निउतरह्या 11

पत्रुसके बात फरछ्वैलक

1यहूदिया प्रदेशमे रहल निउतरह्यन और विश्वासीन गैर-यहूदिनके फेन परमेश्वरके वचन ग्रहण करलेले बताँ कहिके सुन्लाँ। 2और जब पत्रुस यरुशलेम शहरमे आइल ते यहूदी विश्वासीन असिक कहिके पत्रुससे विवाद करे लग्लाँ, 3“तुँ गैर-यहूदिनके घरेम गैलो, और ओइन्के संग खाना खैलो।” 4तब् पत्रुस का-का हुइल कना सक्कु बात सुरुसे असिके सुनाई लागल; 5“मै योप्पा नगरमे प्राथना करतुहुँ। और तब्बेहेँ मै एकथो दर्शन देख्नु कि स्वर्गमेसे चारु कोन्वामे बाँधल तन्ना हस कुछु पृथ्वी ओहोँर गिरतेहे। और उ मोरिक थेन अइलस। 6जब मै उहिहे ध्यानसे हेर्नु, ते मै देख्नु कि उ तन्नामे पृथ्वीक सक्कु मेरके चरगोरिया और बन्वामे रना जानबर और घस्रना प्राणी और आकाशमे उरुइया चिरैँचुरुंगीन रहिँत। 7और वहे समयमे मै एकथो आवाज फेन सुन्नु, ‘ए पत्रुस उठो और मुवाके खाऊ।’ 8पर मै कनु, ‘नाई प्रभु, काकरेकी मै कबु फेन कुछु अपवित्र या अशुद्ध चिज नै खाइल हुइतुँ।’ 9पर उ आवाज फेनदोस्रे स्वर्गमेसे आइल, ‘परमेश्वर जोन चिजहे शुद्ध करदेले बताँ, उहिहे तुँ अशुद्ध ना कहो।’ 10तीनचो ओस्तेहेँके हुइलस और उ सक्कु फेनदोस्रे स्वर्गमे फिर्ता उठागिलस। 11वहे समयमे कैसरिया शहरमेसे कर्नेलियसके पठाइल तीनथो मनै हमारिक रहल घरेम आपुग्लाँ। 12तब पवित्र आत्मा महिन्हे बिना हिचकिचैले ओइन्के संग जाऊ कहिके कहल। और यी छे जाने विश्वासी भैयन फेन मोरिक संग आगिलाँ; और हम्रे कर्नेलियसके घरेम गैली। 13ऊ हम्रिहिन्हे बताइल, कि ऊ एकथो स्वर्गदूतहे अपन घरेम ठरह्याइल देखल। और उ स्वर्गदूत उहिहे कलिस, ‘आब कौनो मनैनहे योप्पा नगरमे पठाऊ, और पत्रुस कना सिमोनहे बलाई पठाऊ। 14और ऊ तुहिन्हे वचन सुनाई, जिहिसे परमेश्वर तुहिन्हे और तोहाँर परिवारके सक्कु मनैनहे बँचैहीँ।’ 15जब मै बोले लग्नु, ते पवित्र आत्मा ओइन्केमे असिके अइलिन जसिके सुरुवातमे हमारमे पवित्र आत्मा आइल रहे। 16तब् महिन्हे प्रभुक कहल उ वचन याद आइल, ‘यूहन्ना ते पानीलेके डुब्कि देहल, पर तुहुरे पवित्र आत्मक डुब्कि भेटैबो।’ 17तबेकमारे यी बात फरछ्वारे बा कि परमेश्वर ओइन्हे फेन वहे वरदान देलाँ, जोन वरदान हम्रिहिन्हे प्रभु येशू ख्रीष्टके उप्पर विश्वास कर्ली ते मिलल; कलेसे मै के रहुँ, जे परमेश्वरहे रोक्तुँ?” 18यी बात सुनके उ यहूदी विश्वासीन चिमचाम होगिलाँ। और परमेश्वरके प्रशंसा कर्ती ओइने कहे लग्लाँ, “तब ते परमेश्वर गैर-यहूदिनहे फेन सदाकालके जीवनके लग मन बदलके अपन पाप करे छोरना और येशू ख्रीष्टकेमे विश्वास करना मौका देले बताँ।”

एन्टिओखिया शहरमे शाऊल और बारनाबास

19स्तिफनसहे मुवाँदेलिस ते ओकरपाछे बहुत्ते विश्वासीन यरुशलेम शहरहे छोरदेलाँ। और ओइने फोनिके प्रदेश, साइप्रस टापु और सिरिया प्रदेशके एन्टिओखिया शहरमे चलगिलाँ। पर ओइने यहूदिनहे बाहेक औरे दोसुर जहन किहुहे फेन परमेश्वरके वचन नै सुनाइँत। 20पर ओइन्मेसे केऊ-केऊ साइप्रस टापु और कुरेन शहरके मनै रहिँत। ओइने एन्टिओखिया शहरमे जाके ग्रीक भाषा बोलुइया गैर-यहूदिनहे फेन प्रभु येशूक प्रचार करिँत। 21और प्रभुक शक्ति ओइन्केमे रहिन, और बहुत्ते गैर-यहूदी जातिनके मनै ओइन्के सन्देशमे विश्वास करलाँ। और ओकर पाछे ओइने प्रभु येशूकमे विश्वास करना सुरु करदेलाँ। 22यी समाचार यरुशलेम शहरके मण्डलीक मनै फेन सुनलेलाँ। तबेकमारे ओइने बारनाबासहे एन्टिओखिया शहरमे पठैलाँ। 23बारनाबास वहाँ जाके परमेश्वरके अनुग्रह देख्के खुशी होगिल, और ओइन्हे सक्कुहुनहे पूरा मनसे प्रभुकमे विश्वासी पलिरना उत्साहा देहल। 24बारनाबास एकथो मजा मनैया रहे; और ऊ पवित्र आत्मा और विश्वाससे भरल रहे। और बहुत्ते मनै येशूहे विश्वास करलाँ। 25तब् एन्टिओखिया शहरहे छोरके शाऊलहे खोजक लग बारनाबास टार्सस नगरमे चलगिलस। 26जब बारनाबास शाऊलहे भेटाइल, तब ऊ शाऊलहे एन्टिओखिया शहरमे लैगिलस। तब् पूरा एक सालसम मण्डलीक मनैनके संग ओइने भेटघाट कर्ती रलाँ, और मनैनके बरवार समूहहे प्रभु येशूक बारेमे शिक्षा देलाँ। चेलनके सुरुकचो एन्टिओखिया शहरमे ख्रीष्टियन कहिगिलाँ। 27उ समयमे गोड्गात विश्वासी अगमवक्तन यरुशलेम शहरमेसे एन्टिओखिया शहरमे अइलाँ। 28ओइन्मेसे अगाबस नाउँ रहल एकथो अगमवक्ता ठरह्याके पवित्र आत्मक अगुवाइसे असिके बतैलस कि सारा संसारमे बरवार अनिकाल परी। और पाछे जाके वहे अनिकाल महाराजा क्लौडियसके शासनकालमे परल। 29तब् एन्टिओखिया शहरके चेलनके सक्कु जाने अपन-अपन क्षमता अनुसार यहूदिया प्रदेशमे रहल विश्वासीनके लग दानके रुपमे कुछु सहायता पठैना निर्णय करलाँ। 30ओइने अस्तेके करलाँ, और ओइन्के दान बारनाबास और शाऊलके हाँथेम देके यरुशलेम शहरके मण्डलीक अगुवनके थेन पठादेलाँ।