2 पतरस 2

झूठे सिक्छक

1काहैकि लोगन के बीच झूठे भविस्यवक्ता उठ आए हैं जैसो कि अतीत मैं बताओ गौ रहै, और बहे तराहनी तुमरे बीच मैं झूठे उपदेसक दिखाई देंगे। बे विनासकारी, और गलत सिद्धांत कै लांगे, और बौ प्रभु कै जो उन्हैं मोल लई है इंकार करंगे, और जहेमारे बे खुदकै अनकाचीति बिनास मैं लांगे। 2फिर भी, भौत से लोग उनके अनैतिक रस्ता के ऊपर चलंगे; और जोभी बे जो करथैं, उनके बजह दुसरे लोग सच्चाई के रस्ता की बुराई करंगे। 3और लालच मैं जे झूठे गुरुजी तुमकै झूठ-मूठ की कहानियाँ बतायकै तुमसे फायदा उठांगे। भौत दिन से उनको न्याई मरगौ है, और उनको बिनास करन बारो पूरी तरह से जग्गौ है!

4परमेस्वर पाप करन बारे स्वर्गदूतन कै भी नाय छोड़ी, और उन्हैं नरक मैं फेंक दई, जितै न्याय के दिन के ताहीं उन्हैं साँकरन से भाँदकै अंधियारे मैं रखो जाथै। 5परमेस्वर पुरानी दुनिया कै नाय छोड़ी, लेकिन नास्तिक लोगन की दुनिया मैं सैलाब लाय दई; सिरफ नूह जो न्याय को बचन देत रहै, और बाके संग सात लोग रहैं। 6परमेस्वर सदोम और अमोरा के सहरन कै दोसी करत भै, उन्हैं आगी से भसम कर दई, और उन्हैं एक उदाहरड़ बनाई कि जो बाकी आग्या कै ठुकरामंगे उनको का होगो। 7जबकी बौ न्याई लूत कै बचाई, और बौ अधर्मियन के अनैतिक चाल-चलन से भौत दुखी रहै। 8उनके बीच बौ एकै न्याई आदमी रहत रहै, और जब उनके अधर्म के कामन कै देखतो और सुनतो, तौ बौ हर दिन अपने धर्मी मन कै पीड़ित करत रहै। 9और तभई प्रभु जानथै कि कैसे न्याई लोगन कै परेसानी से बचाओ जाबै और कैसे अधर्मियन कै सजा देन के ताहीं न्याय के दिन ले रखो जाए। 10खासकर उन्हैं जो असुद्ध अभिलासा के पच्छू सरीर के अनुसार चलथैं, और परमेस्वर के अधिकार कै तुच्छ समझथैं। जे झूठे सिक्छक ढीट और अभिमानी होथैं और गौरवसाली इंसानन को आदर करन के बजाय उनकी बुराई करनो नाय छोड़थैं। 11हिंयाँ तक कि स्वर्गदूत, जे झूठे सिक्छक की बराबरी मैं भौत मजबूत और सामर्थी हैं, उनकै प्रभु के अग्गु बुरो-भलो कहकै दोस नाय लगाबौ। 12लेकिन जे लोग बेअकली जानवरन के हानी हैं, जो पकड़े जान और नास होन के ताहीं पैदा भै हैं; और जिन बातन कै जानतै ना हैं, उनके बारे मैं औरन की बुराई करथैं, बे अपनी सड़ाहट मैं खुदै सड़ जामंगे। 13और उनके जरिये करे गै कस्टन के ताहीं उन्हैं दुख के संग भुगतान करो जागो। उनके ताहीं सुख-विलास की बात जौ है कि बे अधर्म के काम दिन के उजियारे मैं कुछ भी करथैं जो उनकी सारीरिक भूंक कै संतुस्ट करैगो; बे लज्जित और लज्जित होथैं, जब बे तेरे खानु मैं सामिल होथैं, तौ हर समय अपने अन्याय के काम मैं और छल-कपट मैं खुस होत रहथैं! 14उनकी आँखी हमेसा व्यभिचार से भरी रहथैं; पाप के ताहीं उनकी भूंक कहुए नाय रुकथै। बे चंचल मन बारेन कै फुसलाए लेथैं। उनके मन लालची होन के ताहीं सीखे भै हैं। बे परमेस्वर के अभिस्राप के तहत हैं! 15बे तौ सीधी रहा छोड़ दईं हैं और अपनी रहा हरबाए दईं हैं; जे बिओर के लौड़ा बिलाम के पच्छू-पच्छू चलत रहैं, जो बौ अधर्म से कमाए भै पैसन से प्रेम करी 16और तभई बाके पाप के ताहीं फटकार लगाई गई रहै। तौ एक गधा के जरिया इंसानी अबाज निकरबाए कै बौ भविस्यवक्ता के पागलपन कै रोको गौ।

17जे सूखे पानी के सोता, और आँधी मैं उड़ाए गै बादर के तराहनी हैं, जिनके ताहीं घोर अंधियारो ठहराओ गौ है। 18बे घमंड और पागलन हानी बयान देथैं, और लुचपन जैसी चाल-चलन के जरिया बे लोगन कै सरीर की अभिलासा मैं फसाए लेथैं जो गलत लोगन की संगती से छुटकै निकर आए हैं। 19जे उनकै आजाद करन को वादा देथैं जबकी खुद बिनास कारी आदतन के दास हैं, काहैकि इंसान जोसे हार जाथै, बहे को दास बन जाथै। 20अगर जे हमरे उद्धारकर्ता प्रभु और ईसु मसीह के ग्यान के जरिया से दुनिया की असुद्ध ताकतन से बच गै हैं, और दुबारा से बहे रहामैं चल पड़े हैं तौ उनकी गत पहले से खराब हुई जागी। 21न्याय के रस्ता कै जानन के बाद जो पवित्र आग्या दई गई बासे पलट जानो जासे जौ उनके ताहीं भौत अच्छो होतो कि बे कहु भी बौ न्याय के रहा कै नाय जानते। 22उनके ऊपर जौ कहाबत सच है: “एक कुत्ता अपनी उल्टी खान कै लौट जाथै” और “हँदाई भइ सुअरनी कींच मैं लेहमन ताहीं लौट जाथै।”