Deukhuri Bible
२ कोरिन्थी 5
हमार स्वर्गीय घर
काकरेकी हम्रिहिन्हे पता बा कि धर्तीमे रहल हमार यी शरीर डेरामे रहल हस हो। यदि जब हम्रे मुजाब तब परमेश्वर हम्रिहिन्हे सदाकाल पलिरना घर दिहीँ, जोन घर हाँथेलेके बनैलक नै हो। यी शरीरमे रहे परता ते हम्रे दुखि बती। काकरेकी हम्रे चहथी कि परमेश्वर हम्रिहिन्हे एकथो असिन शरीर दिँत, जोन हमार स्वर्गक हस रही। जब हम्रे उ स्वर्गक शरीर भेटैबी, तब हम्रे बिना शरीरके नै रबी। यी डेरामे रहेबेर दुखि होके हम्रे सुस्कर्थी। और हम्रे यी संसारके शरीरहे छोरे नै चहथी। पर परमेश्वर हम्रिहिन्हे स्वर्गक शरीर दिँत कना हम्रे चहथी, ताकि यी शरीर जोन मुजिहीँ, ओइने सदाकालके जीवनके माध्यमसे बदलजिहीँ। और जे हम्रिहिन्हे लावा शरीर भेटाइक लग तयार कर्ले बताँ, उ परमेश्वरे हुइँत, और जे हम्रिहिन्हे पहुँरक रुपमे पवित्र आत्मा देले बताँ। तबेकमारे हम्रे जबफेन हिम्मत कर्थी। और हम्रे यी जन्थी कि, जबसम हम्रे शरीरमे रथी, तबसम हम्रे स्वर्गमे रहुइया प्रभुसे दूर रथी। तबेकमारे हुँकिन्हे देख्लक कारण नै होके हुँकारमे विश्वास कर्लक कारण हम्रे जित्ती रथी। हम्रे हिम्मत कर्थी, और यी शरीरमेसे अलग होके प्रभुक संग रना आकुर धेउर सहि मन्थी। तबेकमारे चाहे हम्रे हुँकार संग स्वर्गमे रही, चाहे हम्रे यी धर्तीमे रही, हुँकिन्हे खुशीए बनैना हमार लक्ष्य रहत। काकरेकी हम्रे सक्कु जाने न्यायक लग ख्रीष्टके आघे ठरह्याई परी। सक्कु जाने यी जीवनमे मजा और नै मजा ज्या-जसिन काम कर्ले बताँ, ओइने वहे अनुसार फल भेटैहीँ।
परमेश्वरसे मेलमिलापके सेवा
तबेकमारे प्रभुक डर मानके हम्रे मनैनहे सच्चाइमे विश्वास करक लग अनुरोध कर्थी। और परमेश्वर हम्रिहिन्हे पूरा रुपमे जन्थाँ, और मै आशा करतुँ कि तुहुरे अपन मनमे जात्तिकमे हम्रिहिन्हे मजासे जन्थो। हम्रे तभुन फेन तुहुरिन्के थेन अपन तारिफ नै कर्थी। पर तुहुरिन्हे हमारमे गर्व करना मौका देहती, ताकि तुहुरे ओइन्हे जवाफ देहे सेको, जेने मनैनके मनके बातमे नै होके बाहेरके देखावती बातमे घमण्ड करथाँ। यदि हमार होश ठिक ठाउँमे नै हो कहिके दोसुर मनै कथाँ कलेसे यी परमेश्वरके लग हो। और यदि हम्रे होशमे बती कहिके दोसुर मनै कथाँ कलेसे यी तुहुरिन्के लग हो। ख्रीष्टके प्रेम हम्रिहिन्हे मजबुर कराइत। तबेकमारे हम्रिहिन्हे यी पक्का बा कि एकथो मनैया सक्कु मनैनके लग मुगिलस। तबेकमारे सक्कु मनै मुगिलाँ। और ख्रीष्ट सक्कुहुनके लग मुलाँ, ताकि जेने जित्ति बताँ ओइने आबसे अपनहे किल खुशी पारक लग ना जिइँत, पर ओइने हुँकार लग जिए परत। ऊ ओइन्के लग मुलाँ, और परमेश्वर हुँकिन्हे फेनदोस्रे जिवादेलाँ।
ख्रीष्टमे लावा सृष्टि
तबेकमारे आबसे हम्रे केक्रो मूल्यांकन बाहिरी चिजके आधारमे नै करब। और हम्रे ख्रीष्टहे एकथो समय बाहिरी चिजके आधारमे हेरल रही, पर आबसे हम्रे हुँकिन्हे असिके नै हेरब। तबेकमारे यदि केऊ ख्रीष्टहे विश्वास करत कलेसे ऊ लावा स्वभाव भेटैले बा। पुरान बात बितगिल बा, हेरो, उ सक्कु लावा होगिल बा। यी सक्कु परमेश्वरके ओहोँरसे हुइलक हो, परमेश्वर ख्रीष्टहे अपन और हमार बिच्चेम मिलाप कराइक लग पठैलाँ। और ऊ हम्रिहिन्हे अपन और मनैनके बिच्चेम मिलापके सेवा देले बताँ। अथवा ख्रीष्टके कर्लक सक्कु कामके माध्यमसे परमेश्वर सक्कु मनैनहे मिलापमे नानक लग एकथो डगर बनाइतिहिँत। और परमेश्वर मनैनके पापके हिसाब नै लेके शान्तिक बारेमे ऊ अपन सन्देश प्रचार करक लग हम्रिहिन्हे जिम्मा लगादेले बताँ। तबेकमारे हम्रे ख्रीष्टके राजदूत हुइती, और परमेश्वर मनैनहे हमार माध्यमसे हुँकार सन्देश स्वीकार करक लग अनुरोध करथाँ। ख्रीष्टेके ओहोँरसे हम्रे तुहुरिन्हे अनुरोध करती कि तुहुरे परमेश्वरके संग मिलाप करलेऊ। ख्रीष्टमे कौनो पाप नै रहिन, और हुँकिनेहे परमेश्वर हमार पापके लग दान करदेलिन। तबेकमारे हम्रे परमेश्वरके नजरमे धर्मी बने सेकी कहिके ख्रीष्ट हमार पापके दण्ड अपन उप्पर लैलेलाँ।
Deukhuri Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.