Eastern Tamang Language Bible
व्हाइ 37:5
Verse 5 is marked below, with the whole chapter around it. Read from the start
ज्यबा गे लबादेन नाइबा गे लबा म्हिला ज्याला
दाऊदला व्हाइ
नाइबा गे लबा म्हिगदेला फलिफाप तबा म्राङ्सी सुर्दा आलउ,
नाइबा गे लबा म्हिगदेदेन छ्याम डाह आलउ।
तिग्दा भिसम थेनीगदे खार्सी निबा छे ह्रङ् लसीन म्हसी निला,
ओच्छे ह्रेसी निबा म्रा ह्रङ् लसीन थेनीगदे सिसी निला।
परमप्रभुथोरी भर लसी ज्यबा गे लउ।
ओच्छे ए य्हुल्सारी ज्यना लसी चिम्याङ्ला।
परमप्रभुदेन छ्याम ताङ्गो,
थेसे एला सेमला ताम पूरा लसी पिन्ना।
ह्राङसे ह्राङदान परमप्रभुला छ्यारी जिम्मा पिन्गो,
थेथोरी भर लउ, ओच्छे थेसे एदा ह्रो लला।
एसे लबा परमेश्वरदा सेम निबा गेदा परमेश्वरसे स्य्होला धिनी ह्रङ्बान स्होला,
ओच्छे एला बारेरी लबा ठीक निसाफ चा धिन गुङ्ला धिनी ह्रङ्बान स्होला।
परमप्रभुला ओन्छाङ्री जम्मान ताम नासी कुटिसी भ्रान्सी चिउ ओच्छे परमप्रभुदा गे लबारी पिन्गो,
म्हिसे आज्यबा जुक्तिग्याम आज्यबा गे लसी फलिफाप तबा म्राङ्मा,
एसे धन्दा सुर्दा आलउ।
बोमो, डाहदेन धन्दा सुर्दा आलउ,
थेसे आज्यबा गे लबा ग्यामरी जे दोना लमुला।
तिग्दा भिसम आज्यबा गे लबागदेदा नाश लला,
तर परमप्रभुथोरी भर लसी चिबागदेसे य्हुल्सारी शासन लला।
नाइबा गे लबा म्हिगदे योनान म्हसी निला,
एनीगदेसे थेनीगदेदा म्हाइसैनोन आस्याप।
सोझो म्हिगदेसे य्हुल्सारी अधिकार लला,
ओच्छे थेनीगदेदा शान्तिदेन फलिफाप तला।
नाइबा गे लबा म्हिसे परमेश्वरसे कुल्बा अन्छार भ्रबा म्हिदा बिरोध लसी जाल लमुला,
ओच्छे थेनीगदेसे परमेश्वरसे कुल्बा अन्छार भ्रबा म्हिदा म्राङ्सी स्वा क्रेमुला।
तर परमप्रभु नाइबा गे लबा म्हिगदे म्राङ्सी नेमुला,
तिग्दा भिसम थेनीगदे चा नाश तसी निला भिबा ताम परमप्रभुदा था मुला।
प्राङ्बोदेन दुख याङ्बा म्हिगदेदा साइबारी
ओच्छे सत्य ग्यामरी भ्रबा म्हिगदेदा नाश लबारी
नाइबा गे लबा म्हिगदेसे तरवारगदे तेःमुला।
ओच्छे म्यादलीसे रोप्बारी छ्याइमुला।
तर थेनीगदेला तरवारसे थेनीगदेदान भ्लोला,
ओच्छे थेनीगदेला म्यादली टागलटोगल निला।
नाइबा गे लबा ल्हानान म्हिगदेसे पोप लबा ल्हानान धन सम्पत्ति भन्दा
परमेश्वरसे कुल्बा अन्छार भ्रबा म्हिगदेसे पोप लबा जजाकी धन सम्पत्तिन ल्हानान ज्यबा स्हे हिन्ना।
तिग्दा भिसम परमप्रभुसे नाइबा गे लबा म्हिला भङ् म्हाना लला,
तर ह्राङसे कुल्बा अन्छार भ्रबा म्हिदा चा परमेश्वरसे जोगब लला।
परमप्रभुसे ह्राङसे कुल्बा ताम ङ्यन्बा म्हिगदेदा वास्ता लमुला,
ओच्छे य्हुल्सा सदन थेनीगदेला अधिकाररी तला।
आपत बिपत तबा धुइरी थेनीगदे पेआतोः,
ओच्छे अनिकाल तबा धुइरीनोन थेनीगदेदेन छ्याम जम्मान स्हे तला।
तर नाइबा गे लबा म्हिगदे चा नाश तला,
परमप्रभुला शत्रुगदे चा ह्रिरी छार्बा म्हेन्दोगदे ह्रङ् लसीन म्हसी निला,
