၂ ကောရိန္သု 9:7

ခရစ်ယာန်ရှင်းရှင်း ကူညီထော့‑က်ပံ့ကြောန်း

1ယုဒပြည်မာရှိဟှူ ဘုရားသခင်ရဲ့ သန့်ရှင်းဟှူလူမျိုးတော်လေဟှို ကူညီထော့‑က်ပံ့ဟှူ ကြောန်းဟှို နန်းနို့နားဟှို စာရေးဘီး ဖော်ပြဇာ လိုဟှ။ 2နန်းနို့ဟှာ ကူညီထော့‑က်ပံ့ဟှို့တွပ် စိအားထတ်သန်ဂေ့ဟှယ် ဆိုဇာဟှို ငါသိဟှယ်။ အယ်ကြောန့် နန်းနို့ကြောန်းဟှို မာကေဒေါနိပြည်သားလေဟှို ငါဟှာ ကြွားဟှယ်။ “အခါယပြည်မာရှိဟှူ ယောင်ကြည်သူလေဟှာ ရင်နှစ်ဟှဘဲ့ ပေးကမ်းဟှို့တွပ် ဆင်သင့်ရှိနေဂေ့ဟှယ်” ဆိုဘီး သူးနို့ဟှို ငါဟှ ပြောရစ်ဟှယ်။ နန်းနို့ဟှာ စိအားကီးဟှူကြောန့် အယ်လူလေ ဂူလောင်းလည်း စိအားထတ်သန်လာဂေ့ဟှယ်။ 3နန်းနို့ကြောန်းဟှို နို့လေဟှ ကြွားဘီးပြောဟှူစကားဟှာ ချည်းနှီးသတ်သတ်မှုဘဲ မှန်ကန်ဟှူကြောန်းဟှို သိရှင်တွပ်ကြောန့် အယ်ယောင်ကြည်သူလေဟှို နန်းနို့နားဟှို ငါဟှ လွှတ်လိုက်ဟှယ်။ ငါပြောပြဟှားဟှူတိုင်းဘဲ့ နန်းနို့လေရဲ့ လတ်ဆောန်လေဟှို ဆင်သင့်ပြင်ဆင်ဟှားဂေ့။ 4အယ်မျိုးမှုဘဲနေဟှာ ငါ့နတူးဒူ မာကေဒေါနိပြည်သား တချို့လေဟှ လိုက်လာကြောန့် နန်းနို့လေဟှာ ဆင်သင့်ပြင်ဆင်ဘဲန ဖြစ်နေဇာဟှို ဗြင်ရဟှူ ခီမာ နန်းနို့လေဘဲ့ ယှစ်ရလေ့မယ် မှုဟှ။ နို့လေဟှလည်း နန်းနို့ဟှို ရရာတိုင်း ယောင်ကြည်ဘီး စိခ္လမိတွပ်ကြောန့် ယှစ်ရဂေ့လေ့မယ်။ 5အယ်ကြောန့် နန်းနို့ဟှာ ဂဒိထားဟှားတိုင်းဘဲ့ အယ်လတ်ဆောန်ဟှို ပြင်ဆင်နိုင်ဟှို့တွပ် အယ်ယောင်ကြည်သူလေဟှို နန်းနို့နားဟှို ကြိုဘီးဟှာ လွှတ်ဟှို့တွပ် လိုအပ်ဟှယ် ဆိုဇာ ငါထန်ဟှယ်။ ငါဟှာ ရော့‑က်လာဟှူ ခီမာ လတ်ဆောန်လေဟှာ ဆင်သင့်ထားဟှားဟှူကြောန့် နန်းနို့ဟှ တိုက်တွန်းကြောန့်မှုဘဲ့ စေတနာနပေးဟှယ် ဆိုဇာ ထန်ရှားလေဟှယ်။

