Deukhuri Bible
१ यूहन्ना 3
विचार करो, कि परमेश्वर बाबा हम्रिहिन्हे कसिन प्रेम करल बा, कि हम्रे परमेश्वर बाबक लरका कहाजाई, और जात्तिकमे हम्रे ओकर लरका हुइती। पर जोन मनै यी संसारसे सम्बन्ध धरथाँ, ओइने यी नै जन्थाँ कि हम्रे परमेश्वरके लरका हुइती। काकरेकी ओइने परमेश्वर बाबाहे नै चिहिन्थाँ। हे मोरिक प्रिय संघरियन, आब हम्रे परमेश्वरके लरका हुइती, और अबसम यी प्रकट नै हुइल हो कि हम्रे कसिन रबी। पर हम्रे अतरा जन्थी, कि जब येशू ख्रीष्ट प्रकट हुइहीँ, तब् हम्रे फेन हुँकारे हस होजिबी। काकरेकी हम्रे हुँकिन्हे ओस्तेहेँ देख्बी जसिन ऊ बताँ। और जे ख्रीष्टमे यी आशा करत, ऊ अपनहे ओस्तेहेँ पवित्र बनाइत, जसिन ख्रीष्ट पवित्र बताँ।
पाप और परमेश्वरके लरका
यदि केऊ पाप कर्तिरहत कलेसे ऊ परमेश्वरके मोशक नियम कानुनहे अस्वीकार करत। और पाप करना कलक ते मोशक नियम कानुनके पालन करनासे अस्वीकार करना हो। और तुहुरे जन्थो कि येशू ख्रीष्ट हमार पापहे हम्रिहिन्से दूर लैजाइक लग प्रकट हुइलाँ। और हुँकारमे कौनो पाप नै हो। जे हुँकारमे पलिरहत, ऊ पाप कर्ती नै रहत। जे पाप करत ऊ यी नै बुझत कि ख्रीष्ट के हो, और ना ते ऊ हुँकिन्हे चिन्हत। हे प्रिय लरको, केऊ तुहुरिन्हे धोखा देहे ना भेटाए; जे धार्मिक काम करत, वहे ख्रीष्टके नन्हेँ धर्मी हो। जे पाप कर्तिरहत, उ शैतानके ओहोँरसे हो। काकरेकी शैतान ते सुरुएसे पाप कर्ती आइल बा। शैतानके कामहे नाश पारक लग परमेश्वरके छावा प्रकट हुइलाँ। जे परमेश्वरके लरका हो ऊ पाप कर्ती नै रहत; काकरेकी परमेश्वरके स्वभाव ओकरमे रथिस। और ऊ पाप कर्ती नै रहत, काकरेकी ऊ परमेश्वरके लरका हो। परमेश्वरके लरका के हो और शैतानके लरका के हो कहिके यिहिएसे पता चलत। उ मनै जेने धार्मिक काम करथाँ, ओइने परमेश्वरके ओहोँरसे हुइँत। और जेने अपन भैयनहे प्रेम करथाँ, ओइने परमेश्वरके ओहोँरसे हुइँत।
पारस्परिक प्रेम
जोन सन्देश तुहुरे सुरुएसे सुन्लो, उ सन्देश यहे हो कि हम्रे एकदोसुर जहनहे प्रेम करी। कयिन नाउँक मनैया हस ना होऊ, जे शैतानके रहे, और जे अपन भैयाहे मुवाँदेहल। और ऊ उहिहे काकरे मुँवाइल? काकरेकी ओकर अपन काम खराब रहिस, और ओकर भैयक काम भर धार्मिक रहिस। हे भैयो, यदि संसारके मनै तुहुरिन्हे घृणा करहीँ कलेसे तुहुरे अचम्म ना मानो। हम्रे जन्थी कि हम्रे मृत्युक शक्तिसे मुक्त होगिल बती, और आब हमार थेन सदाकालके जीवन बा; काकरेकी हम्रे अपन दादू-भैयाहे प्रेम कर्थी। जे प्रेम नै करत, ऊ मृत्युमे पलिरहत। जे अपन दादू-भैयाहे घृणा करत, ऊ हत्यारा हो। और कौनो फेन हत्यारक संग सदाकालके जीवन नै रहत कना बात तुहुरिन्हे पतै बा। यम्नेहेँसे प्रेम का हो कहिके हम्रे जन्ली, कि येशू ख्रीष्ट हमार लग अपन ज्यान दैदेलाँ। तबेकमारे हम्रे फेन अपन दादू-भैयनके लग अपन ज्यान देहे परत। पर जेकर थेन संसारके धन-सम्पति बा, तभुन फेन अपन दादू-भैयनहे जरुरीमे परल देख्के ओइन्केमे ऊ नै सोगाइत कलेसे ओकरमे परमेश्वरके प्रेम रहे नै सेकी। हे प्रिय लरको, हम्रे एकदोसर जहनहे प्रेम कर्थी कहिके बात किल नै बत्वाई। पर अपन कामसे और सच्चाइसे फेन प्रेम करी।
परमेश्वरके आघे हिम्मत
जब हम्रे दोसुर जहनहे प्रेम कर्थी। तब यिहिएसे हम्रिहिन्हे पता चली कि हम्रे सच्चाइक हुइती। और जब कबु फेन हमार मन हम्रिहिन्हे दोषी ठहराइत। तब हम्रे परमेश्वरके हाजिरीमे अपन मनहे बिँस्वाई सेक्थी। काकरेकी परमेश्वर हमार मनसे भारी बताँ। और ऊ सक्कु चिज जन्थाँ। हे मोरिक प्रिय संघरियन, यदि हमार मन हम्रिहिन्हे दोष नै लगाई कलेसे परमेश्वरके आघे हम्रिहिन्हे हिम्मत आइत। और ज्या चिज हम्रे परमेश्वरसे मंग्थी, उ चिज हम्रे भेटैथी। काकरेकी हम्रे हुँकार आज्ञाहे पालन कर्थी। और हम्रे वहे कर्थी, ज्या परमेश्वरहे खुशी बनाइत। और हुँकार आज्ञा यहे हो, कि हम्रे हुँकार छावा येशू ख्रीष्टके नाउँमे विश्वास करी। और ऊ हम्रिहिन्हे जोन आज्ञा देले बताँ, ओक्रेहे अनुसार एकदोसुर जहनहे प्रेम करे परत। और जे परमेश्वरके आज्ञा पालन करत, ऊ परमेश्वरके संग और परमेश्वर ओकर संग एकतामे रथाँ। और वहे पवित्र आत्मा जोन ऊ हम्रिहिन्हे देले बताँ, उहिएसे हम्रे जन्थी कि परमेश्वर हमार संग एकतामे पलिरथाँ।
Deukhuri Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.