Skip to content
BibleKenya

Rana Tharu Bible

उत्पत्ति 1

सिरजन की कहानी

सुरुवात मैं, जब परमेस्वर स्वर्ग और पृथ्वी1 कै बनाई, पृथ्वी सुनसान और उजाड़ पड़ी रहै। और अथा गहरे पानी के ऊपर अंधियारो रहै, और परमेस्वर को आत्मा पानी के ऊपर मँडरात रहत रहै। 2तौ परमेस्वर आग्या दई, “उजियारो हो” और उजियारो ही गौ। परमेस्वर उजियारे कै देखी और बौ अच्छो रहै। फिर बौ उजियारे कै अंधियारो से अलग करी, और प्रभु उजियारे कै “दिन” और अंधियारे कै “रात” नाओं दई। संजाखिन को समय बीतो और भोर भौ-ऐसे करकै पहलो दिन पूरो हुई गौ।

फिर परमेस्वर आग्या दई, “कि पानी के बीच मैं दुई हिस्सा बनकै वायुमंडल बन जाबै, ताकि पानी से अलग हुई सकै।” तौ परमेस्वर पानी कै पानी से अलग करी और बीच मैं वायुमंडल बनाई और ऐसोई हुई गौ। प्रभु वायुमंडल को नाओं “आसमान” रखी। संजाखिन को समय बीतो और भोर भौ-ऐसे करकै दुसरो दिन पूरो हुई गौ।

परमेस्वर आग्या दई, “आसमान के नीचे को पानी सब एक जघा मै जुराए जाबै, कि सूखी जमीन दिखाई देबै” और बैसिये हुई गौ। बौ जौ सूखी जमीन को नाओं “पृथ्वी” रखी, और जो पानी जुरानो भौ रहै बाको नाओं “समुंदर” रखी। और परमेस्वर देखी, कि बौ अच्छो है। तौ परमेस्वर आग्या दई, “पृथ्वी” से सब तराहनी के पेंड़-पौधा जमैं, चाँहे अन्न पैदा करन बारे होमैं, चाहें फल लान बारे होमैं और बैसोई ही गौ। फिर पृथ्वी मैं सब तराहनी के पेंड़-पौधा जमें, जो बीजधारी पौधे फलदायक पेंड़ जो अपने-अपने जाति के हिसाब से जमें, परमेस्वर देखी कि जौ अच्छो है। संजा बीती भोर भौ-ऐसे करकै तीसरो दिन हुई गौ।

तौ परमेस्वर आग्या दई, “दिन कै रात से अलग करन के ताहीं आसमान के वायुमंडल मैं जोती होमैं, और मौसम, दिन और साल के चिन्ह बनै। बे पृथ्वी मैं उजियारो देन के ताहीं आसमान मैं चमकंगे और ऐसोई भौ।” तौ परमेस्वर प्रभुता करन के ताहीं दुई जोती बनाई दिन के ताहीं सूरज, और रात मैं प्रभुता करन के ताहीं जोनी; और तारा भी बनाई। प्रभु पृथ्वी मैं उजियारो देन के ताहीं आसमान मैं जोतियन कै रखी, दिन और रात के ऊपर प्रभुता करन के ताहीं उजियारे कै अंधियारे से अलग कर दई। परमेस्वर देखी कि अच्छो है। संजा बीती भोर भौ, ऐसे करकै चौथो दिन हुई गौ।

परमेस्वर फिर कही, “पानी, कई तराहनी के जिंदे प्राड़िन से भर जाबै, और आसमान तमान तरहन के पक्छिन से भर जाबै।” ऐसे करकै परमेस्वर बड़े-बड़े पानी के जन्तुन कै बनाई, और पानी मैं हर तरहन के रहनबारे प्राड़ी और हर तरहन के पक्छिन कै बनाई। और ऐसो होत सब देखकै परमेस्वर कहथै कि अच्छो है। और प्रभु जौ कहकै सबन कै आसीस दई कि पानी मैं रहनबारे सब प्राड़ी समुंदर मैं भर जाबौ, और पक्छी अनगिनत गिनती मैं बढ़ैं। संजा बीती और भोर भौ-ऐसे करकै पाँचमों दिन हुई गौ।

तौ परमेस्वर फिर आग्या दई, पृथ्वी के जीव जन्तुन कै अपनी जाति के हिसाब से सब तराहनी के पैदा हुई जामैं मतलब पालतू जानवर, नेंगनबारे जन्तु और जंगली जन्तु पैदा होमैं - और बैसोई भौ। परमेस्वर हर तराहनी के जंगली जानवर और हर तराहनी के पालतू जानवर और हर तराहनी के नेंगन बारे जानवरन कै बनाई, और परमेस्वर जौ देखी कि अच्छो है।

फिर परमेस्वर कही, “आबौ हम इंसान कै अपने स्वरूप और समानता के हिसाब बनामैं; ताकि बे समुद्र की मच्छिन, और आसमान के पक्छिन, और पालतू जानवर, और बन जानवर, और पूरी पृथ्वी मैं सब नेंगनबारे जन्तुन मैं, उनके ऊपर अधिकार रखैं।” तौ परमेस्वर अपने स्वरूप इंसान जाति कै बनाई, और परमेस्वर के स्वरूप मैं बौ इंसान कै बनाई, परमेस्वर उनकै नर और नारी के रूप मैं बनाई।3 और परमेस्वर उनकै आसीस दई, और उनसे कही, “तुम फूलौ-फलौ, और पृथ्वी मैं भर जाबौ, और उनकै अपने अधिकार मैं कर लेबौ; और समुद्र कि मच्छियन, आसमान के पक्छिन, और पृथ्वी मैं नेंगन बारे सब जन्तुन के ऊपर तुमरो अधिकार हो।” और परमेस्वर उनसे कही, देखौ मैं तुमकै सब बीज बारे पेंड़ पौधा और सब फलन बारे पेंड़ दौ हौं, जे फल तुम्हारे खानू के ताहीं होगो।4 और जितने पृथ्वी के जानवर, और आसमान के पक्छी, और धरती मैं नेंगन बारे जन्तु, हर एक प्राड़िन जिनमैं जिंदगी की साँस हैं, मैं उनकै हरे पौधा आहार के ताहीं दौ हौं। परमेस्वर जो सब कुछ बनाई रहै, और बौ जौ देखकै कहथै कि अच्छो है। संजा बीती और भोर भौ-ऐसे करकै छठमों दिन बीत गौ।

Source notes (4)
  1. Footnote दुनिया
  2. Footnote 2 कुर 4:6
  3. Footnote मत्ती 19:4, मरकुस 10:6, प्रेरितों के काम 17:29, 1 कुरिन्थियों 11:7, कुलिस्सियों 3:10, 1 तीमुथियुस 2:13
  4. Footnote रोमियो 14:2

Rana Tharu Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.