Deukhuri Bible
१ कोरिन्थी 8
मूर्तिहे चह्राइल खैना चिज
आब उ प्रश्नक बारेमे जोन बात तुहुरे अपन चिट्ठीमे लिखल बतो: का मूर्तिनहे चह्राइल खाना खैना सही हो? हम्रे जन्थी, कि हमार सक्कुहुनके थेन ज्ञान बा: ज्ञान घमण्ड नानत, पर प्रेम उन्नति कराइत। यदि केऊ “कुछु जन्थुँ” कहिके कहत कलेसे, उहिहे ज्या जाने परना हो, उ चिज ऊ जानल नै रहत। पर केऊ परमेश्वरहे प्रेम करत कलेसे उहिहे परमेश्वर चिहिन्थिस। ओसिन हो कलेसे, मै मूर्तिनहे चह्राइल खैना चिजके बारेमे प्रश्नक जवाफ देहे चहथुँ। हम्रिहिन्हे पता बा कि, हम्रे जन्थी कि मूर्तिन सच्चा देउँतन नै हुइताँ, और ऊ किल एकथो सच्चा परमेश्वर हुइँत। आब स्वर्ग और पृथ्वीमे असिन बहुत्ते चिज बताँ, जेनहे मनै मलिक्वा हो कहिके कथाँ।
“पर हमार लग ते एक्केथो परमेश्वर बाबा बताँ,
जे सक्कु चिजहे बनैलाँ, और जेकर लग हम्रे जिथी।
और हमार लग एक्केथो प्रभु बताँ, ऊ येशू ख्रीष्ट हुइँत,
और जेकर माध्यमसे सक्कु चिज बनल, और जेकर माध्यमसे हम्रिहिन्हे जीवन मिलल।”
पर हमार बहुत विश्वासीन अभिन फेन नै जन्थाँ कि मूर्तिनके थेन कौनो शक्ति नै हुइतिन। काकरेकी ओइने पहिले उ मूर्तिनके पुजा करिँत। और आब जब ओइने मूर्तिनहे चह्राइल खाना खैथाँ। ओइने गल्तीसे सोँच्थाँ कि ओइने अभिन फेन उ मूर्तिनके पुजामे शामिल बताँ। और ओइने यी सोँचके परेशान होजिथाँ कि ओइने मूर्तिनहे चह्राइल खाना खाके पाप करदरलाँ।
पर खैना चिज हम्रिहिन्हे परमेश्वरके लग्गे नै लैजाइत। और खैना चिजहे अस्वीकार करके फेन हम्रे परमेश्वरहे खुशी बनाई नै सेक्थी, और खाना खैना फेन हम्रिहिन्हे परमेश्वरके नजरमे मजा नै बनाइत। पर हौश्यार रहो, असिन ना होए कि तुहुरिन्के स्वतन्त्रता कमजोर विश्वासीनके लग पापमे गिरना कारण बनजाए। काकरेकी तुहुरे जन्थो कि मूर्तिन परमेश्वर नै हुइँत। तबेकमारे तुहुरे मूर्तिक मन्दिरमे खाना खाई सेक्थो। पर जे विश्वासमे कमजोर बा, ऊ तुहिन्हे वहाँ खाना खाइत देखी कलेसे उहिहे फेन मूर्तिनहे चह्राइल सिकार खाइक लग उत्साहा मिल्थिस। पर ऊ असिक करत देखी ते ऊ सोँची कि उ खैना गलत हो।
तबेकमारे तुहुरिन्हे पता बा कि तुहुरिन्के थेन उहिसे धेउर ज्ञान बा कना तुहुरिन्के सोँचके कारण विश्वासमे कमजोर रहल उ विश्वासी भैया जेकर लग ख्रीष्ट मुलाँ, ओकर आत्मिक जीवन खराब होजिहिस। यदि हम्रे यी काम कर्लक कारण हमार विश्वासी संघरिया दोषी महसुस करत कलेसे हम्रे ओकर और ख्रीष्टके विरोधमे पाप कर्ले बती। तबेकमारे यदि मूर्तिमे चह्राइल खाना खैलक कारण दोसुर विश्वासी संघरियनहे विश्वाससे पाछे हट्ना कारण बनत कलेसे मै उ मेरिक खाना कबु नै खैम ताकि मै दोसुर विश्वासीनके ख्रीष्टसे पाछे हट्ना कारण ना बनुँ।
Deukhuri Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.