गलाती 2

निउतरह्यनके ओहोँरसे पावलके स्वागत

1चौध साल पाछे मै बारनाबासके संग यरुशलेम शहरमे गैनु, और तीतसहे फेन अपन संग लैगिनु। 2और परमेश्वर महिन्हे वहाँ जाई कले रहिँत। तबेकमारे मै वहाँ गैनु। और जब मै वहाँ रहुँ तब मै वहाँक मण्डलीक बर-बर अगुवनसे व्यक्तिगत रुपमे भेटघाट कर्नु। और ओइन्हे उ खुशीक खबरके बारेमे बुझादेनु, जोन खुशीक खबर मै गैर-यहूदिनहे प्रचार कर्ती आइल बतुँ। ताकि असिन ना होए कि पहिले मै ज्या-ज्या कर्नु, और ज्या-ज्या मै अइना दिनमे करम उ बेकार होजाए।

3-5वहाँ कौनो-कौनो मनै असिन रहिँत, जेने अपनहे बँचाइक लग येशूहे किल विश्वास नै करिँत। पर ओइने यहूदी नियम कानुनहे फेन विश्वास करिँत। ओइने गुप्तचर हस हुइँत ताकि ओइने हमार जिना तरिकक बारेमे जाने सेकिँत कि ख्रीष्ट हम्रिहिन्हे कसिके स्वतन्त्र करलाँ। वास्तवमे ओइने हम्रिहिन्हे यहूदी नियम कानुनके पालन करवाके हम्रिहिन्हे गुलाम बनैना चहथाँ। पर हम्रे एक घचिक लग फेन ओइन्के माँग स्वीकार नै कर्ली, ताकि तुहुरे खुशीक खबरके सच्चाइमे विश्वास कर्ती रहो। ओइने कलाँ कि मोरिक विश्वासी भैया तीतस ग्रीक देशके हो। तबेकमारे उहिहे खतना करवाई परहिस। पर अन्तिममे उ अगुवन तीतसहे खतना करवाइक लग बेबश नै बनैलाँ।

6यरुशलेम शहरके मण्डलीक उ अगुवन मोरिक शिक्षामे कुछु नै थप्लाँ। महिन्हे यिहिसे कौनो फरक नै परत कि उ अगुवन के हुइँत। काकरेकी परमेश्वर बाहिरी रुप हेरके न्याय नै करथाँ। 7पर उ अगुवन बुझगिलाँ कि जसिके यहूदी मनैनहे खुशीक खबर प्रचार करना काम पत्रुसहे देगिल बतिस। ओस्तेहेँके गैर-यहूदिनहे खुशीक खबर प्रचार करना अधिकार परमेश्वर महिन्हे देले बताँ। 8काकरेकी जोन परमेश्वर पत्रुसहे यहूदिनके बिच्चेम निउतरह्यक रुपमे नियुक्त करलाँ। वहे परमेश्वर महिन्हे फेन गैर-यहूदिनके बिच्चेम निउतरह्यक रुपमे नियुक्त करलाँ।

9जोन मनै मण्डलीक खम्भा मानजाइँत, अथवा याकूब, केफास और यूहन्ना; जब ओइने महिन्हे मिल्लक अनुग्रहक वरदानहे चिहिन्लाँ। तब ओइने महिन्हे और बारनाबासहे अपन सहयोगी मानके हमारमे शामिल हुइक लग अपन दाहिन हाँथ1 देलाँ। और हम्रे गैर-यहूदिनके थेन और ओइने यहूदिनके थेन खुशीक खबर प्रचार करे जैबी कना बातमे ओइने सहमत होगिलाँ। 10ओइने हम्रिहिन्हे अतरा किल अनुरोध करलाँ कि हम्रे यरुशलेम शहरमे गरीब विश्वासीनहे सहायता करी। और महिन्हे यहे काम करना बहुत इच्छा रहे।

