Eastern Tamang Language Bible
व्हाइ 97
जम्मानथोरी शासन लबा परमेश्वर
परमप्रभुसे शासन लमुला, थेतबासेलमा जम्बुलिङरी मुबागदे जम्मान ताङ्गो,
समुद्रला गुङ्री मुबा गङ्गदे एनीगदे ताङ्गो,
थेला क्युर्नोन खसुदेन धोपधोप मुला,
थेसे जम्मादान सेम निबा तामदेन ठीक निसाफ लसी शासन लमुला।
थेला ङाच्छा ङाच्छा मेला बोन निमुला,
ओच्छे थेला क्युर्नोन मुबा शत्रुगदेदा नाश लमुला।
थे तिप्लीङ् खमा जम्बुलिङ य्हाल य्हाल तमुला,
चु म्राङ्सी जम्बुलिङ लोङ्सी फितफित धर्ला।
जम्बुलिङरी मुबा जम्मालान
परमप्रभु परमेश्वरला ओन्छाङ्री जम्मान गङ्गदे मैन ङ्युबा ह्रङ् लसी ङ्युला।
परमप्रभुसे लबा ज्यबा गेला बारेरी स्वर्गसे थेःना लमुला,
जम्मान म्हिगदेसे थेला घ्रेन शक्तिदा म्राङ्मुला।
मूर्तिदा तेन्बा जम्मान म्हिगदेदा पेःना लला,
मूर्तिगदेदा घ्रेन भिसी म्हन्बागदे जम्मान पेःला।
जम्मान लागदे परमप्रभुदा फ्या लउ।
परमप्रभु, ह्राङसे निसाफ लबासेलमा,
सियोनरी चिबा म्हिगदे ताङ्बा मुला,
ओच्छे यहूदाला सहरगदेरीनोन म्हिगदे ताङ्बा मुला।
तिग्दा भिसम परमप्रभु, ह्राङ जम्बुलिङ भन्दा ल्हानान घ्रेन हिन्ना,
ह्राङ जम्मान ला लु भन्दा ल्हानान घ्रेन हिन्ना।
परमप्रभुदा माया लबागदेसे नाइबा तामदा हेला लगै,
तिग्दा भिसम थेसे ह्राङदा तेन्बा म्हिगदेला प्राण जोगब लमुला,
ओच्छे नाइबा गे लबागदेला याग्याम थेनीगदेदा फेमुला।
परमेश्वरसे कुल्बा अन्छार भ्रबा म्हिगदेथोरी परमेश्वरला य्हाल खमुला,
ओच्छे सोझो सेम मुबागदेदा ताङ्ना लमुला।
परमप्रभुसे कुल्बा अन्छार भ्रबा म्हिगदे, परमप्रभुदेन छ्याम ताङ्गो,
ओच्छे थेला जम्मान भन्दा घ्रेन मिनरी जयजयकार लउ।
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.