परमेस्वर को सच्चो वचन
रोमियों 5
परमेस्वर के संग सई है
अब जब हमकै बिस्वास के जरिये परमेस्वर के संग सई से रखो गौ है, तौ हम अपने प्रभु ईसु मसीह के जरिया से परमेस्वर के संग सांति रखथैं। जोके जरिया बिस्वास के बजह से बौ अनुग्रह तक, जोमैं हम बने हैं, हमरी पहोंचो भइ, परमेस्वर की महिमा! और आसा मैं घमंड करैं। सिरफ जहे नाय, बल्किन हम कलेसनौं मैं गरब करैं, जौ जानकै की कलेस से धीरज, और धीरज से खरो निकरनो, और खरो होन से आसा मिलथै। और जौ आसा हमकै उदास नाय करथै, काहैकि पवित्र आत्मा जो हमकै दई गौ है बासे परमेस्वर को प्यार हमरे मन मैं डार दौ गौ है।
जब हम हबऊ बगैर सहारा के रहैं, मसीह बौ समय पापिन के ताहीं मर गौ जोकै परमेस्वर चुनी रहै। अगर कोई इंसान धर्मी के ताहीं मरै; जौ अनहोनो है। और कोई अच्छे इंसान ताहीं ऐसियौ तौ होबै जो मरन की हिम्मतौ करै। लेकिन परमेस्वर अपने प्यार की भलाई ऐसे करकै दिखाथै कि जब हम पापियै रहैं तभई मसीह हमरे ताहीं मरो! अब जब हम बाके खून से धर्मी हिये गै हैं, तौ बैसिये परमेस्वर के गुस्सौ से काहे नाय बचंगे! हम परमेस्वर के दुस्मी रहैं, लेकिन बौ हमैं अपने बालक की मौत के जरिया अपनो दोस्त बनाई। अब जब हम परमेस्वर के दिलबर हैं, हम मसीह की जिंदगी से कित्तो बचंगे! लेकिन ऐसो कतई नाय है; हमरे प्रभु ईसु मसीह के जरिया परमेस्वर जो कछु करी है, बाके बजह से हम खुस होथैं, जो अब हमैं परमेस्वर से मेल-मिलाप करबाई है।
आदम और मसीह
ऐसिये जैसे एक इंसान से पाप जौ दुनिया मैं आओ, और पाप से मौत आई, और ऐसे करकै मौत सबै इंसानन मैं फैल गई, काहैकि सबै पाप करीं।1 हींना दुनिया मैं नियम दौ जान से पहले पाप रहै; लेकिन जहाँ नियम नाय है, कोई भी खाता पापन को नाय है। पर आदम के समय से मूसा के समय ले, मौत सबै इंसानन ऊपर राज्य करी, हिंयाँ ले कि बे आदमिन ऊपर भी, जो आदम परमेस्वर की आग्या ना मानी रहै बैसिये पाप नाय करी। आदम जो आनबारो रहै बहो को एक आँकड़ा रहै। लेकिन जो हाल गलतियन को है, बौ हाल अनुग्रह के वरदान को हईये नाय, काहैकि जब एक इंसान के अपराध से निरे इंसान मरे, तौ परमेस्वर की अनुग्रह और बाको जौ दान एक इंसान के, मतलब ईसु मसीह के, अनुग्रह से भौ, भौत से लोगन ऊपर सच्चियै मैं खूबै-खूब भौ। और परमेस्वर के उपहार और एक आदमी के पाप के बीच अंतर है। एक पाप के बाद “दोसी” को न्याय के काम को फैसला आओ; पर इत्ते सारे पापन के बाद, “कोई दोसी नाय है उपहार आथै!” जौ सच है कि एक इंसान के पाप के जरिये मौत बौ एक इंसान के बजह से राज्य करन लगी। लेकिन जो एक आदमी, ईसु मसीह करी, बाको फल कितनो बड़ो है! बे सबै जो परमेस्वर को गजब अनुग्रह कै पाथैं और बाके संग स्वतंत्र ऊपर से न्याय पाथैं, मसीह के जरिये जिंदगी मैं राज करंगे।
तभई, एक अपराध सब इंसानन के ताहीं सजा की आग्या को बजह बनो, बैसिये एक धर्म को काम सब आदमिन के जिंदगी के ताहीं, धर्मी को बजह बनो। और जैसी सब आदमिन कै पापी बनाओ गौ रहै, बैसिये एक आदमी की आग्या के कारड़, बैसिये बे सबै एक आदमी के आग्या मानन के फलस्वरूप परमेस्वर के संग धर्मी हुई जांगे।
नियम जो रहै बीच मैं आए गौ कि अपराध भौत होबै, पर जितै पाप खूबै भौ हुँआँ परमेस्वर को अनुग्रह बहो से जाधे भौ, तौ फिरौंकी, जैसी पाप मौत कै फैलात भै राज करी, बैसिये हमरे प्रभु ईसु मसीह से अनुग्रह भी अनंत जिंदगी के ताहीं धर्मी होत भै राज करै।
Source notes (1)
- Cross-reference उत्पत्ति 3:6
परमेस्वर को सच्चो वचन. Copyright © 2024 The Word for the World International and Rana Tharu Translation Samithi, Khatima, UttraKhanda, India. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.