Eastern Tamang Language Bible
व्हाइ 68
ढाबासेलमा य्हुल्साला लागिरी गोबा व्हाइ
संगीत- लोप्बा म्हिला लागिरी दाऊदला व्हाइ
परमेश्वर फेप्खमा थेला शत्रुगदे छरपष्ट तला,
ओच्छे थेदा हेला लबागदे ब्रेसी य्हार्ला।
थेनीगदेदा लाबासे म्युगुदा भोर्बा ह्रङ् लसीन भोर्ला,
मेला ङाम्री मैन ङ्युबा ह्रङ् लसी नाइबा गे लबा म्हिगदे परमेश्वरला ङाच्छा नाश तला।
तर परमेश्वरसे कुल्बा अन्छार भ्रबा म्हिगदे चा परमेश्वरला ङाच्छा ताङ्मुला,
थेनीगदे ताङ्बान व्हाइ गोमुला।
परमेश्वरला लागिरी व्हाइ गोउ, थेला मिन किन्सी जयजयकार लउ,
खसुरी धन्छ्यासी फेप्बाला लागिरी व्हाइ गिक गोउ,
थेला मिन चा परमप्रभु हिन्ना,
थेला ङाच्छापट्टि ताङ्गो।
चोखो ग्लारी धन्छ्याबा परमेश्वरसे
टुहुरा-टुहुरीगदेला वास्ता लमुला,
ओच्छे ह्रेम्बो सिबा म्रिङ्म्हेमेगदेदा जोगब लमुला।
थेसे खालै आरेबा म्हिला दिमनाम स्होसी पिन्मुला,
ओच्छे झ्याल्खानरी परब तबागदेदा तेःसी ताङ्ना लमुला,
तर थेदा बिरोध लबागदे चा तोङ्तोङ्बा ग्लारी चिला।
परमेश्वर, ह्राङला म्हिगदेला ङाच्छा ङाच्छा ह्राङ भ्रजी,
ओच्छे ह्राङसे थेनीगदेदा तोङ्तोङ्बा ग्लाग्याम भोर्जी, (सेला)
परमेश्वरला ङाच्छा, सीनै गङ्री फेप्खबा परमेश्वरला ङाच्छा,
परमेश्वरला ङाच्छा, इस्राएलला परमेश्वरला ङाच्छा,
जम्बुलिङ ल्हिग ल्हिग तजी,
ओच्छे मुग्याम नाम ताइजी।
परमेश्वर, ह्राङसे घ्रेन नाम पुइखजी,
सोङ्सोङ् खार्बा ह्राङला सदा दोःसी ङेम्ना लजी।
थेरी ह्राङला म्हिगदे चिबारी छ्याइजी,
परमेश्वर, ह्राङसे ह्राङदेन छ्याम मुबा ल्हानान स्हेग्याम प्राङ्बोगदेदा तोःबा जम्मान स्हे पिन्जी।
ढासी जिन्बा ताम परमप्रभुसे सुङ्जी,
ओच्छे थे ताम ल्हानान म्रिङ्म्हेमेगदेसे थेःना लजी।
“ग्लेगदे य्हार्जी, सिपाहीगदेएनोन य्हार्जी,”
दिमरी मुबा म्रिङ्म्हेमेगदेसे चा ब्यन्सी भबा स्हेगदे भो लमुला,
लडाइ तबा धुइरी एनीगदे न्हङ्ला कोइ कोइ चा ग्यु गोठे न्हङ्री चिसैनोन
म्हुइसे मोरब लबा ढुकुरला मूर्तिगदे,
थेला भ्याप म्हारसे मोरब लबा मुबा,
थेह्रङ्बा स्हेगदे ह्राङ ह्राङ न्हङ्री भो लजी।
जम्मान भन्दा घ्रेन परमेश्वरसे ग्लेगदेदा य्हुल्सा नाङ्नोन छरपष्ट तना लजी,
थे धुइरी सल्मोन गङ्री घ्लिङ् ताइबा ह्रङ्नोन तजी।
परमेश्वरला गङ् बाशान गादे घ्रेन मुला,
बाशान गङ् चा गङ्नोन गङ्से प्लिङ्बा मुला।
गङ्नोन गङ्से प्लिङ्बा गङ्,
तिग्दा परमेश्वर धन्छ्याबारी छ्याइबा गङ्दा डाह लबा?
