Eastern Tamang Language Bible
व्हाइ 31
दुखला धुइरी परमेश्वरथोरी भर लसी लबा प्रार्थना
संगीत लोप्बा म्हिला लागिरी- दाऊदला व्हाइ
परमप्रभु! ङा ह्राङ मुबा ग्लारी खबा मुला,
ङादा खाइमै ब्रेना आलउ!
ह्राङ ठीक निसाफ लबा परमेश्वर हिन्ना,
ङाइ प्रार्थना लला, ङादा जोगब लसी पिन्गो!
ङाला बिन्ती सान्सी ङादा दन्देन जोगब लसी पिन्गो।
ह्राङ ङा लाबाला लागिरी पहरा दोसी ङादा सोना लउ!
ओच्छे ढाल ह्रङ्बान दोसी ङादा जोगब लसी पिन्गो।
ह्राङ ङाइ भर लबा पहरादेन ङादा जोगब लबा कोङ्बा ग्ला हिन्ना,
ह्राङला कबुल अन्छार ङादा ग्याम उन्सी थोगो।
ङादा झुबा वाग्याम ङादा जोगब लसी पिन्गो,
ओच्छे ङादा आपत विपतग्याम जोगब लसी पिन्गो।
ङाइ ङाला आत्मा ह्राङला छ्यारी थान्ना।
परमप्रभु, ह्राङसे ङादा जोगब लला,
ह्राङ विश्वास लखम्बा परमेश्वर हिन्ना।
लुसीला ला लुगदे तेन्बा म्हिगदेदा ङाइ हेला लमुला,
ओच्छे ङाइ ह्राङथोरी भर लमुला।
ह्राङला खाइमै आजिन्बा मायासे लमा ङा ल्हानान ताङ्बा मुला,
तिग्दा भिसम ङाथोरी खबा आपत विपत ह्राङसे म्राङ्बा मुला,
ओच्छे ङाला सेमला दुख ह्राङदा था मुला।
ह्राङसे ङादा शत्रुगदेला यारी परब तना लबा आरे,
ङादा जुन ग्लारी निबा सेम मुला, थेरी ह्राङसे ङादा ढुक्क तसी भ्रपुङ्बा मुला।
परमप्रभु! ङादा दया लउ,
तिग्दा भिसम ङा घ्रेन दुखरी मुला,
ङा क्रामा क्रामा ङाला मीनोन कमजोर तसी जिन्बा मुला,
ङाला सेम सिसी जिन्बा मुला ओच्छे ल्हुइ कमजोर तबा मुला।
दुखसेलमा ङा ब्लप्सी जिन्बा मुला,
क्राबासेलमा ङाला आयु तुन्बा मुला,
ङाला दुखसे ङादा कमजोर तना लबा मुला,
ओच्छे ङाला नख्रुगदेएनोन कमजोर तसी निबान मुला।
ङाला जम्मान शत्रुगदेदेन ङाला खिम्जेमगदेसे ङादा हेला लमुला,
ङादा ङोसेबागदे ङादेन छ्याम लोङ्मुला,
ओच्छे ग्यामरी ङादा म्राङ्सी थेनीगदे य्हार्मुला।
सिबा म्हिदा ह्रङ् ङादा जम्मासेन म्लेःसी जिन्बा मुला,
ङा चा थिबा ताङ् ह्रङ्बान तबा मुला।
ल्हानान शत्रुगदेसे ङाला बिरोध लसी ह्राङ ह्राङ न्हङ्री ताम लबा ङाइ थेःबा मुला,
खानङ्दामन च्यासै लोङ्बा खबा ताम जे मुला।
ङाला बिरोध लबारी थेनीगदे गिक तबा मुला,
ओच्छे जाल लसी ङादा साइबाला लागिरी जुक्ति लबान मुला।
तर परमप्रभु, ङाइ ह्राङथोरी भर लबा मुला,
“ह्राङनोन ङाला परमेश्वर हिन्ना” भिसी ङाइ पाङ्ला।
ङाला चु जुनी ह्राङलान छ्यारी मुला,
ङाला शत्रुगदेदेन ङादा दुख पिन्बागदेग्याम जोगब लसी पिन्गो।
दया लसी ह्राङसे ह्राङला गे लबा म्हिदा स्हीगो,
ह्राङला खाइमै आजिन्बा मायासे ङादा जोगब लउ।
परमप्रभु, ङाइ ह्राङदा बिन्ती लला,
ङाला बेइज्जत तआपुङ्गो।
नाइबा गे लबा म्हिगदेला बेइज्जत तगै,
कुटिसी थेनीगदे सिबा म्हिगदे चिबा ग्लारी निगै।
थेनीगदेला फट्टा ताम पाङ्बा सुङ् बन्द लसी पिन्गो,
तिग्दा भिसम थेनीगदेसे ह्राङसे कुल्बा अन्छार भ्रबा म्हिगदेदा बिरोध लबान घ्रेन दोसी ताम पाङ्मुला।
ह्राङदा मान लबागदेला लागिरी ह्राङसे जुन स्हे तयार लबा मुला,
थे स्हे गादे उदेकला मुला!
ह्राङ ल्हानान दया लबा परमेश्वर हिन्ना,
ह्राङ मुबा ग्लारी खबागदेदा ह्राङसे जोगब लसी दुखग्याम फेमुला भिबा ताम जम्मादान था मुला।
ह्राङसे थेनीगदेदा म्हिगदेला जालग्याम जोगब लसी ज्यना लसी थान्मुला।
शत्रुगदेसे लबा बेइज्जतग्याम ह्राङसे थेनीगदेदा जोगब लसी ह्राङला दिमरी ज्यना लसी थान्मुला।
परमप्रभुला जयजयकार लउ!
ङादा शत्रुगदेसे क्युर्सी साइबारी छ्याइबा धुइरी
परमप्रभुसे ङादा ह्राङला खाइमै आजिन्बा माया उन्जी।
ङा लोङ्बा धुइरी ङाइ चुह्रङ् भिसी पाङ्जी, “ह्राङ मुबा ग्लाग्याम ङा थारेङ् तजी,”
तर ङादा ह्रो लउ भिसी ङाइ ह्राङदा बिन्ती लमा ह्राङसे ङाला बिन्ती सान्जी।
परमप्रभुदा विश्वास लबा म्हिगदे, एनीगदेसे परमप्रभुदा माया लउ।
परमप्रभुसे ह्राङदा विश्वास लबागदेदा जोगब लमुला,
तर घमण्ड लबागदेदा थेनीगदेसे याङ्तोःबा सजाय पिन्मुला।
परमप्रभुथोरी भर लबागदे जम्मान,
कोङ्सी चिउ ओच्छे आँट थोगो।
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.