Eastern Tamang Language Bible
व्हाइ 18
दाऊद ग्लेसे ढाबाला व्हाइ गोबा
संगीत लोप्बा म्हिला लागिरी- शत्रुगदेदेन शाऊलला याग्याम जोगब तबासेलमा दाऊदसे गोबा व्हाइ
२ शमू २२:१-५१
परमप्रभु, ङाइ ह्राङदा गादे ल्हाना माया लबा मुला!
ह्राङ ङादा जोगब लबा परमेश्वर हिन्ना।
परमप्रभु ह्राङ ङाइ भर लबा पहरादेन ङादा जोगब लबा कोङ्बा ग्ला हिन्ना,
थे ङादा थार्बा पिन्बा परमेश्वर हिन्ना।
ङाला परमेश्वर ङाइ भर लबा पहरा हिन्ना, थे मुबा ग्लारी निमा ङा सदन जोगब तमुला।
थे ङादा जोगब लबा ङाला ढाल हिन्ना,
थे ङादा थार्बा पिन्बा शक्तिशाली परमेश्वर हिन्ना,
थे ङादा जोगब लबा कोङ्बा ग्ला हिन्ना।
ङाइ परमप्रभुदा बिन्ती लमुला,
थे चा जयजयकार लनोन तोःबा परमप्रभु हिन्ना।
थेसे ङादा ङाला शत्रुगदेग्याम जोगब लमुला।
लोङ्बा खबा कालसे ङादा क्युर्सी थान्बा मुबा,
नाश लबा छालगदे ङाथोरी खबा मुबा।
लोङ्बा खबा काल ङाला क्युर्नोन मुबा,
वासे ह्रङ् लसी ङादा कालसे भ्रान्सी चिबा मुबा।
दुखला धुइरी ङाइ परमप्रभुदेन छ्याम बिन्ती लजी,
ङाइ ह्रो याङ्बाला लागिरी परमेश्वरदा ङ्योइजी।
थेसे ह्राङला मन्दिररी ङाला काइ थेःजी,
ङाइ ह्रो याङ्बाला लागिरी लबा बिन्ती थेसे सान्जी।
थे धुइरी जम्बुलिङ ल्हिकल्हिक तजी, ओच्छे सङ्गुल निजी,
गङ्ला जगगदे य्हाङय्होङ तजी,
तिग्दा भिसम परमेश्वर बोमो खबा मुबा।
थेला नाग्याम म्युगु थोन्जी,
ओच्छे थेला सुङग्याम नाश लबा मे ल्हामदेन लुङ्सी वाप्वाप तबा मे भुप्रो थोन्जी।
थे मु क्लेसी मार फाप्जी,
थे म्लाङ्म्लाङ्बा खसुथोरी धन्छ्यासी फेप्खजी।
थे करूबगदेथोरी धन्छ्यासी फ्याङ्जी,
थे लाबाला तोडरी तोरतोर फ्याङ्जी।
परमप्रभुसे धोपधोपदा ह्राङला गा स्होजी,
नामसे प्लिङ्सी म्लाङ्म्लाङ् तबा रूङ्बा खसुदा परमप्रभुसे ह्राङ धन्छ्याबा ग्ला स्होजी।
थेला ओन्छाङ्री तिप्लीङ् खजी,
तिप्लीङ्से म्लाङ्गै खसुदा क्लेबान सेर्बादेन मेला बोन ताइजी।
परमप्रभु स्वर्गग्याम घ्रेन काइरी क्रिङ्जी,
ओच्छे जम्मान भन्दा घ्रेन परमेश्वरला काइ जम्मान ग्लारी थेःजी।
थेसे म्यादलीसे रोप्सी ह्राङला शत्रुगदेदा छरपष्ट तना लजी
ओच्छे थेसे तिप्लीङ् पुइखबासेलमा थेनीगदे आत्यब तजी।
परमप्रभु, ह्राङसे ह्राङला शत्रुगदेदा बङ्जी