6မျိုးစေ့နဲနဲဟှား ကြဲဟှူလူဟှ နဲနဲဟှားဘဲ့ ရိရလေ့မယ်။ မျိုးစေ့ဟှို ဘောင်ဂီးကြဲဟှူလူဟှ ဘောင်ဂီးဟှို ပ္လန်ဘီးဟှာ ရိရမယ် ဆိုဇာဟှို အော့‑က်မေ့ဂေ့ပါ။ 7လူတိုင်း စေတနာစိရှိတိုင်း ပေးကမ်းရဟှယ်။ ရရာဗြောဟှူစိနရော၊ ပေးကမ်းရဟှို့တွပ် ဝတ်တရားရှိဟှယ်ဆိုဟှူစိန ပေးကမ်းဂေ့န။ ဖြားဖြစ်ကြောန့်နူးဆိုဟှာ ဘုရားသခင်ဟှာ စေတနာန ပေးကမ်းတတ်ဟှူလူဟှို နှစ်သက်ဟှယ်။ 8နန်းနို့ဟှာ လိုဇာမှန်မျှဟှို မြဲဒမ်းရဂေ့ဘီးဟှာ ကောန်းမှုဘောန်းဇောင်လေတွပ် ကူညီဘီး ကျေးဇူးပြုနိုင်ဟှူတွပ်ကြောန့် ဘုရားသခင်ဟှာ နန်းနို့ လိုအပ်ဟှူဇာလေထတ် ပေးဟှို့တတ်နိုင်ဟှယ်။ 9ကျမ်းစာထဲမာ၊

“သူဟှာ ဆင်းရဲဟှူလူလေဟှို ရစ်ရောဘီး ပေးကမ်းစွန့်ကြဲဟှယ်။

သူ့ရဲ့ ဖြောန့်မတ်ဟှူဇာဟှာ ထာဝရတည်ဟှယ်”

ဆိုဘီး ရေးဟှားဟှယ်။ 10မျိုးစေ့ကြဲဟှူလူဟှို မျိုးစေ့န စားဇာလေဟှိုပေးဟှူ ဘုရားသခင်ဟှာ နို့လေ လိုအပ်မျှ မျိုးစေ့ဟှိုလည်း ပေးဘီး ပန်ပေါ့‑က်ဘီးဟှာ ရှင်ခိုင်းလေ့မယ်။ နန်းနို့ရဲ့ ရစ်ရောဇာနဆိုင်ဟှူ သီးပွမ့်လေဟှိုလည်း ဖြစ်စေလေ့မယ်။ 11နန်းနို့ဟှာ ခီတိုင်းမာ ရစ်ရောဘီး ပေးကမ်းနိုင်ဂေ့ဟှို့တွပ် ကိုယ်တော်ဟှာ နန်းနို့ဟှို မြဲဒမ်း ကြွယ်ဝ စေလေ့မယ်။ နို့လေဟှနေတဆင့် နန်းနို့ပေးကမ်းဟှူ လတ်ဆောန်လေဟှို ခံရဟှူလူလေဟှာ ဘုရားသခင်ဟှို ကျေးဇူးတန်ဂေ့လေ့မယ်။ 12နန်းနို့ဟှာ အယ်ကောန်းမှုလေန ဘုရားသခင်ရဲ့ သန့်ရှင်းဟှူလူစုလေ ဆင်ပြေဘဲဟှူ ခီမာ ကူညီဇာကဘဲန ဘုရားသခင်ဟှို ကျေးဇူးတန်ဇာလေလည်း ရရာတိုင်း တိုးပွားလာစေဟှယ်။ 13အယ်ကောန်းမှုဟှို ထော့‑က်ဘီးဟှာ လူဘောင်ဂီးဟှ ခရစ်တော်ရဲ့ ဒန်းကောန်းဟှို သစ်စာရှိရှိ ခံယူဘီးဟှာ ယောင်ကြည်ဂေ့ဟှို့တွပ်န နန်းနို့ဟှာ ရစ်ရစ်ရောရောန တခြားသူလေဟှိုပါ ကူညီထော့‑က်ပံ့ ပေးဟှူကြောန့် ဘုရားသခင်ဟှို ချီးမွမ်းဟှယ်။ 14နန်းနို့ဟှာ ထူးခြားဟှူ ဘုရားသခင်ရဲ့ ကျေးဇူးတော်ဟှို ခံစားရဂေ့ဟှူကြောန့် သူးနို့လေဟှာ နန်းနို့ဟှို ရရာတိုင်း လွမ်းဟှူကြောန့် နန်းနို့တွပ် ဆုတောန်းဂေ့လေ့မယ်။ 15နို့လေဟှာ တန်းဖိုးဖြတ်နိုင်ဘဲဟှူ ဆုကျေးဇူးတော်တွပ် ဘုရားသခင်ဟှို ကျေးဇူးတန်ဂေ့ဇို့။