तिचुरोङ क्येला सारबा करारयि किताबतेबा
प्रेरित 18
पावल कोरिन्थिला
हति च्येला हतिबा एथेन्सने बिदा च्युङदे कोरिन्थिला पुइसोङ। ख्युइ पेन्टसला त्योएङान अकिलास मिन क्याक्याइबि यहुदि झिला ठेसोङ। हति रेँ केरमान प्रिस्किला ङ्याबो इटालियाने लेलेबा धु, चिचालानाना क्यालबो क्लौडियसयि यहुदिबा पोरोला रोमने थोन्दे ढोयापयि आदेश पिन्सोङ। पावल हतिबाला ठातु पुइसोङ। आलाइ झि होतोति खो हतिबा ङ्याबो राङ त्येसोङ, राङ लाइ क्याइसोङ। चिचालानाना हतिबे लाइ कुरसोङान ना। ङालसुइ ङिन पोरोला खो हति यहुदि झोमसि खिमला नारे किनलो, राङ यहुदितेबा ग्रिकबाला खाइकोए झ्युयापयि कोशिश किनलो।
जब सिलास राङ तिमोथि माकेडोनियाने क्योप छारते, पावल वचन टाइक्ये कियापला व्यस्था धु, राङ यहुदिबाला येशु राङ ख्रिष्ट हिना नाइरे हतिबाला छोइ तेरिन राङ धु। “हिन्नाङ जब हतिबे विरोध क्याइरे हतिबाला फा:ला ताम अल नाला छेलसोङ, तेहि ख्युइ रेँ कोहिला स्युरे हतिबाला नाइसोङ” “खि ठा खि थोला राङ फोवार सअ, ङा निर्दोष होतो। ता ङा याङ यहुदि मान्ते मितेबे थोला ढोज्याइ।” तेहि हतिबाने हतिने कजसुबायि भक्ति किङान तितस युस्तस मिन क्याक्याइबि मिति खिमला पुइसोङ। ख्युइ खिम यहुदि झोमसि खिमयि धुनला राङ धु। यहुदि झोमसि खिमयि आङकिङान क्रिस्पसयि प्येरा पोरो प्रभुला हिछे किन, राङ कोरिन्थितेबे नाङने लेइराङयि पावलयि वचन ङ्यान्दे हिछे क्याइसोङ, राङ बप्तिस्मा खेरसोङ।
छान झि प्रभुयि दर्शनला पावलला नाइसोङ। माझि, हिन्नाङ ताम नेन राङ कि राङ हिम्मत हारि माके। “माझि, हिन्नाङ ता नेनराङ क्यु, राङ च्यामाना मात्योए, चिचालानाना ङा ख्योए ङ्याबो होतो, राङ सुइ याङ ख्योएला क्याइरे ताङदे नोए केल मिङ्युइबा, चिचालानाना धि भजारला ङाहि मि लेइराङ होतो।”1 तेहि कजसुबायि वचन लोपकिन राङ पावल लो झि राङ धा टु थु हतिबा ङ्याबो त्येसोङ।
जब गलियोन अखैया आङकिङान च्युङदे, तेहि यहुदि बा मत चिकि च्युङदे पावलला ठुझि क्याइसोङ, राङ खोला अदालतला ख्योसोङ, राङ नाइसोङ, “धि मियि मोशायि ठिमयि विरोधला कजसुबायि आराधाना कियाप मितेबाला लोबिन्दु।”
जब पावल नाला छेलसोङ, तेहि गलियोनयि हति यहुदितेबाला नाइसोङ, “यहुदिबा, तेम्बारे राङ धि अन्य राङ वा अल तामयि घलयि ताम हिननाता ङा खि ताम ङ्यानयाप ल मिहा। हिन्नाङ छितेबा, मिनतेबा राङ खे खिरि ठिमयि शवाल च्युच्युङाति खे खेराङ विचार कि। ङा धि तामबे ल अल भेयाप इनकार किच्याइ।” तेहि ख्युइ हतिबाला अदालतने तेसोङ। तेहि हतिबा पोरोयि यहुदि झोमसि खिमयि आङकिङान सोस्थेनेसला सुङदे अदालतयि धुनला क्यापसोङ। हिन्नाङ गलियोनयि हति तामयि च्याङ वास्ता मापोरसोङ।
