तिचुरोङ क्येला सारबा करारयि किताबतेबा
प्रेरित 17
पावल राङ सिलास थेसलोनिकेमा
पावल राङ सिलास अम्फिपोलिस राङ अपोल्लोनियायि लाम हुन राङ थेसलोनिकेला लेप्सोङ। हतिया यहुदितेबे यहुदि झोमसि खिम झि धु। पावल रेँ बानि च्वरा क्याइरे हतिबे तेहा नाङला पुइसोङ, राङ ङालसुइ ङिन सुम थु पवित्रशास्त्रने हतिबा ङ्याबो नारे किन्दु। “ख्रिष्टला अवश्य तुका ङ्योङयाप राङ स्यिस्यियाने सोम्बो होङकोइ हुन, राङ धि राङ येशु, सुइ लोन ल ङा ख्योएला स्योच्याइ, खो राङ ख्रिष्ट ना” नाङान तामयि खुँ पेरे ख्युइ प्रमाण क्याइसोङ। हतिबे नाङने चोम राङ हिछे क्याइरे पावल राङ सिलास यहला खेरसोङ। लेइराङ टाँगाला कजसयुबायि भक्ता ग्रिकबा राङ लेइराङ ङोधो पुमोतेबा याङ खेखेरा होतो।
हिन्नाङ ठाधोयि खाँरे यहुदिबे भजारयि अल च्योप्पा किङान मितेबाला रुरे तुम राङ खेरते भजारला ठुझि किताला छेलसोङ, तेहि यासोनयि खिमला ठुझि क्याइरे पावल राङ सिलासला जनतातेबे धुनला ख्योङ च्युइ पेसोङ। हतिबा मा खुँबाला छेलाराङ, हतिबे योसेन राङ भाइबा रेन रेनला भाइतेबाला भजारयि आङकिङानतेबे तेहा जु नेन राङ ढुकिन राङ ख्योसोङ, “संसारला उलटो फुलटो सुन राङ हति मिबा ङिहा याङ लेप छाछारा होतो। हतिबा यासोनयि ढोम्बो च्युच्युङा होतो, राङ हतिबा पोरोयि येशु नाङान मिझि स्यान क्यालबो झि होतो नाइरे कैसरयि आदेश विरोध लाइकिन।” धि तामबा थोइरे मितेबा राङ भजारयि आङ किङानतेबा आत्ति च्युङदु। हतिबे योसेन राङ हतिबा ङ्याबो होएता लाँमा मितेबाला धरौटी खेरते हतिबाला ताङसोङ।
बेरियाला पावल राङ सिलास
भाइबे हतितुइना राङ पावल राङ सिलासला छाम्मु राङ बेरियाला चाँसोङ, तेहि जब हतिबा हतिया क्योपसोङ तेहि हतिबा यहुदियि यहुदि झोमसि खिमयि नाङला स्युसोङ। धिबे यहुदिबा थेसलोनिकेयि नाङने माहा ल धु चिचालानाना हतिबे पुरा केन राङ ग्रहण क्याइसोङ, राङ हति तामतेबा थारे हचु राङ हिना कि माना नाइरे बारतै पवित्रशास्त्रा फाकिनलो। हतिचाला हतिबे नाङने लेइराङयि, छुक्पो खिम ग्रिक पुमोतेबा राङ पिजातेबे याङ हिछे क्याइसोङ। हिन्नाङ जब कजसुबायि वचन पावलयि लाम्ला बेरिया याङ टाइक्ये च्युङ छाछारा धु नाङान थेसलोनिकेयि यहुदि हा:कोसोङ, तेहि हतिबा हतिया याङ मियि तुमतेबाला धेयाप राङ हाम क्येरु झ्युयाप लेप छारतु। तेहि भाइतेबे हतितुइना राङ पावलला छो छोम्मुवा यहला चाँसोङ। हिन्नाङ सिलास राङ तिमोथिते हतिया राङ त्येसोङ। पावलला केलदु ढोङानतेबे हतिला एथेन्स थु ख्योसोङ, सिलासला राङ तिमोथिते चोम ङ्युइ घ्यबो हतिया होङ कोयिन नाङान आदेश खुँरे हतिबा लसोङ।
पावल एथेन्सला
पावलयि हतिबाला एथेन्सला कुकितुइना, हति भजारला कुयि पिजायि खाँखाँबा थोङदे हति आत्मा खुरि नाङला समतु च्युङसोङ। हतिचाला ख्युइ यहुदिबाला राङ कजसुबायि भक्ता मितेबाला यहुदि झोमसि खिमतेबाला, राङ ठाठातातेबा ङ्याबो बारतै भजारला नारे किनलो। इपिक्युरी राङ स्तोइकी दार्शनियतेबे नाङने चोमयि राङ हतिबाला याङ हतिबा ङ्याबो नाइरे क्याइसोङ। हतिबे नाङने चोमयि राङ नाइसोङ, “च्हि बकबक चिनाने?” स्यानतेबे नाइसोङ, “स्यान सु याङ फियि मि लातेबे टाइक्ये किङान च्वरा थोङिन धुये।” चिचालानाना ख्युइ येशु राङ स्यिस्यियातेबाने सोम्बो होङयापयि ताम नेन्दु। तेहि हतिबे खोला अरियोपागसला खेरसोङ राङ नाइसोङ, “ख्युइ पिपिनि धि सारबा छोइ चिना, च्हि ङेला हा:कोरु झ्यु ङ्युइकिनाइ?” “चिचालानाना ख्योए ङि नामज्योला अनौठा तामतेबा स्योकिन्दु। हतिचाला धि तामबे खुँ चिना सो ङे हा:कोसोम होए।” पोरो एथेन्सला त्योएङान मि राङ हतिया त्योएङान फियि मितेबा घलघल ताम नायाप वा ङ्यानयाप अर्थात रेँ समय स्यान च्याङ तामला बित मिकिता।