थेरी परमप्रभु जुकजुकधोनान धन्छ्याला।
परमेश्वरला रथगदे हजारौँ हजार मुला,
परमप्रभु सीनै गङ्ग्याम ह्राङ धन्छ्याबा चोखो ग्लारी फेप्खबा मुला।
ह्राङ तोर फेप्जी,
ह्राङसे ह्राङला शत्रुगदेदाएनोन खीसी भोर्जी।
ह्राङसे म्हिगदेग्याम उपहार किन्जी,
ह्राङदा बिरोध लबा म्हिगदेग्यामएनोन किन्जी।
परमप्रभु परमेश्वर थेरी धन्छ्याला।
परमप्रभुला जयजयकार लउ,
थेसे धिनहुँनोन य्हाङला धोइ पुइमुला,
थेनोन परमेश्वरसे य्हाङदा थार्बा पिन्मुला। (सेला)
य्हाङला परमेश्वर य्हाङदा जोगब लबा परमेश्वर हिन्ना,
थे य्हाङदा सिबाग्याम सोना लबा परमप्रभु य्हाङला प्रभु हिन्ना।
पाङ्नोन तोःमा परमेश्वरसे ह्राङला शत्रुगदेला थोबो थिना लला,
थेनीगदे ह्राङला पापी बानीबेहोर अन्छार भ्रमुला।
परमप्रभुसे चुह्रङ् भिसी सुङ्बा मुला, “ङाइ थे शत्रुगदेदा बाशानग्याम भला,
ङाइ थेनीगदेदा समुद्रला धिहेन्सेनोन दोःसी भला।
चुह्रङ् लसी एनीगदेसे ह्राङला काङ शत्रुगदेला कासे ख्रुला,
एनीगदेला नगीसेनोन थे का ल्हेम्ला।”
परमेश्वर, ह्राङसे ढासी भ्रबा जम्मासेन म्राङ्बा मुला,
ङाला परमेश्वर जम्मान भन्दा घ्रेन ग्ले ढासी ह्राङ धन्छ्याबा चोखो ग्लापट्टि फेप्बान मुला।
ङाच्छा ङाच्छा व्हाइ गोबागदे,
लिच्छापट्टि बाजा ह्राप्बागदे,
गुङ्री खैँजडी ह्राप्बा म्रिङ्म्हेमेगदे,
चुह्रङ् भिसी पाङ्बान भ्रमुला,
“इस्राएलला म्हिगदेला गुङ्री परमप्रभुला जयजयकार लउ।
परमेश्वरला म्हिगदे ह्रुप तबा ग्लारी परमेश्वरला जयजयकार लउ।”
ङाच्छा जम्मान भन्दा जजा बेन्यामीनना वंश खला,
जमाहेन्से यहूदा वंशला गन्बागदे घ्रेन समूहरी खला,
थेला लिच्छा लिच्छा जबूलूनदेन नप्ताली वंशला गन्बागदे खला।
परमेश्वर, ह्राङसे ह्राङला शक्ति उन्बा मुला,
परमेश्वर ङाच्छा लबा ह्रङ्बान ह्राङला शक्ति ङन्दा उन्गो।
यरूशलेमरी मुबा ह्राङला मन्दिररी ग्लेगदेसे भेटी भला,
थे मन्दिरग्याम ह्राङसे ह्राङला शक्ति उन्गो।
थे माला गुङ्री मुबा ह्रि जन्तु ह्रङ्बा मिश्र य्हुल्सादा बङ्गो,
घ्लाबदेन म्हे बहरगदेला बथान ह्रङ्बा अर्गु य्हुल य्हुलदा बङ्गो,
सोझो तसी थेनीगदेसे ह्राङदा फ्या लसी म्हुइगदे भगै।
ओच्छे लडाइ लबारी म्हाइबागदेदा छरपष्ट तना लसी पिन्गो।
ग्लेब्लोनगदे मिश्र य्हुल्साग्याम उपहार भसी खला,
कूश वंशसेनोन परमेश्वरला लागिरी उपहार भसी खला।
जम्बुलिङरी मुबा य्हुल्सागदे, परमेश्वरला जयजयकार लउ,
परमप्रभुला जयजयकार लबा व्हाइ गोउ। (सेला)
ओन्माहेन्सेन मुरी भ्रबा परमप्रभुला जयजयकार लउ,
थेसे घ्रेन काइ तेःसी पाङ्बा ताम ङ्यन्गो।
परमेश्वरला शक्तिला बारेरी पाङ्गो,
इस्राएलथोरी थेला घ्रेन शक्ति मुला,
ओच्छे थेला शक्ति मुरीनोन मुला।
इस्राएलला परमेश्वर, ह्राङ धन्छ्याबा चोखो ग्लाग्याम फेप्खबा धुइरी थेदा खालैसे च्याबारी आखम।
परमेश्वरसे ह्राङला म्हिगदेदा शक्तिदेन भङ् पिन्ना।
परमेश्वरला जयजयकार लउ।
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.