इब्रानियों 9

सांसारिक और स्वर्गिय आराधना

1पहली वाचा मैं भी सेवा के नियम रहैं; और आराधना के ताहीं पृथ्वी मैं पवित्र जघा भी रहै। 2काहैकि एक तम्बु बनाओ गौ, पहले तम्बु मैं डीट, मेज, और भेंट की रोटी परमेस्वर कै चढ़ाई गई रहैं और बौ पवित्र जघा के नाओं से जानो जात रहे। 3और दूसरे परदा के पिच्छू बौ तम्बु रहै, जो परम पवित्र जघा के नाओं से जानो जात रहे। 4बामै सोने की धूपदान, और पूरो सोने से मढ़ो भौ वाचा को बक्सा और जामैं मन्ना से भरो भौ सोने को घड़ा और हारून की छड़ी जामैं फल फूल आए गै रहैं और उनमैं लिखी आग्यन के संग पथरा की दुई पट्टी रहैं। 5बक्सा के ऊपर परमेस्वर की मौजूदगी मैं महिमा करन बारे प्राँड़ी जिनके पखमा रहैं, उनके पखमा बौ माफी की जघा ले फैले रहैं, जितै पाप माफ करे जात रहैं। लेकिन हबै इनके बारे मैं एक-एक करकै बतान को समय ना है।

6जे चीज जौ तरीका से तैयार हुई चुकी, बौ पहले तम्बु मैं तौ पुजारी हर समय घुसकै सेवा के काम पूरे करथैं, 7लेकिन दुसरे मैं बस बड़ो पुजारी साल भर मैं ऐकै बार जाथै; और बिना खून लैकै नाय जाथै; जोकै बौ अपने ताहीं और लोगन की भूल चूक के ताहीं चढाथै। 8जासे पवित्र आत्मा जहे दिखाथै, कि जब तक पहलो तम्बु ठाड़ो है, तब ले पवित्र जघा को रस्ता साफ नाय भौ है। 9और जौ तम्बु तौ आज के समय के ताहीं एक कहानी है; जामैं ऐसी भेंट और बलिदान चढ़ाय जाथैं, जिनसे आराधना करन बारेन के मन सिद्ध नाय होबै सकथैं। 10काहैकि जे खाली खान-पीन बारी चीज, और तरह-तरह के हंदान के नियम के मुताबिक सरीर के नियम हैं, जो सुधार के समय तक के ताहीं ठहराए गै हैं।

11लेकिन जब मसीह आनबारी अच्छी-अच्छी चीजन को बड़ो-पुजारी हुईकै आओ, तौ बौ औरौ बड़े और सिद्ध तम्बु से हुईकै जो हाथ को बनाओ भौ नाय है, मतलब दुनिया नाय है। 12और बकरन और बछड़न के खून के जरिया नाय, लेकिन अपने ही खून के जरिया एकै बार पवित्र जघा मैं घुसो, और अनंत छुटकारा पाबौ। 13काहैकि जब बकरन और बरधन के खून और कलोर की राख अपवित्र लोगन के ऊपर छिड़कन से सरीर की सुद्धता के ताहीं पवित्र करथै। 14तौ मसीह को खून जो अपने आपकै अनंत आत्मा के जरिया परमेस्वर के अग्गु निर्दोस चढ़ाई, तुम्हारे मन कै मरे भै कामन से काहे नाय सुद्ध करैगो, ताकी तुम जिंदे परमेस्वर की आराधना करौ।

15और जहे बजह से बौ नई वाचा को बिचवई है, ताकी बौ मौत के जरिया जो पहली वाचा के समय की गलतियन से छुटकारा पान ताहीं भइ है, बुलाए भै लोग वादा के जरिया अनंत बिरासत कै पामैं।

16काहैकि जितै वाचा भाँदी गई है हूँना वाचा भाँदन बारे की मौत कै समझ लेनो भी जरूरी है। 17काहैकि ऐसी वाचा मरन के बाद पक्की होथै, और जब तक वाचा बाँधन बारो जिंदो रहथै, तब तक वाचा काम की नाय होथै।

18जहेमारे पहली बाचौ बिना खून के नाय भाँदी गई। 19काहैकि जब मूसा सब लोगन कै नियम की एका एक आग्या सुनाए चुको, तौ बौ बछड़न और बकरन को खून लैकै, पानी और लाल ऊन, और जूफा के संग, बौ किताब मैं और सब लोगन मैं छिड़क दई। 20और कही, “जौ बौ वाचा को खून है, जोकी आग्या परमेस्वर तुम्हारे ताहीं दई रहै।” 21और जहे तरीका से बौ तम्बु और सेवा के सब सामानन के ऊपर खून छिड़की। 22और नियम के हिसाब से हमेसा सब चीज खून के जरिया सुद्ध करी जाथैं; और बिना खून बहाए माफी नाय मिलथै।

मसीह को बलिदान पापन कै दूर करथै

23इसलै जरूरी है, कि स्वर्ग मैं की चीजन के प्रतिरूप जे बलिदानन के जरिया सुद्ध करे जामैं; लेकिन स्वर्ग मैं की चीज खुद इनसे अच्छे बलिदानन के जरिया सुद्ध करीं जाथैं। 24काहैकि मसीह तौ बौ हाथ के बनाए भै पवित्र जघा मैं जो सच्चे पवित्र स्थान को नमूना है, नाय घुसो, लेकिन स्वर्ग मैं ही घुसो, ताकी हमरे ताहीं अब परमेस्वर के अग्गु दिखाई देबै।

25जौ ना कि बौ अपने आपकै बार-बार चढ़ाबै, जैसो कि बड़ो-पुजारी हर साल जानवर को खून लैकै पवित्र जघा मैं घुसथै। 26नाय तौ दुनिया के बनन से लैकै बाकै बार-बार दुख उठाने पड़तो; लेकिन अब युग के अंत मैं बौ एक बार प्रगट भौ है, ताकी अपनिए बलिदान के जरिया पाप कै दूर कर दियै। 27और जैसी इंसानन के ताहीं एक बार मरनो और बाके बाद न्याय को होनो ठहराओ गौ है। 28बैसिये मसीह भी भौतन के पापन के ताहीं एक बार बलिदान चढ़ाओ गौ और जो लोग बाको इंतजार करथैं, उनके उद्धार के ताहीं दुसरी बार बिना पाप के दिखाई देगो।