ओच्छे बोमोला झोकरी थेनीगदेदा क्रिङ्जी।
जमाहेन्से समुद्रला दिदेन जम्बुलिङला जगगदे म्राङ्जी।
परमप्रभु स्वर्गग्याम मार फाप्खसी ङादा थीजी
ओच्छे नुप्बा समुद्रग्याम ङादा तेःजी।
थेसे ङादा ङाला शक्तिशाली शत्रुगदेग्याम जोगब लजी।
ओच्छे हेला लबागदेग्याम ङादा फेजी।
थेनीगदे ङा भन्दा ल्हानान शक्तिशाली मुबा।
ङा दुखरी मुबा धुइरी थेनीगदेसे ङाथोरी या झाङ्जी,
तर परमप्रभुसे ङादा जोगब लजी।
थेसे ङादा ह्रो लसी घ्रेन आपत विपतग्याम तेःसी ज्यबा ग्लारी भोर्जी,
थेसे ङादा जोगब लजी,
तिग्दा भिसम थे ङादेन छ्याम ताङ्बा मुबा।
परमप्रभुसे ङादा इनाम पिन्ना,
तिग्दा भिसम जुन ताम ठीक मुला थे ताम जे ङाइ लबा मुला,
थेसे ङादा मोलम पिन्ना, तिग्दा भिसम ङाला तिगै दोष आरे।
ङा परमप्रभुला ठिम अन्छार भ्रबा मुला,
ङाइ ङाला परमेश्वरग्याम य्हार्सी नाइबा गे लबा आरे।
ङाइ थेला जम्मान ठिम ङ्यन्बा मुला,
थेसे कुल्बा ताम आङ्यन्ना ङा भ्रबा आरे।
थेला ओन्छाङ्री ङा तिगै दोष आरेबा म्हि मुबा,
ओच्छे जम्मान आज्यबा गेग्याम ङा जोगब तसी चिबा मुला।
थेतबासेलमा थेसे ङादा इनाम पिन्ना,
तिग्दा भिसम जुन ताम ठीक मुला थे ताम जे ङाइ लबा मुला,
ओच्छे ङाला तिगै दोष आरे भिबा तामएनोन थेसे था याङ्मुला।
परमप्रभु! ह्राङ सोझो तसी विश्वासरी चिबागदेदेन छ्याम ह्राङएनोन विश्वासरी स्य्हुमुला,
जुन म्हिगदेला तिगै दोष आरे, थेनीगदेदा ह्राङसे पूरन दया लमुला।
चोखो सेम मुबा म्हिदेन छ्याम ह्राङएनोन चोखोन तमुला,
तर बिरोध लबागदेदा ह्राङसेनोन बिरोध लमुला।
सोझो म्हिगदेदा ह्राङसे जोगब लमुला,
तर ङा ह्रङ्बा खालै आरे भिसी भ्रबा म्हिगदेदा ह्राङसे मार ताइना लमुला।
परमप्रभु! ह्राङसे ङाला नाङ्सल लुङ्ना लसी थान्बा मुला,
ङाला परमेश्वरसे ङादा धोपधोपग्याम फेसी य्हाल पिन्मुला।
ङाला शत्रुगदेदेन छ्याम छेबाला लागिरी ह्राङसे ङादा भङ् पिन्मुला,
ओच्छे थेनीगदेदा ढाबाला लागिरी पर्खाल वाइसी निबारी ह्राङसेन ङादा भङ् पिन्मुला।
परमेश्वरला चु गे गादे चोखो मुला,
परमप्रभुला बचन सत्य मुला!
थे मुबा ग्लारी खबागदेला लागिरी थे जोगब लबा ढाल हिन्ना।
परमप्रभु बाहेक अर्गु परमेश्वर खला मुला?
य्हाङसे भर लखम्बा पहरा य्हाङला परमेश्वर बाहेक अर्गु खाला मुला?
