Rana Tharu Bible
एज्रा 6
राजा दारा को आदेस
तभईये राजा दारा की आग्या से बेबीलोन के पुस्तकालय मैं जहाँ खजाना भी रखो रहै, खोज करी गई। मादे नाओं देस के अहमता नगर के राजगढ़ मैं एक किताब मिली, जोमैं जौ याद रखन ताहीं लिखो रहै:
“राजा कुस्रू के पहले साल मैं बहे कुस्रू राजा जौ आग्या दई, कि परमेस्वर के भवन के बारे मैं जो यरूसलेम मैं है, मतलब बौ भवन जोमैं बलिदान करे जात रहैं, बौ बनाओ जाए और बाकी बुनियाद मजबूती से डारी जाबै, बाकी ऊँचाई और चौंड़ाईं साठ हात की होबै; बामैं तीन रद्दा भारी पथरन के होमैं, और एक परत नई कठिया की होबै; और इनकी लागत राजभवन मैं से दई जाबै। परमेस्वर के भवन के जो सोने और चाँदी के बर्तन नबूकदनेस्सर यरूसलेम के मंदिर मैं से निकरबाएकै बेबीलोन कै पहोंचाए दई रहैं बौ लौटाएकै यरूसलेम के मंदिर मैं अपनी-अपनी जघा मैं पहोंचाए जामैं, और तैं उन्हैं परमेस्वर के भवन मैं रख दिये।”
राजा दारा काम जारी रखन को आदेस दई
राजा दारा को आदेस भेजनो:
अब हे फरात नदिया के पार के राज्यपाल तत्तनै, हे सतर्बोजनै, तुम अपने मदत करन बारे महानद के पार के अपार्सकियन।
हुँआँ के मंदिर से दूर रहबौ और परमेस्वर के बौ भवन के काम कै रहन दियौ; यहूदिन को सासक और यहूदिन के पुरनिया परमेस्वर के बौ भवन कै बहे के जघा मैं बनामैं। बल्किन मैं आग्या देथौं कि तुमकै यहूदिन के बे पुरनियन से ऐसो बर्ताव करने होगे, कि परमेस्वर को बौ भवन बनाओ जाए; मतलब राजा के धन मैं से, फरात नदिया के पार के कर मैं से, बे लोगन कै फुर्ती के संग खर्चा दौ जाबै; ऐसो ना होबै कि उनकै रुकने पड़ै। का बरधा! का मेढ़ा! का मेम्ना! स्वर्ग के परमेस्वर के होमबलियन के ताहीं जो जो चीजन को उनकै चाहिए, और जितनो गेहूँ, नून, दाखमधु, और तेल यरूसलेम के पुजारी कहमैं, बौ सब उनकै बिना भूल-चूक हर दिन दौ जाबै। इसलै कि बे स्वर्ग के परमेस्वर कै सुखदायक महाखनबारी बलि चढ़ाएकै, राजा और राजकुमारन के अच्छी जिंदगी के ताहीं प्रार्थना करे करैं। फिर मैं आग्या दौ, कि जो कोई जौ आग्या टालै, बाके घर मैं से कड़ी निकारी जाबै, और बाके ऊपर बौ खुद चढ़ाएकै जकड़ो जाबै, और बाको घर जौ गुनाह के बजह से मांद बनाओ जाए। परमेस्वर जो हुँआँ अपने नाओं की रहन बारी जघा ठहराई रहै, बौ का राजा का प्रजा, बे सबन कै जो जौ आग्या टालन और परमेस्वर के भवन कै जो यरूसलेम मैं है, नास करन के ताहीं हात बढ़ामैं, नास करै। मैं दारा जौ आग्या दौ हौं फुर्ती से ऐसोई करियो।
भवन समर्पित
तौ फरात नदिया के जौ पाँजर के राज्यपाल तत्तनै और सतर्बोजनै और उनकै मदत करन बारे, दारा राजा चिट्ठी भेजन के बजह से, बहे के हिसाब से फुर्ती से काम करीं। तौ यहूदी नेता, हाग्गै नबी और इद्दो को धुईतो जकर्याह नबी के नबूवत करन से भवन बनात रहे, और सफल भी हुई गै। बे इस्राएल के परमेस्वर की आग्या के हिसाब से और फारस को राजा कुस्रू, दारा, और अर्तछत्र की आग्यन के हिसाब से बनाते बाकै पूरो कर दईं। ऐसे करकै बौ भवन राजा दारा के राज्य के छठमें साल मैं अदार महेना के तिसरे दिन कै बनकै खतम भौ। इस्राएली, मतलब पुजारी, लेवी और दुसरे जितने बँधुवाई से आए रहैं बे परमेस्वर के बौ भवन समर्पित को त्योहार, खुसी के संग मनाईं। बौ भवन समर्पित मैं बे एक सौ पसु, और दुई सौ भेंड़, और चार सौ मेम्ना, और फिर सब इस्राएल निमित्त पापबलि करकै इस्राएल के गोत्रन कि गिनती के हिसाब से बाहरै बकरा कै चढ़ाईं। तौ जैसो मूसा की किताब मैं लिखो है, बैसिये बे परमेस्वर की आराधना के ताहीं जो यरूसलेम मैं है, बारी से पुजारिन और दल के लेवियन कै ठहराई दई।
फसह को त्योहार
फसह को त्योहार फिर पहले महेना के चौदहमें दिन बँधुवाई से आए भै लोग फसह त्योहार मानाईं। काहैकि पुजारी और लेवी एक मन हुईकै, अपने कै सुद्ध करीं; जौ बजह से बे सब के सब सुद्ध रहैं। बे बँधुवाई से आए भै सब लोगन और अपने भईय्या पुजारिन के ताहीं और अपने ताहीं फसह मैं पसुबलि चढ़ाईं। तौ बँधुआई से लौटे भै इस्राएली और जितने और देस की दुसरी जाति असुद्धता से इसलै अलग हुई गै रहैं कि इस्राएल के परमेस्वर प्रभु परमेस्वर की खोज करैं, बे सब मिलकै खानु खाईं। बे अखमीरी रोटी को त्योहार सात दिन ले खुसी के संग मनाते रहे; काहैकि प्रभु परमेस्वर उनकै खुसी दई रहै, और अस्सूर के राजा को मन उनके घाँईं ऐसो फेर दई कि बौ परमेस्वर मतलब इस्राएल के परमेस्वर के भवन के काम मैं उनकी मदत करै।
Rana Tharu Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.