पावल अरियोपागसयि उइला लाँरे नाइसोङ, “एथेन्सला त्योएङन मितेबा, ख्योएला ङा ताम पोरोला, धर्मला लेइराङ आसता होएता थोङिन्दु,” चिचालानाना युकिन ढुइतुइना ख्युइ सोलङान क्युतेबा ङाहि थोङसोङ। ङाहि धि च्वरा वेदि याङ ठेसोङ काङला “ङोमिस्येङान लायि चाला नाङान कोए क्याइदु। हतिचाला सुला खे हा:माकुवा सोलिन्दु खोला ङा खि उइला घोषाणा किच्याइ।” :कजसुबा, सुइ संसारला राङ हतिला होएता क्यु पोरो सोइरे, खो तेङला राङ पृथ्वीयि प्रभु च्युच्युङाति लाक्पि सोसोइबि मोनलाम क्यासि खिमला मितोता,1 खोला चिगे कोइबा होएता च्वरा क्याइरे मितेबे लाने ख्युइ स्यापच्यि स्यु कोइ हुन नाइरे सोचि माके। चिचालानाना ख्युइ राङ पोरोला मिजे, उ राङ क्यु पोरो तेरिन।2 ख्युइ मिझिने पृथ्वी पोरोला त्योएसा पोरो सोइसोङ। हतिबा त्योएसि मितेबे पोरो सोइसोङ। हतिबा त्योएसि मियि टाँगा राङ साजाम याङ थाकच्योए क्याइसोङ।3 हतिबे कजसुबाला फोए, हा:लाम हतिबे समेसमे क्याप्ते खोला ठाकिन तोम नाइबा आश क्याइरे धि च्वरा क्याइसोङ। हिन्नाङ खो हु पोरोने घ्याबोला मेता। 4 चिचालानाना “हु खोला सोम्बो तोकि, राङ खोला किप्पो किन राङ ख्युइ तेहा हुइ अस्तित्व होतो। ख्योए ख्युरि कवितातेबा याङ नानाइबा होतो, ‘हु तेम्बारे ख्युइ सन्तन ना।’” “तेहि हु कजसुबायि सन्तन च्युच्युङाति, कजसुबा सेर ङुल वा टोउ हिना नाइबा किच्याइ माना ना हतिबा मितेबे कला राङ कल्पनायि धो मात्रा ना।5 धि च्वरा छ्यामेते भेलाला कजसुबायि ध्यान मापिनसोङ, हिन्नाङ सा पोरोला मि पोरोला घ्योप्पा कियापयि आदेश तेरिन। चिचालानाना ख्युइ ङिन झि थाकच्योए क्याक्याइबा होतो, काङ ङिनला ख्युइ रेँ धाधामायि मिझिकि लाम्ला संसारयि इनसाफ किङान ना। खोला स्यिस्यियाने सोम्बो सोइरे ख्युइ मि पोरोला धि प्रमाण मापिनसोङ।”6
जब हतिबे स्यिस्यियाने सोम्बो होङयापयि भारेला थोइरे, तेहि रेन रेनयि ना च्येसोङ। हिन्नाङ स्यानतेबे “ङे याङ धि भारेला ख्युइ ताम ङ्यानज्याइ” नाइसोङ। हति च्येला पावल हतिबे उइने पुइसोङ। हिन्नाङ मि रेनतेबा ङ्याबो खेरसोङ, तेहि हिछे क्याइसोङ। हतिबे नाङने अरियोपागसयि डियनुसियस, दामारिस मिन क्याक्याइबि पोमो, राङ स्यानतेबा याङ होतो।
Source notes (6)
- Cross-reference १ राजा ८:२७; २ इतिहास ६:१८; भजनसंग्रह १४६:६
- Cross-reference यशैया ४२:५; भजनसंग्रह ५०:१२; भजनसंग्रह ५०:१२
- Cross-reference व्यवस्था ३२:८
- Cross-reference यशैया ५५:६; यर्मिया २३:२३
- Cross-reference उत्पत्ति १:२७; यशैया ४४:१०-१७
- Cross-reference भजनसंग्रह ९:८; भजनसंग्रह ७२:२-४; ९६:१३; भजनसंग्रह ९८:९
तिचुरोङ क्येला सारबा करारयि किताबतेबा. Copyright © 2025 The Word for the World International and Tichurong Translation Project, Dolpa, Karnali. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.