Eastern Tamang Language Bible
व्हाइ 50
परमेश्वर ठीक निसाफ लबा न्यायाधीश
आसापला व्हाइ
परमप्रभु जम्मान भन्दा घ्रेन परमेश्वरसे सुङ्बा मुला,
धिनी फेमाहेन्से धिनी घल्बाधोना थेसे जम्बुलिङ नाङ्लान म्हिगदेदा खउ भिसी ङ्योइबा मुला।
जम्मान भन्दा जेःबा ग्ला सियोन गङ्ग्याम
परमेश्वरला य्हाल खबा मुला।
य्हाङला परमेश्वर फेप्खमुला, थे फेप्खमा कुटिसी आफेप्ख।
थेला ङाच्छापट्टि नाश लबा मे मुला,
ओच्छे थेला क्युर्नोन घ्रेन लाबालुङ्सर मुला।
ह्राङला म्हिगदेला निसाफ लबा धुइरी
थेसे साक्षीला लागिरी मुदेन जम्बुलिङदा ङ्योइला।
ओच्छे थेसे चुह्रङ् भिसी सुङ्बा मुला,
“बलि लसी ङादेन छ्यामनोन कबुल लबा,
ङादा तेन्बा ङाला म्हिगदेदा ङा मुबा ग्लारी पोप लउ।”
थे तिगै दोष आरेबा परमेश्वर हिन्ना भिसी मुसे पाङ्बा मुला,
तिग्दा भिसम परमेश्वर ह्राङनोन न्यायाधीश हिन्ना। (सेला)
परमेश्वरसे चुह्रङ् भिसी सुङ्बा मुला, “ङाला म्हिगदे, ङ्यन्गो, ङाइ एदेन छ्याम ताम पाङ्ला,
इस्राएल, एसे लबा आज्यबा गेगदेला बारेरी ङाइ पाङ्ला।
ङा परमेश्वर एला परमेश्वर हिन्ना।
एसे लबा बलिगदेला लागिरी ङाइ एदा दोष आल,
एसे सदन मेरी ख्राङ्सी लबा बलिगदेला लागिरीनोन आहिन।
एला गोठेगदेला बहरगदे
अथवा एला खोरगदेला बोकोगदे ङादा आतोः।
तिग्दा भिसम ह्रिरी मुबा जम्मान जन्तुगदेदेन
गङ्री क्यार मुबा हजारौँ म्हेमुइगदे ङालान हिन्ना।
गङ्री क्यारला जम्मान चरागदेदा ङाइ ङोसेमुला,
ओच्छे सरी क्यारला सा मुबा जम्मान जन्तुगदे ङालान हिन्ना।
“ङा फोइथाननोन मुसै ङाइ एदा आपाङ्सेला मुबा,
तिग्दा भिसम जम्बुलिङरीदेन थेरी मुबा जम्मान स्हेगदे ङालान हिन्ना।
तिग ङाइ बहरगदेला स्या चमुला?
अथवा ङाइ बोकोगदेला का थुङ्मुला?
एसे परमेश्वरदा धन्यवादला बलि फुल्गो,
ओच्छे एसे जम्मान भन्दा घ्रेन परमेश्वरदेन छ्याम लबा कबुल पूरा लउ!
एदा दुख तमा ङादा पाङ्गो,
ङाइ एदा दुखग्याम फेला,
ओच्छे एसे ङाला जयजयकार लला।”
तर परमेश्वरसे नाइबा गे लबा म्हिगदेदा चुह्रङ् भिसी सुङ्मुला,
“ङाला ठिम पढब लबा एला अधिकार मुला?
ङाला कबुलला बारेरी ताम लबा एला तिग अधिकार मुला?
ङाइ लोप्बा तामदा एसे हेला लमुला,
ओच्छे ङाला बचनदा वास्ता आलमुला।
य्होदा स्याप्मा ए य्होलान ह्रो दोमुला,
ओच्छे ब्रेल्सी भ्रबा म्हिगदेदेन छ्याम एसे सङ्गत लमुला।
“एसे नाइबा ताम पाङ्बारी ह्राङला सुङ् चलब लमुला,
ओच्छे फट्टा ताम पाङ्बाला लागिरी एसे ले चलब लमुला।
एसे ह्राङला ज्योज्यो आलेला बिरोध लसी ताम पाङ्मुला,
ओच्छे एसे ह्राङलान ज्योज्यो आलेदा हेला लमुला।
एसे चु जम्मान गे लजी, तसैनोन ङा कुटिसी चिजी,
एसे ङादाएनोन ए ह्रङ्बान मुला भिसी म्हन्जी।
तर ङाइ एदा बङ्ला,
ओच्छे एलान ओन्छाङ्री एला दोष उन्ना।
“परमेश्वरदा म्लेःबागदे, चु ताम ज्यना लसी खेन्गो,
आहिन्सम ङाइ एदा टोगोल टोगोल लला,
ओच्छे एदा जोगब लबारी खालैनोन आत।
धन्यवादला बलि पिन्बासेन ङादा मान लमुला,
ओच्छे ङाइ कुल्बा ताम ङ्यन्बागदे जम्मादान ङाइ थार्ना लला।”
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.