प्रेरित 24

पावल विरोध्धला हारो

1ङिन ङाहि च्येला घोबा पुजारि हननिया राङ चोम राङ धर्म गुरुतेबा, तर्तुल्लस मिन क्याक्याइबि वकिल झि ङ्याबो हतिया लेप्सोङ, राङ हतिबे पावलयि विरोधला हाकिमयि धुनला मुद्दा देश क्याइसोङ। 2पावल हतिया तोन छारते च्येला तर्तुल्लसयि खोला जु नेनराङ दोष लाइ किताला छेलसोङ, “लेइराङ माननिया फेलिक्स, ख्योएने ङि लेइराङ छेया शान्ति ङ्योङिन होए, राङ ख्युइ धि मितेबे चाला याङ सोलाइते सुरु क्याइ छारसोङ। 3धि ताम काङच्याने सा पोरोला फेलिक्सला कटिनक्याँ राङ ङ्याबो स्विकार किच्याइ।” 4हिन्नाङ ख्युइ लेइ समय मिखेरा ङि स्युवा तुइमाझिला ङिङच्येरे ङ्यान रोकि। 5“चिचालानाना ङि धि मिला काङच्याला तुरि तेरिन राङ ढोङान, संसार काङयि यहुदिबे उइला आन्दोलोन किङान, राङ नासरि पाटियि घोबा घोठि किङानयि धोला ठाठाता होतो। 6धि मोनलाम क्यासि खिम भाभा सोयाप याङ कोशिश क्याक्याइबा होतो, हिन्नाङ धिला ङि सुङदे। ङि ठिम च्वरा क्याइरे कारबाइ याङ कि च्युइ क्याइरे। 7हिन्नाङ सेनापति लुसियासयि ङि तेहा लेप्ते लेइराङ स्यु ढिप्पि क्याइरे हतिला ङि लाने ठरे खेरसोङ, राङ हति विरोधला दोष लाइ किङानतेबाला ख्युइ तेहा होङयापयि आदेश पिन्सोङ। 8ता ख्योए ख्योएराङयि धि छानबिन क्याइना ङि धिला लाइ क्याक्याबि दोषला धि ताम पोरो खोने हा:को ङ्युइकिन।” 9हति यहुदिबे याङ हति ताम पोरो तेम्बाना नाइरे रुवा क्याइसोङ।

फेलिक्सयि धुनला पावलयि जवाक पिन्देलो

10हाकिमयि खोला ताम नायापयि ता तान छारते पावलयि जवाक पिन्सोङ, “लो लेइराङने ख्योए यहुदि मितेबे ल अल भेङानयि च्युच्युङायि ताम हा:कोकुवाति ङा ङारि भारेला केनराङ नेन होए। 11ख्युइ पत्ता लाइ कि ङ्युइयोङ कि ङा यरुश्लेमला आराधाना कितु पुपुति ङिन च्युनङिले मा च्युच्युङा मेता। 12धिबे न त ङाला मि रेन ङ्याबो नारे किन ताताता ठाते, न मोनलाम क्यासि खिमला वा यहुदि झोमसि खिम अथवा भजारला जनताला उत्तेजित परि च्युच्युङा ठाते, 13न त ङला थाल्ला दोष लाइ क्याक्याइबि तामयि धिबे प्रमान तेरङ्युइकिन। 14हिन्नाङ ङा धि ख्युइ धुनला राङ स्विकार किच्याइ, कि काङ लामला खे पाटि झि नेन, हति च्वरा क्याइ नाङ ठिमला होएता ताम राङ ङोन्सेखिलङानयि किताबला टिटिबि ताम पोरो हिछे क्याइरे ङा ताङबुइ कजसुबायि आराधाना ङा किच्याइ। 15केवाकिङान राङ तिक्पा किङान ङिकार स्यिस्यियाने सोम्बो च्युङदे लाँकिन नाङान हतिबा खोरे स्विकार क्याक्याइबा च्वरा ङा कजसुबाला आशा भोरच्याइ। 16हतिचाला कजसुबायि थोला राङ मियि थोला ङा बारतै चाङमा रिक्पा भोरयापयि कोशिश किन होए।

17“ता लो रेन च्येला रेँ मितेबे चालादान राङ भेटितेयापला ङा लेलेबा होतो।1 18धिबे ङाला मोनलाम क्यासि खिमला ठातितुइना चाङमा होङयापयि लुलाम ङाहि पुरा क्याइ छारते। हति च्याङ मिझोम मिदु, हल्ला याङ मिदु। हिन्नाङ हतिया एशियायि यहुदि रेन धु, 19हति एशियायि यहुदितेबा हतिया ख्युइ धुनला होङकोइ राङ हुन। ङाहि विरोधला ताम नाकोइ होएना हतिबे दोष लाइ कि ङ्युइकिन। 20अथवा धि मिबे ख्होरे ङिहा नोइ ङा नेतातेबा झोझोमि साला लाँरे तोतितुइना ङाला च्हि दोष खुँरे? 21मात्र धि ताम झि मात्रा हिना, काङते ङाहि खि उइला लाँरे क्ये तोन्दे नानाइबा होतो, ‘स्यिस्यिया सोम्बो च्युङदे लाँयापयि भारेला तिरिङ खि धुनला ङाहि मुद्दा चिला हुन राङ होतो।’” 2

22धि लामयि भारेला फेलिक्सला तेम्बारे छोइ च्युच्युवाति ख्युइ धि तामबा थोइ छारते हतिबाला जु नेन राङ टारि क्याइरे चाँसोङ, “सेनापति लुसियस ङिहा लेप्छारते ङा खि मुद्दा थाकच्योए क्याइरे चाँतोङ।” 23तेहि पावलला स्युङानतेबा पोर राङ हतिला मनस्याङ कितु याङ छ्यु, तेहि ख्युइ रुवा सुलाङ खोला कोइबा होएता क्यु पुरा कियापला मा घा नाइरे घोबाला आदेश पिन्सोङ।

पावल फिलिकस राङ डुरसिलायि धुनला

24ङिन रेन च्येला फेलिक्स ख्युइ यहुदि केरमान द्रूसिल्‍लाl ङ्याबो खेरते लेप्सोङ, राङ ख्युइ पावलला क्ये ताङदे येशु ख्रिष्टयि हिछेयि भारेला खोने थोइसोङ। 25पावलयि धर्मिक्ता, रेँ छोए सुङयाप राङ होङानयि इनसाफ भारेला नारे कितितुइना फेलिक्स आत्ति क्याइसोङ, राङ जु नाइसोङ, “थाल्लि चाला क्यु, मौका परि च्युच्युङायि भेलाला ङा ख्योएला क्ये ताङतोङ।” 26पावलने चि क्याइना आलाइ खुहोङ नाइबा क्याइरे ख्युइ आशा याङ क्याइसोङ। हतिचाला याङ ख्युइ हतिला लोलाइलोलाइ क्याइरे ताम क्ये ताङसोङ राङ ताम नेनलो।

27हिन्नाङ लो ङि च्येला जब फेलिक्सयि छापला पर्किअस फेस्तसला लेप्सोङ, तेहि फेलिक्सयि यहुदिबाला केन राङ भोरयापयि चाला पावलला झ्याल्ला राङ पोरते पुइसोङ।