Eastern Tamang Language Bible
व्हाइ 35
ह्रो याङ्बाला लागिरी प्रार्थना
दाऊदला व्हाइ
परमप्रभु, ङादा बिरोध लबागदेदा ह्राङसे बिरोध लसी पिन्गो,
ङादेन छ्याम छेबारी खबागदेदेन छ्याम ह्राङनोन छेगो।
कुरी पाता क्वान्सी ह्राङला ढाल थोगो,
ओच्छे ङादा ह्रो लबारी फेप्खउ।
ङादा ताप्बागदेला बिरोध लसी
ह्राङसे ह्राङला भालादेन हतियार थीगो।
ङादा जोगब लला भिसी ह्राङसे कबुल लउ।
ङाला ज्यान किन्बारी म्हाइबागदे
ह्राङनोन ब्रेसी हेला नातोःगै!
ङादा जाल लबा म्हिगदे ग्याप दोःसी य्हार्तोःगै
ओच्छे थेनीगदे अलमल तगै!
थेनीगदे लाबासे भोर्बा पोलवा ह्रङ्बान तगै,
ओच्छे परमप्रभुला दूतसे थेनीगदेदा ताप्गै!
थेनीगदे भ्रबा ग्याम धोपधोपदेन प्लाबा तगै,
ओच्छे परमप्रभुला दूतसे थेनीगदेदा ताप्बाला ताप्बान लगै।
ङाला ज्यान किन्बारी थेनीगदेसे घ्रेन व्हाङ गिक ख्वजी,
ओच्छे ङाला तिगै दोष आरेसै थेनीगदेसे ङादा फसब लबारी वा झुजी।
थेनीगदेसे था याङ्बा भन्दा ङाच्छान थेनीगदे नाश तगै,
थेनीगदेसे झुबा वारी थेनीगदे ह्राङनोन परब तगै
ओच्छे थेनीगदेसे ख्वबा व्हाङ्री थेनीगदेन परब तगै!
परमप्रभुसे लमा ङा सेमहेन्सेन ताङ्ला,
ओच्छे थेसे ङादा जोगब लबासेलमा ङा ल्हानान ताङ्ला।
ङाइ ङाला सेमहेन्सेन परमप्रभुदा चुह्रङ् भिसी पाङ्ला,
“ह्राङ ह्रङ्बा अर्गु खालै आरे,
ह्राङसे कमजोरगदेदा बङ्बा म्हिग्याम जोगब लमुला,
ओच्छे दुख याङ्बा म्हिदेन प्राङ्बोदा दुख पिन्बागदेग्याम जोगब लमुला।”
नाइबा गे लबा म्हिगदेसे ङादा बिरोध लसी फट्टा ताम पाङ्मुला।
ङादा थानोन आरेबा पापला दोष लमुला।
थेनीगदेसे ङादा ज्यबा लतोःबा ग्लारी आज्यबा लमुला,
ओच्छे ङाला सेमरी ल्हानान दुख तमुला।
तर थेनीगदे आखम्बा धुइरी दुख म्हन्सी ङाइ कान आचनी,
ओच्छे ङाइ कू तसी प्रार्थना लजी।
ङाइ ङाला ह्रोदेन आलेला लागिरी दुख म्हन्बा ह्रङ् लसी दुख म्हन्जी,
ओच्छे ङाइ ङाला आमाला लागिरी दुख म्हन्सी भ्रबा ह्रङ् लसी दुख म्हन्सी प्रार्थना लजी।
तर ङा दुखरी परब तबा धुइरी थेनीगदे ताङ्मुबा
ओच्छे ङादा खिसी लबाला लागिरी ङाला क्युरनोन पोप तमुबा,
ङोआसेबा म्हिगदेसे ङादा तोबाला तोबान लमुबा।
पापीदा ह्रङ् लसी थेनीगदेसे ङादा शत्रुदा ह्रङ्बा व्यवहार लजी,
थेनीगदेसे ङादा च्यासी स्वा क्रेजी।
परमप्रभु, खाइमाधोना ह्राङ चुह्रङ् लसी स्हीसी जे स्य्हूबा?
ह्राङसे ङादा थेनीगदेग्याम जोगब लसी पिन्गो,
चु सिंहगदे ह्रङ्बा म्हिगदेग्याम ङाला ज्यान जोगब लसी पिन्गो।
जमाहेन्से ह्राङला म्हिगदेला गुङ्ग्याम ङाइ ह्राङदा धन्यवाद पिन्ना,
ल्हानान म्हिगदेला गुङ्री ङाइ ह्राङला जयजयकार लजी।
ङा ब्रेबा धुइरी फट्टा ताम पाङ्बा ङाला शत्रुगदे ताङ्आम्याङ्गै,
ओह्रङ्नोन ङादा बिरोध लबागदेसे
सुर्दा तबा धुइरी ङादा खिसी लआम्याङ्गै।
थेनीगदेसे ज्यना लसी ताम आपाङ्मुला,
ढिक्सी चिबा म्हिगदेला बारेरी थेनीगदेसे ल्हानान थरीला फट्टा तामगदे पाङ्मुला।
थेनीगदेसे ङादा क्रिङ्बान दोष लमुला,
“एसे तिग लबा मुला थे ङन्से म्राङ्बा मुला।”
तर परमप्रभु ह्राङसे चु ताम म्राङ्बा मुला।
थेतबासेलमा प्रभु, ह्राङ कुटिसी धन्आछ्यागो,
ह्राङ ङाग्याम थारेङ् आफेप्गो!
प्रभु ह्राङ फेप्खउ, ओच्छे ङादा जोगब लउ,
ङाला परमेश्वर, ङाला लागिरी ताम लसी पिन्गो।
परमप्रभु, ह्राङ तिगै दोष आरेबा परमेश्वर हिन्ना,
ङाला तिगै दोष आरे भिसी निसाफ लसी पिन्गो,
ङाला शत्रुगदेसे ङादा खिसी लआम्याङ्गै।
थेनीगदेसे ह्राङ ह्राङ न्हङ्री चुह्रङ् भिसी पाङ्आम्याङ्गै,
“य्हाङसे थेदा ताप्बा मुला!
दाहेन्से य्हाङला सेमसे म्हन्बा ह्रङ् तबा मुला!”
ङादा दुख तबा धुइरी ताङ्बागदे ब्रेगै,
थेनीगदे अलमल तगै।
“ए भन्दा ज्यबा मुला” भिसी भ्रबागदे चा
पेःबादेन बेइज्जत नासी भ्रतोःगै।
ङाला तिगै दोष आस्याप्गै भिसी म्हन्बागदे ताङ्सी क्रिङ्गै
ओच्छे घरीघरी चुह्रङ् भिसी पाङ्म्याङ्गै,
“परमप्रभु गादे घ्रेन मुला!
ह्राङला म्हिसे ढामा ह्राङ ताङ्मुला।”
जमाहेन्से ङाइ ह्राङसे लबा ठीक निसाफला बारेरी स्य्हान्दोदा पाङ्ला,
ओच्छे धिन गिक ह्राङला जयजयकार लला।
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.