Deukhuri Bible
रोमी 6
पापमे मृत्यु, ख्रीष्टमे जीवन
आब हम्रे का कही ते? शायद तुहुरे सोँचथुइबो कि परमेश्वर अपन अनुग्रहक कारण हमार पापहे माफ करथाँ, तबेकमारे चोलो हम्रे पाप करी! पर हम्रे असिके नै सोँचे परत। पर नै हो! बिरकुल नै हो! हम्रे पापके लग मुसेकल बती, तबेकमारे हम्रे पाप कर्ती रहे नै परत। हम्रे जन्थी कि हम्रे सक्कु जाने, जतराजे फेन येशू ख्रीष्टके संग एकतामे बती, और येशू ख्रीष्टमे डुब्कि लेली ते हम्रे ओस्तेहेँके मुगिली जसिके ऊ मुलाँ।
तबेकमारे जब हम्रे डुब्कि लेली ते हम्रे मुगिली, और ख्रीष्टके संग दफ्नादेगिली। ताकि जसिके परमेश्वर बाबक महिमासे ख्रीष्ट मुअलमेसे फेनदोस्रे जित्ती हुइलाँ, ओस्तेहेँके हम्रे फेन लावा तरिकासे जीवन जिअब। काकरेकी यदि हम्रे डुब्कि लेके ख्रीष्टके मृत्युमे हुँकार संग एक हुइल बती, कलेसे पक्कै फेन हम्रे हुँकार संग फेनदोस्रे जित्ती हुइबी और हुँकार संग एक होजिबी।
और हम्रे जन्थी कि हमार पुरान पापी स्वभाव येशू ख्रीष्टके संग क्रूसमे टँगागिलस, ताकि हमार शरीरके पापी स्वभाव नाश होजाए, और आबसे हम्रे पापके अधिनमे ना रही। काकरेकी जे ख्रीष्टके संग मुगिल बा, ऊ पापके शक्तिसे मुक्त होगिल बा।
पर यदि हम्रे ख्रीष्टके संग मुअल बती कलेसे हुँकारे संग जिअब कना हम्रे विश्वास कर्थी। काकरेकी हम्रे जन्थी कि ख्रीष्ट मुवलमेसे जित्ती हुइलाँ, और फेनदोस्रे कबु नै मुहीँ। और आब ऊ फेनदोस्रे कबु नै मुहीँ।
काकरेकी जब ख्रीष्ट मुलाँ ते ऊ सक्कु मनैनके पापके लग सदादिनके लग एक्केचो मुलाँ; पर आब ऊ जिअल बताँ, कलेसे ऊ परमेश्वरके सेवा करक लग जिअल बताँ। अस्तेहेँके तुहुरे फेन अपनहे पापके शक्तिक लग ते मुगिलो कहिके सम्झो, पर आब तुहुरे येशू ख्रीष्टमे परमेश्वरके सेवा करक लग जिथो।
तबेकमारे पापी इच्छाहे अपन जीवनमे राज करे ना देऊ, ताकि तुहुरे अपन पापी इच्छक अनुसार काम ना करो। और ना अपन शरीरके अङ्गहे खराब उद्देश्यक लग प्रयोग हुई देऊ। पर अपनहे मुअलमेसे जित्ती हुइल बती कहिके अपन जीवन परमेश्वरहे दैदेऊ। और अपन शरीरके अङ्गहे सही काम करक लग पूरा रुपमे परमेश्वरहे दैदेऊ। तब तुहुरिन्केमे पापके कौनो अधिकार नै रहिहिस। पाप तुहुरिन्केमे राज नै करी। काकरेकी तुहुरे मोशक नियम कानुनके अधिनमे नै जिथो। पर परमेश्वरके अनुग्रहक अधिनमे बतो।
धार्मिकतक नोकर
ते का हुइल? काकरेकी हम्रे मोशक नियम कानुनके अधिनमे नै हुइती। पर परमेश्वरके अनुग्रहक अधिनमे बती। तबेकमारे हम्रे पाप नै करे परत। तुहुरे जन्थो कि जब तुहुरे अपनहे केक्रो गुलाम हुइक लग उहिहे दैदेथो। तब उ मनैया तुहुरिन्के मलिक्वा होजाइत। और तुहिन्हे वहे करे परत, ऊ ज्या कहत। तुहुरे पापके गुलाम बने सेक्थो, जे मृत्यु ओहोँर लैजाइत। या ते तुहुरे परमेश्वरके आज्ञा पालन करना रोजे सेक्थो, जे धार्मिक जीवनके ओहोँर लैजाइत।
पहिले तुहुरे पापके गुलाम रहो, पर आब तुहुरे उ शिक्षाहे पालन कर्लो, जोन शिक्षा तुहुरिन्हे देगिलस। तबेकमारे मै परमेश्वरहे धन्यवाद देहतुँ। और परमेश्वर तुहुरिन्हे पापके बन्धनसे छुटैले बताँ, और तुहुरे परमेश्वरके गुलाम बनगिलो ताकि तुहुरे वहे करे सेको, ज्या सही बा।
कारण यहे हो कि मै एकथो उदाहरणके लग गुलामीक विचार प्रयोग करथुँ ताकि ज्या मै तुहुरिन्हे सिखाइतुँ, उहिहे तुहुरे सहजिलसे बुझे सेको। जसिके तुहुरे अपन शरीरके अङ्गहे पापी जीवन जिअक लग, अशुद्ध और खराब काम करक लग सौँपल रहो, ओस्तेहेँके आब अपन शरीरके अङ्गहे पवित्रतक लग धार्मिकतक जीवन जिअक लग सौँपदेऊ। जब तुहुरे पापके गुलाम रहो, तब तुहुरे मजा काम करना लायकके नै रहो। तुहुरिन्हे अपन पुरान जीवनसे का फाइदा हुइल? जेकर कारण तुहुरिन्हे अब्बे लाज लागत। और उ कामके नतिजा मृत्यु हो।
पर आब तुहुरे पापसे स्वतन्त्र होके परमेश्वरके गुलाम होके आब तुहुरे वहे कामहे करथो, जोन काम पवित्रता ओहोँर लैजाइत, और ओकर अन्त्य सदाकालके जीवन हो। काकरेकी पाप कर्लक ईनाम मृत्यु हो। पर जोन वरदान परमेश्वर हम्रिहिन्हे देथाँ, उ वरदान सदाकालके जीवन हो, जोन जीवन हमार प्रभु येशू ख्रीष्टमे मिलत।
Deukhuri Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.