Deukhuri Bible
रोमी 4
अब्राहाम विश्वाससे धर्मी ठहर्लक
आब, यहूदी हुइलक नातासे हम्रे अपन पुर्खा अब्राहामके बारेमे का कही ते? का कारणसे ऊ धर्मी ठहरल? काकरेकी यदि अब्राहाम अपन मजा कामसे धर्मी ठहरत कलेसे ओकर थेन घमण्ड करना कुछु कारण रतिस। पर ऊ अपन कामके बारेमे परमेश्वरके आघे घमण्ड करे नै सेकी। काकरेकी पवित्र शास्त्रमे असिके लिखल बा, “अब्राहाम परमेश्वरके कर्लक वाचामे विश्वास करल, और परमेश्वर उहिहे धर्मी ठहरैलिस।” आब काम करुइया जोन पारिश्रमिक भेटाइत उ दान नै हो, पर उ उहिहे मिल्ना हक हुइतिस।
पर जे परमेश्वरके दया भेटाइक लग काम नै करत। पर पापी मनैनहे धर्मी ठहरुइया परमेश्वरमे भरोसा करत। ओसिन मनै ओइन्के विश्वासके कारण ओइने धर्मी ठहरथाँ। अस्तेहेँके दाऊद रज्वा लिखल बा कि परमेश्वर कसिके उ मनैयाहे आशिष देथाँ, जिहिहे परमेश्वर बिना काम कर्ले धर्मी ठहरैथाँ,
“ओइने धन्यके हुइँत, जेनके अधर्म माफ होगिल बतिन,
और जेनके पाप माफ होगिल बतिन।
धन्यके हो उ मनैया, जेकर पाप परमेश्वर नै गिन्थाँ।”
तब का यी धन्यके वचन खतना करुइयनके लग किल हो, या खतना नै करल मनैनके लग किल हो? हम्रे वहे कहती जोन बात पवित्र शास्त्रमे लिखल बा, “अब्राहाम परमेश्वरके कर्लक वाचामे विश्वास करल, और परमेश्वर उहिहे धर्मी ठहरैलिस।” असिन कब हुइल? अब्राहामके खतना हुइनासे आघे कि पाछे? उहिहे ओकर खतना हुइनासे आघे धर्मी ठहरैलिस, ना कि खतना होके सेकके।
परमेश्वर उहिहे पैलेहेँ स्वीकार करलेले रहिस, और उहिहे धर्मी ठहरादेले रहिस, जब ओकर खतना हुइले नै रहिस। खतनक चिन्हा स्वीकार कर्लक छाप हो। तबेकमारे अब्राहाम उ मनैनके आत्मिक बाबा हो, जेने विश्वास करथाँ पर खतना भर नै हुइल रथिन। ओइने अपन विश्वासके कारण धर्मी गिनजिथाँ। और ऊ खतना करल मनैनके फेन पुर्खा हो, और जेने खतना करल किल नै हुइँत, पर हमार पुर्खा अब्राहामके हस विश्वासके जीवन फेन जिथाँ, जसिके ऊ खतना हुइनासे पैलेहेँसे जिए।
अब्राहाम परमेश्वरहे विश्वास कर्लक कारण परमेश्वर उहिहे धर्मी ठहरैलिस। पर मोशक नियम कानुन पालन कर्लक कारण परमेश्वर अब्राहामहे और ओकर वंशहे यी संसार देना वाचा नै कर्लिस। काकरेकी यदि अब्राहाम और ओकर वंशहे मोशक नियम कानुन पालन कर्लक कारण उ वाचा देगिल रतिस कलेसे विश्वास बिनाकामक और वाचा बिना मतलबके होजाइत। काकरेकी परमेश्वर मोशक नियम कानुनहे पूरा रुपमे नै मनुइयनसे रिसैना रहिँत। और जहाँ नियम कानुन नै हो, वहाँ नियम कानुनके उल्लङ्घन फेन नै हुइत।
तबेकमारे मनै विश्वास करके परमेश्वरके वाचाहे भेटाइल बताँ। ताकि परमेश्वरके वाचा हुँकार अनुग्रहसे मिले। यिहिसे अब्राहामके सारा सन्तान उ वाचा भेटाई सेक्थाँ। यी वाचा ओइन्के लग किल नै हुइतिन, जेने मोशक नियम कानुनके अधिनमे रथाँ। पर उ हरेक मनैनके लग हो, जेने अब्राहामके हस विश्वास करथाँ, जे हमार पुर्खा हो। जसिके पवित्र शास्त्रमे लिखल बा, “मै तुहिन्हे बहुत्ते जातिनके पुर्खा बनैले बतुँ।” परमेश्वरके नजरमे अब्राहाम हमार बाबा हो। अब्राहाम उ परमेश्वरहे विश्वास करल, जे मुअल मनैनहे फेनदोस्रे जिवादेथाँ, और उ चिजनहे अस्तित्त्वमे नन्थाँ, जेकर कौनो अस्तित्त्व नै हुइतिन।
परमेश्वर अब्राहामहे कलिस कि ओकर बहुत्ते वंश हुइहीँ। पर अब्राहाम देखल कि आब ओकर लग कौनो लरका हुइना सम्भव नै रहिस। काकरेकी ओकर उमेर पैलेहेँ १०० साल होगिल रहिस। सारा फेन आब लरका पाई सेक्ना अवस्थामे नै रहे। पर सक्कु ओहोँरसे हेर्लेसे अब्राहाम बहुत्ते जातिनके बाबा बने नै सेकी, तभुन फेन ऊ अपन विश्वासमे कमजोर नै हुइल। ऊ विश्वास कर्ती रहल, और ऊ आश नै टुरल।
और ना ते अविश्वासी होके परमेश्वरके वाचामे शंखा करल, पर पक्कासे विश्वास करके परमेश्वरके महिमा करल। और अब्राहामहे पक्का विश्वास रहिस कि जोन बातके परमेश्वर वाचा कर्ले बताँ, उ वाचा परमेश्वर पूरा करहीँ। वहे विश्वासके कारण परमेश्वर उहिहे धर्मी ठहरैलिस। “वहे विश्वासके कारण परमेश्वर उहिहे धर्मी ठहरैलिस,” कना यी वचन ओक्रेहे लग किल लिखल नै हो, पर हमार लग फेन हो। हम्रे जे-जे परमेश्वरहे विश्वास करब, उ सक्कुहुनहे परमेश्वर धर्मी ठहरैहीँ। अथवा यदि हम्रे परमेश्वरहे विश्वास करब, जे हमार प्रभु येशूहे मुवलमेसे फेनदोस्रे जिवैलाँ। कलेसे हमार विश्वासके कारण परमेश्वर हम्रिहिन्हे फेन धर्मी ठहरैहीँ। येशू हमार अपराधके लग मुवागिलाँ। और परमेश्वर हम्रिहिन्हे अपन संग धर्मी बनाइक लग येशूहे जिवादेलाँ।
Deukhuri Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.