၂ ကောရိန္သု 5:17

1နို့လေနေဟှူ မ္လေဂီးအီဖြစ်ဟှူ ကိုယ်ခန္ဓာ ယာယီတဲဟှာ ပျစ်ဟှူ ခီမာ ကောန်းဂန်ဘောင်မာ ဘုရားသခင်ကိုယ်တိုင် ဆော့‑က်ဟှားဟှူ ထာဝရအီ ရှိကြောန်းဟှို နို့လေသိဂေ့ဟှယ်။ 2အယ်ယာယီတဲမာ နေဟှူ ခီမာ ကောန်းဂန်ဘောင်မာရှိဟှူ အီဟှို ရရာတိုင်းဘဲ့ တောန်းတဟှူကြောန့် နို့လေဟှာ ညည်းတွားဘီး နေဂေ့ဟှယ်။ 3ကောန်းဂန်ဘောင်ဟှ အီဟှို ရော့‑က်ဟှူ ခီမာ နို့လေဟှာ ကိုယ်ခန္ဓာမှေ့ဘဲန ဖြစ်လေ့မယ် မှုဟှ။ 4ရောက်ကိုယ်ခန္ဓာတဲမာ နေရဟှူ ခီမာ နို့လေဟှာ ညည်းတွားဂေ့ဟှယ်။ အယ်မျိုး ညည်းတွားဂေ့ဇာဟှာ နို့လေရဲ့ ရောက်ခန္ဓာဟှို ဖယ်ရှားရှင်ကြောန့် မှုဟှ။ သေဘီးဟှာ ပျစ်စီးတတ်ဟှူဇာဟှို ထာဝရသတ်ရှင်ရှင်းဟှို ပ္လောန်းလဲဟှို့တွပ် ကောန်းဂန်ဘောင်ရဲ့ ကိုယ်ခန္ဓာဟှို ရရှင်ကြောန့် ဖြစ်ဟှယ်။ 5အယ်မျိုးပ္လောန်းလဲဟှို့တွပ် နို့လေဟှို ပြင်ဆင်ပေးဟှူ သခင်ဟှ ဘုရားသခင်ဘဲ့ ဖြစ်ဟှယ်။ နို့လေခံစားရဟှို့တွပ်န ကိုယ်တော်ရဲ့ ဆုကျေးဇူးတွပ် အာမခံချစ်ဖြစ်န ဝိညာဉ်တော်ဟှို နို့လေဟှို ပေးလေဟှယ်။

6အယ်ကြောန့် နို့လေဟှာ မြဲဒမ်းဘဲ့ ရဲရင့်ဟှူစိ ရှိဂေ့ဟှယ်။ အယ်ကိုယ်ခန္ဓာ အီမာနေဟှူ ကာလပတ်လောင်း နို့လေဟှာ သခင်ဘုရားရဲ့ အီတော်န ဝီးဘီးဟှာ ရှိနေဂေ့ဟှယ်။ 7ဖြားဖြစ်ကြောန့်နူးဆိုဟှာ နို့လေဟှာ ဗြင်အားဖြင့် မှုဘဲ ယောင်ကြည်ရှင်းအားဖြင့် သတ်ရှင်ဟှယ်။ 8နို့လေဟှာ ရဲရင့်ဟှူစီရှိဘီး အယ် ကိုယ်ခန္ဓာအီဟှနေဘီး ထွပ်ဟှားဘီးဟှာ သခင်ဘုရားနတူးဒူ နေဟှို့တွပ် ပိုလိုရှင်ဂေ့ဟှယ်။ 9နို့လေဟှာ အယ်နေရာမာ ရှိနေပါစေ၊ တခြားနေရာမာ ရှိနေပါစေ၊ နို့လေဟှာ သခင်ဘုရား နှစ်သက်ဟှူသူ ဖြစ်ဟှို့တွပ် ရရာတိုင်း လိုလာဂေ့ဟှယ်။ 101ဖြားဖြစ်ကြောန့်နူးဆိုဟှာ နို့လေဂူလောင်းဟှာ တရားစီရင်ခံရဟှို့တွပ် ခရစ်တော်ရဲ့ တရားပလ္လင်ရှေ့ဟှို ရော့‑က်ရဂေ့လေ့မယ်။ ကိုယ်ခန္ဓာနေဟှူအီမာ ရှိနေဒူးဟှ ကောန်းမကောန်း ကျင့်လေတွပ် ကျိုးပြစ်ဟှို နို့လေဟှ သီးသီး ခံရဂေ့လေ့မယ်။