पावल और पत्रुसके मतभेद

11एक दिन जब पत्रुस (केफास) एन्टिओखिया शहरमे अइलस, तब दोसुर विश्वासीनके आघे महिन उहिहे डाँते पर्लस। काकरेकी ऊ ज्या करतेहे उ सही नै रहे। 12काकरेकी याकूबके पठैलक मनैनके अइनासे आघे पत्रुस गैर-यहूदी विश्वासीनके संग खाना खाए। पर जब याकूबके पठैलक गोड्गात विश्वासीन यरुशलेम शहरमेसे अइलाँ, ते पत्रुस उ गैर-यहूदिनसे मिलजुल करना और ओइन्के संग खाना खैना बन्द करदेहल। काकरेकी पत्रुस उ यहूदिनसे डराए, जेने सक्कु गैर-यहूदिनके फेन खतना होए कना चाहिँत।

13और ओकर संगसंगे अन्ताकिया शहरके कौनो-कौनो यहूदी विश्वासीन फेन कपट भरल काम करलाँ। यहाँसम कि बारनाबास फेन ओइन्से डराए, और गैर-यहूदिनके संग मिलजुल करना बन्द करदेहल। 14पर जब मै देख्नु कि ओइने ज्या करतिहिँत, उ काम खुशीक खबरके सच्चाइक विरोधमे रहे। तब मै मनैनके भीड़मे पत्रुस (केफास) हे कनु, “तुँ एकथो यहूदी होके फेन यहूदी हस नै हुइतो। तुँ यहूदी होके गैर-यहूदिनके हस व्यवहार करथो। तुँ काकरे गैर-यहूदिनहे यहूदिनके हस जीवन बितैना दबाब देथो?”

विश्वास और काम

15हम्रे जल्मत्तिसे यहूदी हुइती, और यहूदिनके गैर-यहूदिनहे “पापी हुइँत” कहिके कना बात नै हो। 16कलेसे हम्रे यहूदी विश्वासीन यी फेन जन्थी कि एकथो मनैया मोशक नियम कानुनहे पालन करके धर्मी नै ठहरत। पर येशू ख्रीष्टकेमे विश्वास करके किल धर्मी ठहराजाइत। तबेकमारे हम्रे फेन ख्रीष्ट येशूमे विश्वास कर्ली, ताकि हम्रे मोशक नियम कानुन पालन कर्लक कारण नै हो। पर ख्रीष्टमे विश्वास कर्लक कारण परमेश्वर हम्रिहिन्हे धर्मी ठहराइँत। काकरेकी केऊ फेन मोशक नियम कानुन पालन करके परमेश्वरके नजरमे धर्मी ठहरे नै सेकत।

17कौनो-कौनो यहूदी मनै सोच्थाँ कि हम्रे पाप कर्ले बती। काकरेकी आब हम्रे धर्मी ठहरक लग मोशक नियम कानुनहे मन्ना छोरके हम्रे ख्रीष्टहे भरोसा कर्थी। कलेसे का यकर मतलब यी हो कि ख्रीष्ट हम्रिहिन्से पाप करवैथाँ? नै हो! बिरकुल फेन नै हो! 18पर यदि मै यी बातहे मानलेहम कि कौनो एकथो मनैया मोशक नियम कानुन पालन करके परमेश्वरके आघे धर्मी ठहरे सेकत कलेसे मै जात्तिकमे पाप करे भिरल रहम। 19मै यी बुझ्थुँ कि मै मोशक नियम कानुन पालन करके धर्मी बने नै सेकम। तबेकमारे मै मोशक नियम कानुनके लग मुगिनु कहिके मन्थुँ ताकि मै परमेश्वरके लग जिए सेकुँ।

20यी असिन हो जब ख्रीष्ट क्रूसमे मुलाँ ते मै फेन मुगिनु। आब मै नै होके ख्रीष्ट मोरिकमे जिथाँ। यी अब्बे शरीरमे जिलक जीवन मै परमेश्वरके छावकमे विश्वास करके जिअतुँ। जे महिन्हे अतरा प्रेम करलाँ कि मोरिक लग अपन ज्याने दैदेलाँ। 21मै यी बातहे अस्वीकार करे नै सेकम कि परमेश्वर अपन अनुग्रहक कारण हम्रिहिन्हे बँचैलाँ। काकरेकी यदि मनै मोशक नियम कानुन पालन करके धर्मी बने सेक्ताँ कलेसे ख्रीष्टहे मुए नै पर्तिन।