Eastern Tamang Language Bible
व्हाइ 60
दुखग्याम फेबाला लागिरी लबा प्रार्थना
संगीत लोप्बा म्हिला लागिरी- अराम नहरेमदेन अराम जोबह दाऊददेन छ्याम लडाइ लबारी खजी। ओच्छे योआब लडाइग्याम दोःसी खमा १२,००० एदोमी सिपाहीगदेदाएनोन चजाला होपरी साइजी। थे धुइरी “कबुलला लिली म्हेन्दोला” राग अन्छार गोबा दाऊदला मिक्ताम
परमेश्वर, ह्राङसे ङन्दा ख्लाबा मुला,
ह्राङसे ङनी लाबा ग्ला फुप्सी पिन्बा मुला।
ह्राङ ङन्देन छ्याम बोमो खबा मुला,
तर दाहेन्से ङन्दा ङाच्छाला ह्रङ्बान ह्राङदा सेम निबा म्हि स्होसी पिन्गो!
ह्राङसे जम्बुलिङदा य्हाङय्होङ तना लबा मुला, ओच्छे ग्ला ग्लारी थिना लमुला,
थे थिबा ग्लागदेदा ल्हुसी पिन्गो,
तिग्दा भिसम थे दन्देधोनान य्होङ्बान मुला।
ह्राङसे ह्राङला म्हिगदेदा घ्रेन दुख नापुङ्बा मुला,
ह्राङसे ङन्दा ङ्य्होइबा स्हे पिन्बा मुला।
तर ह्राङदा तेन्बागदेदा म्यादलीग्याम जोगब लबाला लागिरी
ह्राङसे झण्डा गिक क्याबा मुला। (सेला)
ह्राङला शक्तिशाली छ्यासे ङन्दा ह्रो लसी जोगब लउ,1
ओच्छे ह्राङसे माया लबा म्हिगदेसे थार्बा याङ्गै।
परमेश्वरसे ह्राङ धन्छ्याबा चोखो ग्लाग्याम चुह्रङ् भिसी सुङ्बा मुला,
“ङाइ शकेम सहरदा ढासी भो भो लला,
ओच्छे सुक्कोत ब्याँसीदा दप्सी भो भो लला।
गिलाद ङाला हिन्ना, ओच्छे मनश्शेनोन ङालान हिन्ना।
एफ्राइम ङाला टोप हिन्ना,
यहूदा ङाला शासन लबा म्हारला कडी हिन्ना।
मोआब चा ङाला या ख्रुबा ताङ् हिन्ना, थे चा ङाला घ्याबा दोला,
एदोमएनोन ङालान हिन्ना भिसी उन्बारी ङाइ थेथोरी ङाला लखम भ्याङ्ला,
पलिश्तीगदेदा ढासी ङा घ्रेन काइ तेःसी क्रिङ्ला।”
खाल्छे ङादा क्युर्सीन पर्खाल लबा सहररी दोना लला?
खाल्छे ङादा एदोमरी दोना लला?
परमेश्वर, तिग ह्राङसे ङन्दा पक्कान ख्लाबा हिन्ना?
तिग दाहेन्से ह्राङ ङन्ना सिपाहीगदेदेन छ्याम आफेब?
शत्रुगदेदा बिरोध लबारी ङन्दा ह्रो लउ,
तिग्दा भिसम म्हिसे लबा ह्रो चा तिगै गेआखेल्बा तमुला।
परमेश्वरग्यामसेन य्हाङसे ढाला,
ओच्छे थेसेन य्हाङला शत्रुगदेदा ब्रेना लला।
Source notes (1)
- Cross-reference व्हाइ १०८:६-१३
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.