ခရစ်တော်အားဖြင့် ဘုရားသခင်န မိဖွဲ့ရကြောန်း

11နို့လေဟှာ ဖြားဖြစ်ကြောန့် သခင်ဘုရားဟှို ကြော့‑က်ရဟှယ် ဆိုဇာဟှို သိဟှူကြောန့် လူလေဟှို စည်းရောင်းဘီး နှိုးဆော်ဟှယ်။ နို့လေရဲ့ ကြောန်းဟှိုလည်း ဘုရားသခင်ဟှ ဂူလောင်း သိဟှယ်။ နန်းနို့ရဲ့ သိစိထဲဟှနေ ငါ့ကြောန်းဟှိုလည်း ကောန်းကောန်းသိဂေ့မယ် ဆိုဇာဟှို ငါမျှော်လင့်ဟှယ်။ 12အယ်မျိုးပြောဇာဟှာ နို့လေဟှာ နော့‑က်တခါ ကိုယ့်ကိုယ်ကိုယ် ဂေါင်ဖော်ရှင်ကြောန့် မှုဟှ။ နို့လေဟှို နန်းနို့ဟှ ဝါကြွားနိုင်ဟှို့ခွမ့်ဟှို ရရှိဂေ့ဟှို့တွပ် ဖြစ်ဟှယ်။ အယ်မျိုးဖြစ်မှဘဲ့ လူလေရဲ့ စိနှလောင်းဟှို ကေ့ဘဲန ပ္လန်ဟှဆင်းသဏ္ဍာန်ဟှိုဘဲ့ ကေ့ဘီး ဝါကြွားတတ်ဟှူ လူလေရဲ့ စကားဟှို နန်းနို့ဟှာ ပ္လန်ဘီးဟှာ ချေပနိုင်မယ်။ 13နို့လေဟှာ ရူးဟှာဘီလော။ နို့လေဟှာရူးမယ် ဆိုဟှာ ဘုရားသခင်တွပ်ဘဲ့ ဖြစ်ဟှယ်။ နို့လေဟှာ ရူးဟှ ဆိုဟှာ နန်းနို့တွပ်ဘဲ့ ဖြစ်ဟှယ်။ 14ယော့‑က်ယော့‑က်ဟှ လူလေ ဂူလောင်းတွပ် သေခံကြောန့် လူလေ ဂူလောင်းဟှာ အယ်လူနတူးဒူ သေခံဂေ့ကြောန်းဟှို နို့လေဟှာ ဆောင်းဖြတ်ဟှူကြောန့် နို့လေဟှို ခရစ်တော်ရဲ့ မြစ်တာတော်ဟှာ အောက်စိုးလိုက်ဟှယ်။ 15ကိုယ်တော်ဟှာ လူလေတွပ် သေခံဇာဟှ လူလေဟှာ သတ်ရှင်ဟှူ ခီမာ ကိုယ်ကျိုးတွပ် ဆစ်ဘီးဟှာ သတ်ရှင်ဂေ့ဘဲန သူးနို့တွပ် သတ်စွန့်ဘီးန သေဘီးဟှာ ရှင်ပ္လန်ထမြော့‑က်ဟှူ သခင်တွပ် သတ်ရှင်ဂေ့ဟှို့တွပ် ဖြစ်ဟှယ်။

