Skip to content
BibleKenya

Rana Tharu Bible

एज्रा 5

तौ हाग्गै नाओं को नबी और इद्दो को धुईतो जकर्याह यहूदा और यरूसलेम के यहूदिन कै प्रचार करन लगे, बे इस्राएल के परमेस्वर के नाओं से उनसे प्रचार करीं। तौ सालतीएल को लौड़ा जरुब्बाबेल और योसादाक को लौड़ा ईसु, कमर भाँदकै परमेस्वर के भवन कै जो यरूसलेम मैं है बनान लगे और परमेस्वर के बे नबी उनकी मदत करत रहैं।

बहे समय फरात नदिया के जौ पाँजर को तत्तनै नाओं को सासक और सतर्बोजनै अपने मदत करन बारेन समेत उनके झोने जाएकै जौ पूँछन लगे, जौ भवन कै बनान और जौ सहरपनाह कै ठड़बान की कौन तुमकै आग्या दौ? बे लोगन से जहो भी कहीं, जौ भवन कै बनान बारेन के का नाओं हैं? पर यहूदियन के बड़े-बूढ़ेन के परमेस्वर की नजर उनके ऊपर रहै, इसलै जब ले जौ बात की चर्चा दारा से ना करी गई और जाके बारे मैं चिट्ठी के जरिये जबाब ना मिलो, तौ ले बे उनकै ना रोकीं। जो चिट्ठी फरात नदिया के जौ पाँजर के सासक तत्तनै और सतर्बोजनै और फरात नदिया के जौ पाँजर के उनके मदत करन बारेन अपार्सकियन राजा दारा के झोने भेजी बाकी नकल जौ है; बे बाकै जो चिट्ठी लिखी, बामैं जौ लिखो रहै राजा दारा को कुसल छेम सब तरहन से होबै। राजा कै विदित होबै कि हम लोग यहूदा नाओं के देस मैं महान परमेस्वर के भवन के झोने गै रहैं, बौ बड़े-बड़े पथरन से बन रौ है, और बाकी दीवारन मैं कड़िया जुड़ रईं हैं; और जौ काम बे लोगन के जरिये फुर्ती के संग हुई रौ है, और सफल भी होत जाएरौ है। जौ बजह से हम बे पुरनियन से ऐसे पूँछे, जौ भवन बनान, और जौ सहरपनाह फिर से बनान की आग्या तुमकै कौन दौ? और हम उनके नाओं भी पूछे, कि हम उनके मुख्य आदमिन के नाओं लिखकै तोकै बताए सकैं।

बे हमकै जौ जबाब दईं, हम तौ आसमान और पृथ्वी के परमेस्वर के दास हैं, और जौ भवन कै भौत साल पहले इस्राएलियन को एक बड़ो राजा बनाएकै तैयार करी रहै, बहे कै हम बनाए रै हैं। जब हमरे पुरखा स्वर्ग के परमेस्वर कै गुस्सा दिबाईं, तौ बौ उनकै बेबीलोन के कसदी राजा नबूकदनेस्सर के हात मैं कर दई रहै, और बौ जौ भवन कै खतम करी और लोगन कै बंदी बनाएकै बेबीलोन कै लै गौ। पर बेबीलोन को राजा कुस्रू के पहले साल मैं बहे कुस्रू राजा परमेस्वर के जौ भवन कै बनान की आग्या दई। परमेस्वर के भवन के जो सोने और चाँदी के बर्तन नबूकदनेस्सर यरूसलेम के मंदिर मैं से निकरबाएकै बेबीलोन के मंदिर मैं लै गौ रहै, बाकै राजा कुस्रू बेबीलोन के मंदिर मैं से निकरबाएकै सेसबस्सर नाओं एक लोग कै जोकै बौ सासक ठहराए दई रहै, सौंप दई। बौ बासे कही, “जौ बर्तन लै जाएकै यरूसलेम के मंदिर मैं रख, और परमेस्वर को बौ भवन अपनी जघा मैं बनाओ जाए।” तौ बहे सेसबस्सर आएकै परमेस्वर के भवन की जो यरूसलेम मैं है बुनियाद डारी; और तौ से अब ले जौ बन रौ है, पर अब ले ना बन पाओ।

“अब अगर राजा कै अच्छो लगै तौ बेबीलोन के राजभंडार मैं जौ बात की खोज करी जाबै, कि राजा कुस्रू सचमुच परमेस्वर के भवन कै, जो यरूसलेम मैं है, बनवान की आग्या दई रहै कि नाय। तौ राजा जौ बारे मैं अपनी इच्छा हमकै बताबै।”

Rana Tharu Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.