ओच्छे थेनीगदे म्युगु ह्रङ् लसीन म्हसी निला।
नाइबा गे लबा म्हिसे छे किन्सीनोन आफामुला,
तर परमेश्वरसे कुल्बा अन्छार भ्रबा म्हिसे सेमहेन्से पिन्मुला।
परमप्रभुग्याम मोलम याङ्बागदेसे य्हुल्साथोरी अधिकार लला,
तर सराप याङ्बागदेदा चा य्हुल्साग्याम ताप्ला।
चुदे म्हि परमप्रभुदा सेम निबा ग्यामरी भ्रजी भिसम
परमप्रभुसे थेला काङ प्लाआपुङ्।
थेनीगदे ह्रिल्सैनोन ह्रिल्बाला ह्रिल्बान आत,
तिग्दा भिसम रेःबारी परमप्रभुसे थेनीगदेदा ह्रो लला।
ङा भ्योन मुबा, दाहेन्से ङा खेप्पा दोबा मुला,
तर परमेश्वरसे कुल्बा अन्छार भ्रबा म्हिदा परमप्रभुसे खाइमै म्लेःबा आरे
अथवा थेला कोलागदेसे ह्रीसी चतोःबा ङाइ खाइमै म्राङ्बा आरे।
परमेश्वरसे कुल्बा अन्छार भ्रबा म्हिसे सदन ज्यबा सेमसे पिन्मुला, ओच्छे ज्यबान सेमसे खी पिन्मुला,
थेला कोलागदेसे मोलम याङ्मुला।
आज्यबा गे ख्लासी ज्यबा गे लउ,
ओच्छे ए य्हुल्सारी सदन ताङ्सी चिम्याङ्ला।
तिग्दा भिसम ठीक निसाफ लबादा परमप्रभुसे माया लमुला
ओच्छे विश्वास लखम्बा ह्राङला म्हिदा थेसे आख्लामुला।
थेसे सदन थेनीगदेदा जोगब लमुला,
तर नाइबा गे लबा म्हिला सन्तान चा म्हसी निमुला।
परमेश्वरसे कुल्बा अन्छार भ्रबा म्हिसे य्हुल्सारी शासन लमुला,
ओच्छे थेरी सदन चिमुला।
परमेश्वरसे कुल्बा अन्छार भ्रबा म्हिसे ज्ञान बुद्धिला ताम लमुला,
ओच्छे थेसे ठीक ताम जे पाङ्मुला।
थेसे ह्राङला सेमरी परमेश्वरला ठिमदा थान्मुला,
थेला काङ खाइमै आप्लामुला।
नाइबा गे लबा म्हिगदेसे परमेश्वरसे कुल्बा अन्छार भ्रबा म्हिदा च्यासी चिमुला,
ओच्छे थेनीगदेदा साइबारी म्हाइमुला।
तर परमप्रभुसे थेदा शत्रुला यारी आख्ला,
ओच्छे मुद्दा तबा धुइरी थेदा दोष लआपुङ्।
एसे परमप्रभुथोरी आश लउ ओच्छे थेसे कुल्बा ताम ङ्यन्गो,
थेसे एदा मान लसी य्हुल्सारी शासन लबा अधिकार पिन्ना,
ओच्छे नाइबा गे लबा म्हिगदे नाश तबा एसे म्राङ्ला।
ङाइ नाइबा गे लबा म्हि गिकदा ङोसेमुबा,
थेसे अर्गुदा ल्हानान दुख पिन्मुबा,
लेबनान य्हुल्साला स्युक्पाला दोङ ह्रङ्बान थे जम्मान भन्दा घ्रेन दोबा मुबा।
तर लिच्छा ङा थेग्याम निमा थे थेरी आरेमुबा,
ङाइ थेदा म्हाइजी तर आस्याप्नी।
तिगै दोष आरेबा म्हिदा च्यागो,
ओच्छे सोझो सेम मुबा म्हिदा ज्यना लसी च्यागो,
तिग्दा भिसम जम्मानदेन छ्याम ढिक्सी चिबा म्हिला वंश खाइमै आम्ह।
तर पापीगदे चा नाश तसी निमुला,
ओच्छे थेला वंशला मिननोन म्हसी निला।
परमेश्वरसे कुल्बा अन्छार भ्रबा म्हिदा परमप्रभुसे जोगब लमुला,
ओच्छे दुखला धुइरी परमप्रभुसेन थेनीगदेदा जोगब लमुला।
परमप्रभुसे थेनीगदेदा ह्रो लसी जोगब लमुला,
ओच्छे नाइबा गे लबा म्हिगदेग्याम थेनीगदेदा फेमुला।
तिग्दा भिसम थेनीगदे परमप्रभु मुबा ग्लारी खमुला।
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.