परमेस्वर को सच्चो वचन
इब्रानियों 8
ईसु हमरो बड़ो पुजारी
हम जो कह रै हैं, बाको पूरो मतलब जौ है कि हमरे झोने एक ऐसो बड़ो पुजारी है, जो स्वर्ग मैं महान परमेस्वर के सिंहासन के दहने घाँईं बैठथै। बौ पवित्र जघा मैं बड़े पुजारी सेवक के रूप मैं काम करथै, मतलब बौ सच्चे तम्बु कै जोकै कोई आदमी नाय, बल्कि प्रभु ठड़बाई रहै।
हर एक बड़े पुजारी कै भेंट और जानवर की बलि चढ़ान के ताहीं चुनो जाथै, जौ बजह से जरूरी है, कि बड़े पुजारी के झोने भी कछु चढ़ान के ताहीं होनो चाहिए। और अगर मसीह पृथ्वी मैं होतो, तौ कहुए पुजारी नाय होतो, काहैकि ऐसे पुजारी तौ हैं जो यहूदि नियम के हिसाब से भेंट चढ़ाथैं। बे एक ऐसे पुजारी के रूप मैं आराधना करथैं बौ बास्तव मैं स्वर्ग मैं जो कुछ है बाकी एक नकल और खाली छाया है। जौ बैसोई है जैसो मूसा के संग रहै। जब बौ पवित्र तम्बु कै बनानबारो रहै, तौ परमेस्वर बासे कही, “सब कछु बौ नमूना के हिसाब से बनइये जो तोकै पहाड़ मैं दिखाओ गौ रहै।” पर अब, ईसु कै पुजारिन से बढ़कै सेवा मिली है, ठीक बैसिये जैसे बौ वाचा जो बौ परमेस्वर और बाके लोगन के बिचवई मैं भाँदी गई रहै बौ एक बहेतर वाचा है, काहैकि जौ बहेतर नियम की वाचा पर आधारित है।
अगर बौ पहली वाचा बेकसूर होती, तौ दुसरी वाचा की कोई जरुरत नाय होती।
लेकिन परमेस्वर अपने लोगन मैं गलती पाथै तौ बौ कहथै,
“प्रभु कहथै, बे दिन आए रै हैं,
जब मैं इस्राएलियन और यहूदियन के लोगन के संग एक नई वाचा भाँदंगो।
जौ बौ वाचा के जैसी ना होगी जोमैं उनके पुरखन के संग भाँदो रहों
जब मैं उनको हाथ पकड़कै उनकै मिस्र देस से बाहर निकार लाओ।
बे बौ वाचा के ताहीं बिस्वास के काबिल न रहैं, जोमैं उनके संग करो रहों,
और जौ बजह से मैं उनसे दूर हुई गौ, प्रभु को जहे कहनो है।
फिर प्रभु कहथै,
कि जो वाचा मैं बे दिनन के बाद इस्राएल के लोगन से भाँदंगो, बौ जौ है,
कि मैं अपनी नियम कै उनके मन मैं डारंगो
और बाकै उनके दिलन मैं लिखंगों।
और मैं उनको परमेस्वर बनंगो,
और बे मेरे लोग होंगे।
और उनमैं से कोई कै भी अपने दोस्तन कै सिखान या
अपने पड़ोसियन कै बतान की जरुरत ना पड़ैगी,
कि तुम ‘प्रभु कै जानौ।’
काहैकि छोटे से लैकै बड़े तक सब मोकै जान लेंगे।
काहैकि मैं उनके अधर्म के बारे मैं दयावान होंगो,
और उनके पापन कै फिर याद नाय करंगो।”
परमेस्वर नई वाचा की बात करकै पहली वाचा कै पुरानो करी; और जो कुछ भी पुरानो और घिसो-पिटो हुई जातै, बौ जल्दिये मिट जाथै।
परमेस्वर को सच्चो वचन. Copyright © 2024 The Word for the World International and Rana Tharu Translation Samithi, Khatima, UttraKhanda, India. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.