16အယ်ကြောန့် နို့လေဟှာ ခုဟှစဘီး ဖယ်သူဟှို့လည်း လူရဲ့သွီးသား ဇာတိသဘောန ဆောင်းဖြတ်ဂေ့ဟှ။ ရင်ဟှ ခရစ်တော်ဟှို လူလေရဲ့သွီးသား ဇာတိသဘောန နို့လေဟှ ဆောင်းဖြတ်လာဂေ့ဘေမဲ့ ခုဟှ အယ်မျိုးလောက်ဟှမ်း။ 17ခရစ်တော်နှိုက် တလောင်းတဝဒဲ ရှိဟှူလူဟှာ သတ္တဝါသစ် ဖြစ်ဟှယ်။ သူဟှာ ဘဝဟောန်းဟှို စွန့်ဘီးဟှာ ဘဝသစ်ဟှို ဝမ်စားဟှယ်။ 18အယ်မှုလေဟှာ ဘုရားသခင်ရဲ့ တဂိုးကြောန့် ဖြစ်ဟှယ်။ ဘုရားသခင်ဟှာ နို့လေဟှို သူ့ရဲ့ ရန်သူဟှနေဘီးဟှာ ခရစ်တော်အားဖြင့် မိဆွေဖြစ်ဟှို့တွပ် ပ္လောန်းလဲပေးဘီး ကိုယ်တော်န ပ္လန်ဘီးဟှာ သင့်မြတ်စေဟှယ်။ အယ် သင့်မြတ်ဇာနဆိုင်ဟှူ မှုဆောန်ဟှိုတွပ် တာဝန်ဟှို နို့လေဟှို ပေးအပ်လေဟှယ်။ 19ဘုရားသခင်ဟှာ ခရစ်တော်အားဖြင့် လောကသား ဂူလောင်းဟှို သူ့ရဲ့ မိဆွေလေ ဖြစ်စေရှင်းဟှာ နို့လေရဲ့ တရားဖြစ်ဟှယ်။2 ကိုယ်တော်ဟှာ လူသားလေရဲ့ ပြစ်လေဟှို မှတ်ဟှားဟှ။ လူသားလေဟှို ကိုယ်တော်နပ္လန်ဘီး သင့်မြတ်စေဟှူ တရားဟှို နို့လေဟှို အပ်ပေးဟှားဟှယ်။

20အယ်ကြောန့် နို့လေဟှာ ခရစ်တော်ရဲ့ သံတမန်ဖြစ်န နန်းနို့လေဟှို မြစ်တာရပ်ခံဟှယ်။ ဘုရားသခင် ကိုယ်တိုင်ဘဲ့ နို့လေဟှနေဘီးတဆင့် နန်းနို့ဟှို မြစ်တာရပ်ခံမျိုးဘဲ့ မြစ်တာရပ်ခံဟှယ်။ နန်းနို့ဟှာ ဘုရားသခင်ရဲ့ရန်သူ ဖြစ်နေဇာဟှနေဘီး မိဆွေဖြစ်န ပ္လောန်းလဲဂေ့ပါ ဆိုဘီး ခရစ်တော်ရဲ့ ကိုယ်စား နို့လေဟှာ တောန်းဗန်ဟှယ်။ 21ဘုရားသခင်ဟှာ ပြစ်မှေ့ဘဲဟှူ သခင်ဟှို နို့လေတွပ်ကြောန့် ပြစ်ရှိဟှူသူ ဖြစ်ဟှားဟှယ်။ ဖြားဖြစ်ကြောန့်နူးဆိုဟှာ နို့လေဟှာ အယ်လူအားဖြင့် ဘုရားသခင်ရှေ့မာ ဖြောန့်မတ်သူ ဖြစ်ဟှို့တွပ် ဖြစ်ဟှယ်။