हिब्रू 13

अन्तिम अर्ती

1हम्रे दादू-भैयनके और दिदी बहिन्यनके हस एकदोसर जहनहे प्रेम कर्ती रही। 2याद कर्ले रहो, परदेशीनहे फेन पहुननके रुपमे सत्कार करे परत। काकरेकी अस्तेहेँके केऊ-केऊ बिना पता पैले स्वर्गदूतनके सत्कार कर्ले बताँ।

3अप्निहीँ फेन ओइन्के संग कैदमे परल हस झेलमे रहुइयनके ख्याल करो। और अप्निहीँ दुःखमे परल हस अत्याचारमे परल मनैनहे सम्झो। जसिके कि तुहुरे ओइनेहेन्के संग दुःखमे बतो।

4सक्कुहुनके भोज आदरणीय होए, और एकदोसर जहनमे हरदम विश्वासयोग्य पलिरहो। काकरेकी दुराचारी और व्यभिचारीनके इन्साफ परमेश्वर करथाँ।

5अपन जीवनहे धन-सम्पतिक लालचसे अल्गे धारो। तुहुरिन्के संग रहल चिजमे सन्तुष्ट बैठो। काकरेकी परमेश्वर अप्निहीँ कलेताँ,

“मै तुहुरिन्हे कबु नै छोरम, मै तुहुरिन्हे कबु नै छोरम।”

6तबेकमारे बिना डरैले हम्रे कथी,

“प्रभु मोरिक सहायक हुइताँ, मै नै डरैम।

मै काकरे डराऊँ, मनै महिन्हे का करे सेक्हीँ?”

7अपन अगुवनहे सम्झहो, जेने परमेश्वरके वचन तुहुरिन्हे सुनैलाँ। ओइने अपन जीवनहे कसिके जिलाँ, और नै मुअतसम विश्वायोग्य फेन पलिरलाँ। तुहुरे फेन ओइन्के करल हस परमेश्वरकेमे विश्वास देखाऊ। 8येशू ख्रीष्ट काल, आज और सदासर्वदा एक्के हस बताँ। ऊ कबु फेन नै बदल्थाँ।

9तबेकमारे हम्रे यी सक्कु लावा और फरक शिक्षक पाछे नै लागे परत। और तुहुरिन्हे यी शिक्षा खराब डगरमे ना लैजाए। काकरेकी खैना चिजके नियमहे मानके नै हो, पर परमेश्वरके अनुग्रहसे तुहुरिन्के मन बल्गर होए। ओसिन नियम पालन करुइयनके भलाई नै हुइल हो। 10यहूदी चलन अनुसार परमेश्वरके भवनमे सेवा करुइया पुजारीनहे येशूक कर्लक बलिदानमेसे कुछु फाइदा नै हुइतिन। पर हम्रिहिन्हे फाइदा बा।

11सुरुक वाचा अनुसार प्रत्येक साल प्रधान पुजारी पाप माफिक लग जानबरके खुन महापवित्र ठाउँमे नन्थाँ। पर उ जानबरीनके शरीर भर मनैनके बैठ्ना ठाउँसे बाहेर लैजाके जराजैथिन। 12तबेकमारे येशू फेन हुँकार अपने खुनसे मनैनहे पवित्र कराइक लग यरुशलेम शहरसे बाहेर कष्ट भोग्लाँ और मुलाँ। 13तबेकमारे हम्रे यहूदी परम्पराहे छोरके येशूहे विश्वास करे परत, और हुँकार संग अपमान सहे परत। 14काकरेकी यी संसार हमार सदादिन पलिरना घर नै हो। पर हम्रे अइना दिनके घरक आसरा हेरती।

15तबेकमारे आऊ, हम्रे अपन ढेबरलेके लगातार येशूक माध्यमसे परमेश्वरके प्रशंसा गाई। यहे हुँकार लग हमार बलिदान हो। 16भलाई करना और अपन थेन रलक चिज जरुरीमे परल मनैनहे बाँटचुँड करना ना बिसराऊ। काकरेकी अस्ते बलिमे परमेश्वर खुशी हुइथाँ।

17तुहुरिन्के अगुवनके कलक मानो, ओइन्के काम तुहुरिन्के जीवनके रेखदेख करना और ओइन्के सेवक बारेमे परमेश्वरहे हिसाब बुझैना हुइतिन। तुहुरे ओइन्के आज्ञा पालन करो ताकि ओइने अपन काम खुशीसे करिँत, दुःख मानके नै। यदि तुहुरे ओइन्हे दुखि बनैबो कलेसे यिहिसे तुहुरिन्हे कुछु फाइदा नै हुई।

18हमार लग प्राथना करो। हम्रिहिन्हे पक्का पता बा कि हमार विवेक सफा बा। और हमार करना सक्कु चिजमे हम्रे परमेश्वरहे आदर देना चहथी। 19तुहुरिन्हे मोरिक विशेष आग्रह यी बा, कि मोरिक लग प्राथना करदेऊ। और मै फेनदोस्रे तुहुरिन्के थेन झत्ते आई सेकुँ।

आशीर्वाद

20-21और आब, शान्ति देहुइया परमेश्वरके अनुग्रह, जे प्रभु येशूहे मुअलमेसे जित्ती करैलाँ। हुँकार इच्छा पूरा करक लग तुहिन्हे चहना सक्कु चिजसे सजैहीँ। हुँकिन्हे मन परना सक्कु चिज येशू ख्रीष्टके शक्तिसे तोहाँरमे पैदा करैहीँ। येशूए भेँरीनके मजा भेँरहुवा हुइँत कना बात सदाकालके वाचक चिन्हा हुँकार खुनसे देखाइत। हुँकिनेहे सदासर्वदा महिमा मिलिन। आमेन! (यकर मतलब हुइत, अस्तेहेँ होए।)

22हे मोरिक विश्वासी भैयो, मै तुहुरिन्हे अनुरोध करतुँ, कि मोरिक लिखल यी उत्साहक सन्देशहे तुहुरे सँस्सा करके सुनो। काकरेकी मै तुहुरिन्हे छोटकरीमे लिखल बतुँ।

23तुहुरिन्हे यी जनाई चहथुँ, कि हमार भैया तिमोथी झेलमेसे छुट्गिल बा। यदि ऊ झत्तेहेँ आजाई कलेसे मै ओकर संग तुहुरिन्हे भेँटा करे अइबुँ।

24तुहुरिन्के सक्कु अगुवा और परमेश्वरके सक्कु पवित्र मनैनहे नमस्कार कहिदेऊ। इटाली देशमेसे अइलक विश्वासीन तुहुरिन्हे नमस्कार पठाइल बताँ।

25तुहुरे सक्कुहुनके संग परमेश्वरके अनुग्रह पलिरहे। आमेन! (यकर मतलब हुइत, अस्तेहेँ होए।)