Eastern Tamang Language Bible
व्हाइ 3
ह्रो याङ्बाला लागिरी स्य्होला प्रार्थना
ह्राङला झा अब्शालोमसे ताप्बा धुइरी दाऊदसे गोबा व्हाइ
परमप्रभु! ङाला शत्रुगदे गादे ल्हाना मुला,
ङादा बिरोध लबा म्हिगदे गादे ल्हाना मुला!
ङाला बारेरी ल्हानासेन चुह्रङ् भिसी पाङ्बान मुला,
“परमेश्वरसे थेदा ह्रो आल” (सेला1)।
तर परमप्रभु! ह्राङ ङादा जोगब लबा ढाल हिन्ना,
ङादा मान याङ्बा म्हि स्होबा ह्राङनोन हिन्ना,
ङाला ली ठाडो लसी पिन्बा ह्राङनोन हिन्ना।
ङाइ घ्रेन काइ तेःसी परमप्रभुदा बिन्ती लबा मुला,
ओच्छे ङादा थेसे ह्राङला चोखो गङ् सियोनग्याम जोहाब पिन्मुला। (सेला)
ङा स्योन तमुला, ओच्छे छुप निमुला, ङा दोःसी छोर्मुला।
तिग्दा भिसम ङादा परमप्रभुसे जोगब लमुला।
ङादा बिरोध लसी हजारौँ हजार शत्रुगदेसे क्युर्सैनोन ङा आलोङ्।
परमप्रभु, फेप्खउ! ङाला परमेश्वर, ङादा जोगब लउ!
ङाला जम्मान शत्रुगदेला ग्राम्बारी छेक्गो।
ओच्छे नाइबा गे लबागदेला स्वा क्युइना लसी पिन्गो।
जम्मान शत्रुग्याम फेबा परमप्रभुन हिन्ना,
ओच्छे ह्राङला मोलम ह्राङला म्हिगदेथोरी तगै! (सेला)।
Source notes (1)
- Footnote सेला भिबा चा व्हाइ गोबान लमा छिन्नङ् सा न्हउ भिबा हिन्ना।
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.