पावल अन्टिकियाला लसोङ
तेहि हति च्येला पावल ङिन लेइराङ थु कोरोन्थिला त्येसोङ। तेहि भाइतेबाने बिदा च्युङदे खो डुङगाला स्योन्दे सिरियाला पुइसोङ। खो ङ्याबो प्रिस्किला राङ अकिलास याङ धु। ख्युइ वाचा झिला ख्युइ क्रियाक्रमला रेँ स्येबु टाकुलिया सोइसोङ। 2
हतिबा एफिससला क्योपसोङ, तेहि पावलयि हतिबाला हतिया राङ ताङसोङ, राङ खो राङ यहुदि झोमसि खिमला स्युरे यहुदिबा ङ्याबो नारे क्याइसोङ। तेहि हतिबे खोला ङिन रेन त्योएयापयि स्युवा क्याकितुइना ख्युइ इनकार क्याइसोङ। हतिबाने बिदा हुइतुइना ख्युइ नाइसोङ, “कजसुबायि सम होएना याङ ङा खि तेहा लक्ते होङज्याइ।” तेहि हतिबा डुङगाला स्योन्दे एफिससने पुइसोङ।
जब हतिबा कैसरियाला पुपते तेहि याला झिरे चर्चला ठाते नामास्ते क्याइरे एन्टिओखिया यहला पुपसोङ। ख्युइ हतिया ङिन रेन बिताइ क्याइरे गलातिया राङ फ्रिगियायि छेत्रतेबे लाम्ला लोब्टुबा पोरोला सम स्यु तेरिन राङ कुरुकुरु साला पुइसोङ।
एफिसस राङ कोरिन्थिला अपुल्लोस
अलेक्जेन्ड्रियाला त्योएङान अपोल्लोस मिन क्याक्याइबि यहुदि एफिससला लेप्सोङ। हति कुशल भाषाण किङान झि राङ पवित्रशास्त्राला छोइ होएता झि ना। खोला प्रभुयि छोइयि लाम खुदु, राङ आत्माला सम स्यु फारते ख्युइ येशुयि भारेला तामतेबा थारकाथारका नायाप राङ लोबिन्दु। हिन्नाङ ख्युइ युहान्नायि बप्तिस्मा मात्र स्येस्येबा होतो। ख्युइ यहुदि झोमसि खिमतेबाला हा:छेया किङगा ताम नाला छेलसोङ। हिन्नाङ ख्युइ नानाइबि तामतेबा थोइरे प्रिस्किला राङ अकिलासला ख्युइ रेँ खिमला ख्योसोङ, राङ कजसुबायि लामयि तोन चाङमा क्याइरे लाप्सोङ। ख्युइ अखैयाला ढोसोम किता राङ भाइतेबे खोला हतिया ढोयापयि समस्यु पिन्सोङ, राङ खोला ग्रहण क्यायोङ नाइरे हति लोब्टुतेबाला समस्यु पिन्दे पत्र टिसोङ। ख्युइ हतिया क्योपते ङिङच्येयि लाम्ला हिछे किङानतेबाला लेइराङ रुवा क्याइसोङ। चिचालानाना ख्युइ पवित्रशास्त्रायि वचनयि लम्ला येशु राङ ख्रिष्ट हिना नाङान ताम तान्दे यहुदिबाला पोरोयि धुनला लान ल मिङ्युइयाप सोइसोङ।
Source notes (2)
- Cross-reference यशैया ४३:५; यर्मिया १:८
- Cross-reference गन्ति ६:१८
तिचुरोङ क्येला सारबा करारयि किताबतेबा. Copyright © 2025 The Word for the World International and Tichurong Translation Project, Dolpa, Karnali. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.