खोङला ख्योरे यहुदिबे तेतातेबा झोझोमा साला लाँसोङ, राङ घोबा पुजारितेबे हतिबाला टिसोङ, “ङि खेला धि मिनला छोइ च्याङ मितेरयापयि कडा आदेश पिपिना होतो, हिन्नाङ खि रेँ छोइयि यरुश्लेम काङ खाँतु च्युसोङ, राङ हति मियि ठायि दोष ङि घोला झ्युसोम ठाकिन धुये।”1 हिन्नाङ पत्रुस राङ स्यान लोब्टुतेबे नाइसोङ, “ङि मितेबे माना हिन्नाङ कजसुबायि आदेश ङ्यान कोइ राङ हुन। ङि ताङबुइ कानाबे कजसुबे येशुला स्यिस्यियाने सोम्बो सोइसोङ, सुला खि पालेपला तारे स्येसोङ। कजसुबे इस्राएलयि घ्योप्पि चाला राङ हतिबे तिक्पि माप तेरतु खोला क्यालबो राङ मुक्तिदाता सोइरे ख्युरि याइला त्योएसा याला तेतेका होतो।”2 “धि ताम पोरोयि साछि ङे होतो, राङ हति च्वरा क्याइरे राङ पवित्र आत्मा याङ, सुला कजसुबायि आदेश ङ्यानङानतेबाला पिपिना होतो।”
हिन्नाङ जब हतिबे धि थोइरे हतितुइना हतिबा लेइराङ स्येताङ लासोङ, राङ हतिबाला स्योए च्युइ क्याइसोङ। हिन्नाङ ठिमयि पण्डित राङ माननिय गमलिएल मिन क्याक्याइबि फरिसि नेतातेबा झोझोमि तुमना लाँरे हतिबाला टिझि थु फिला ढोयापयि आदेश पिन्सोङ, राङ ख्युइ नेतातेबा झोझोमि तुमतेबे खिमयि मितेबाला नाइसोङ, “इस्राएलि तेबा, धि मिबाला खि च्हि कि च्युइ क्याइरे आट क्याक्याइबा होए, हतिला च्याङबो क्याइरे त्योए। चिचालानाना तिरिङले ताङला याङ थुदासयि च्हि हिना नाङानयि दाबि क्याइसोङ राङ हा:लाम मिरको स्यिपक्या ख्युइ च्येला पुइसोङ। हति स्येसोङ, राङ हति च्येला ढोङानतेबा पोरो खा थोरसोङ राङ पोरो फान मेता च्युङसोङ। तेम्बारे मियि च्येला मि ङोति भेलाला गालिलयि यहुदा नाङान लाँसोङ, राङ मि चोमला रेँ यहला टुइसोङ। हति याङ मासि च्युङदे पुइसोङ, राङ हतिला मानि किङान फाला छुला खा थोरते पुइसोङ। थल्लि धि मामलाला ङा खेला नाज्याइ, कि धि मिबाने कुरुला त्योए, राङ धिबाला तोङ, चिचालानाना धिबे धि योजाना आथवा धि लाइ मितेबाने हिन्ना हति खोराङ स्यिक्ते ढोङान ना। हिन्नाङ तेम्बारे धि कजसुबाने हिन्ना ता ख्युइ धिला घा मिङ्युइबा। स्यान अर्थात खे कजसुबायि विरोधला लाँलाँबा होङान ना।” तेहि हतिबे ख्युइ टोइ ङ्यानसोङ। तेहि हतिबे लोब्टुतेबाला नाङला क्ये ताङदे क्यापसोङ, राङ “येशुयि मिनला ता माना” नाइरे आदेश पिन्दे हतिबाला ताङसोङ। तेहि येशुयि मिनला अपमान सहि किङान च्युङसोङ नाङानयि तामला आन्नद मानि किनराङ हतिबा नेतातेबा झोझोतेने थोन्दे पुइसोङ। तेहि बारतैला मोनलाम क्यासि खिमला राङ खिम खिमला पुते येशु राङ ख्रिष्ट हिना नाइरे लोपयाप राङ टाइक्ये कियाप मा ताङसोङ।
Source notes (2)
- Cross-reference मत्ति २७:२५
- Cross-reference लुका २४:४
तिचुरोङ क्येला सारबा करारयि किताबतेबा. Copyright © 2025 The Word for the World International and Tichurong Translation Project, Dolpa, Karnali. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.