प्रेरित 25

क्यालबोले याङ छेया धुनला पावलयि स्युवा

1फेस्तस रेँ छेत्रला लेलेबि ङिन सुम च्येला कैसरियाने यरुश्लेमला पुइसोङ। 2घोबा पुजारितेबा राङ यहुदिबे ङोधो मितेबा पावलयि विरोधला दोष लाइ क्याइसोङ, 3राङ खोला लाम्ला राङ सोएयापयि छल क्याइरे पावलला यरुश्लेमला राङ धोनयापयि कृपा सा नाइरे स्युवा क्यापसोङ। 4हिन्नाङ फेस्तसयि पावल कैसरियाला राङ झ्याल्ला पोरसोङ, राङ खो राङ याङ घ्यबो ढोसोम होएते ताम नाइसोङ। 5ख्युइ नाइसोङ, “हतिचाला खिङानाङयि नेताबा हतिया ङा ङ्याबो ढो, राङ हति मिला चिगा नानाइबा होएना हतिला दोष लाइ कि।”

6हतिबे उइला खो च्याक्पा क्ये कुले मा माताता कैसरियाला लसोङ, राङ हति ङाइटोतेला ल अल भेसि ठिला ताते ख्युइ पावलला ख्योङयापयि आदेश पिन्सोङ। 7खो लेप्छारते यरुश्लेमने लेलेबि यहुदिबा ख्युइ फाला छुला लाँसोङ, राङ पावलयि विरोधला कुरुकुरु गम्भिर दोष लाइ क्याइसोङ, काङति हतिबे साछि तेर माङ्युइसोङ। 8पावलयि रेँ छहला ताम नेन राङ नाइसोङ, “ङाहि यहुदिबे ठिमयि विरोधला, मोनलाम क्यासि खिमयि विरोधला, राङ कैसरयि विरोधला च्याङ अपराध क्याक्याइबा मेता।”

9हिन्नाङ फेस्तसयि यहुदिबाला कारु झ्युयापयि चाला पावलला नाइसोङ, “च्हि ख्योए यरुश्लेमला पुते हतिया ङाहि धुनला धि तामतेबे भारेला इनसाफ क्यायोङ नाइबा किनाइ?”

10हिन्नाङ पावलयि नाइसोङ, “ङा कैसरयि ल अल भेसा त्योएसि ठि धुनला लाँरे ताताता होए, काँहा ङाहि इनसाफ होङकोइ हुन। यहुदिबाला ङाहि च्याङ अल क्याक्याइबा मेता, सो ख्योएला फैसाला सअ। 11तेम्बारे ङा अपराधि हिन्नता, राङ ङाला सोएयापयि ङेबा खुयापयि झ्योदायि होएनाता ङा इनकार मिके। हिन्नाङ तेम्बारे धिबे ङाला दोष लाइ क्याक्याइबि च्याङ तेम्बा मेना ङाला धिबे लाला सुइयाङ टोए मिङ्युइबा। ङा कैसरला स्युवा क्याकिन होए।”

12तेहि फेस्तसयि ठोइ किङानतेबा ङ्याबो टोइ क्याइरे नाइसोङ, “ख्युइ कैसरला स्युवा क्यापतेइ, ख्योए कैसरयि तेहा राङ ढोङान ना।”

अग्रिपास राङ बरनिकियि धुनला पावल

13ङिन रेन पुइ छारते फेस्तसला खाँमसाँ नारु क्यालबो अग्रिपास राङ बरनिकि कैसरियाला लेप्सोङ। 14खो हतिया ङिन लेइराङ त्ये छारते फेस्तसयि पावलयि मुद्दा क्यालबुइ धुनला जु नेन राङ पेश क्याइसोङ, “फेलिक्सयि पोरते पुपुता कैदि झि ङिहा होतो। 15सुइ भारेला ङा यरुश्लेमला होतितुइना, घोबा पुजारितेबा राङ यहुदिबे धर्म गुरुतेबे हति विरोधला दोष लाइ क्याइरे ङेबा तेरकोइ राङ हुन नाइरे स्युवा क्यापसोङ,

16“दोष फोफोकाति दोष लाइ किङानतेबा ङ्याबो धुन धुनला माना, राङ रेँ विरोधला लाइ क्याक्याइबा दोषयि भारेला ताम नायापयि मौका माखुबा राङ सु मिलाङ चुका छ्या भुलयापयि रोमिबे लुलाम मेता नाइरे ङाहि पोरोला जवाक पिन्दे। 17जब हतिबा झोम्दे हतिया लेप्सोङ, ङा पुला माक्याइबा ङाइटोतेला राङ ल अल भेसा त्योएसा ठितेला ताते खोला हतिया स्योएयापयि आदेश पिन्दे। 18जब दोष लाइकिङानतेबा लाँसोङ ङा विचार क्याक्याइबा च्वरा ख्युइ मुद्दाला च्याङ अल तामयि दोष हतिबे ख्योङ माङ्युइसोङ। 19हिन्नाङ हतिबे भेदभाबते हतिबे राङ धर्मयि भारेला राङ स्यि छाछारि येशुयि भारेला ना, काङतेला पावलयिते तरह सोम्बो होतो नाइरे दाबि किन्दु। 20हतिचाला धि तामयि छानबिन कियापयि भारेला ङा आच्यामाच्या हुइतुइना धि भारेला टोइ कितु यरुश्लेमला ढोयापयि ख्युइ सम होरोम नाइरे खोला ङाहि टिरे। 21हिन्नाङ पावलयि क्यालबुइ थाकच्योए माच्युङ थु झ्याल्ला राङ पोर नाइरे स्युवा क्याक्याबाति हतिला कैसरयि तेहा पाचाँ थु सुङदे भोरयापयि आदेश पिन्सोङ।”

22तेहि अग्रिपासयि फेस्तसला नाइसोङ, “धि मियि ताम ङा ङारि याङ ङ्यानज्याइ च्युवा नाना हुवा।” तेहि ख्युइ नाइसोङ, “ङाइटो ख्योए ङ्यानरो कि।”

23ङाइटोतेला अग्रिपास राङ बरनिकि छेया रवाफ ङ्याबो सेनापतितेबा राङ भजारयि ङोधो मितेबा ङ्याबो यहुदि झोम्सि खिमला स्युसोङ। तेहि फेस्तसयि आदेश खुँरे पावलला हतिया स्येसोङ। 24फेस्तसयि नाइसोङ, “क्यालबो अग्रिपास राङ ङे ङ्याबो होएता पोर, खि धि मिला थोङिन्दु, सुइ भारेला यहुदि पोरोयि ‘धि मि ता याङ सोन्यापयि झ्योदायि मिधु’ नाइरे यरुश्लेमला राङ ङिहा याङ ङा ङ्याबो स्युवा क्याक्याइबा होतो। 25हिन्नाङ सोएयापयि ङेबा खुकोइराङ हुन नायापयि ङेबा ङाला खोने च्याङ माखुबाति राङ धि खोराङयि याङ क्यालबुइ तेहा स्युवा क्याक्याबाति ङा खोला चोङयापयि थाकच्योए क्याइरे। 26धि भारेला क्यालबोला टिरे कुरयाप खास ता च्याङ मेता। हतिचाला ङाहि धिला ख्युइ धुनला, राङ खास क्याइरे, हे क्यालबो अग्रिपास, ख्युइ धुनला ख्योख्योबा होतो, राङ ङि धि छानबिन क्याइ छारते हा:लाम चिगा ढियापयि ताम खुहोङ। 27चिचालानाना कैदियि विरोधला च्याङ दोष मास्याता हतिला चोङयाप ङाला ठिक लागि मिहा।”