थेनोन परमेश्वरसे ङादा शक्तिशाली स्होबा मुला,
ओच्छे ङाला ग्याम ज्यबा स्होमुला।
थेसे ङाला काङ तङ्गीला ह्रङ्बान ठीक ठीक ग्लारी न्हेखम्बा स्होबा मुला,
ओच्छे ङादा नोबा ग्लारी राप्बारी खम्बा स्होबा मुला।
थेसे ङादा लडाइ लबारी लोप्बा मुला,
थेतबासेलमा ङाइ जम्मान भन्दा घ्रेन म्यादली चलब लबारी सेमुला।
परमप्रभु! ह्राङसे ङादा ढाना लबाला लागिरी ङादा ह्राङला ढाल पिन्बा मुला,
ओच्छे ह्राङसे ङादा ह्राङला दाहिने छ्यासे ह्रो लबा मुला।
ह्राङसे वास्ता लबासेलमा ङा घ्रेन म्हि दोबा मुला,
ङा भ्रबाला लागिरी ह्राङसे घ्रेन ग्याम स्होमुला,
ङाला काङ खाइमै आप्ला।
ङाइ शत्रुगदेदा ताप्बान चुङ्जी,
थेनीगदेदा नाश आलदेधोना ङा दोःसी आखनी।
ङाइ थेनीगदेदा रेःनोन आखम्बाधोना तोजी,
थेनीगदे ङाला ङाच्छापट्टि ह्रिल्जी।
ह्राङसे ङादा लडाइ लबाला लागिरी शक्तिशाली स्होजी,
ह्राङसे ङाला शत्रुगदेदा ङाला काङ धिरी तना लजी।
ह्राङसे ङाला शत्रुगदेदा ब्रेसी य्हार्बाधोना तना लजी,
ओच्छे ङादा बिरोध लबागदेदा ङाइ नाश लजी।
ङन्दा ह्रो लउ भिसी थेनीगदे क्रिङ्जी,
तर थेनीगदेदा जोगब लबा खालै आरेमुबा।
थेनीगदेसे परमप्रभुदेन छ्यामएनोन बिन्ती लजी,
तर परमप्रभुसे थेनीगदेदा जोहाब आपिन्नी।
ङाइ थेनीगदेदा छ्याकछिक निना लबा मुबा,
ओच्छे थेनीगदे लाबासे भोर्बा धुलु ह्रङ्नोन तबा मुबा।
ङाइ थेनीगदेदा ग्यामला हिलोदा ह्रङ् लसी नाङ्बा मुबा।
ङादा नाश लबारी म्हाइबा म्हिगदेग्याम ह्राङसे ङादा जोगब लबा मुला,
ओच्छे ह्राङसे ङादा य्हुल य्हुलथोरी शासन लबा म्हि स्होबा मुला,
ङाइ ङोआसेबा म्हिगदेएनोन ङाला तहरी मुला।
ङाइ कुल्मैछ्याम थेनीगदेसे ङ्यन्मुला,
ओच्छे विदेशीगदेसे ङाला ङाच्छा ह्राङला थोबो कू लसी ङादा मान लमुला।
विदेशीगदे लोङ्सी तिगै लबारी आखम्मुला,
थेनीगदे लोङ्सी फितफित धर्बान ह्राङ चिबा ग्लाग्याम थोन्मुला।
परमप्रभु छोन्बो परमेश्वर हिन्ना! ङाइ भर लबा पहरा ङाला परमेश्वरला जयजयकार तगै!
ङादा जोगब लबा परमेश्वरदा ल्हानान मान तगै।
परमेश्वरसे ङादा ङाला शत्रुगदेथोरी ढाना लमुला,
परमेश्वरसेन य्हुल य्हुल्ला म्हिगदेदा ङाला तहरी थान्मुला।
परमप्रभुसे ङादा ङाला शत्रुगदेग्याम जोगब लमुला।
ह्राङसे ङादा ङाला शत्रुगदेथोरी ढाना लजी,
ओच्छे ङादा साइबारी म्हाइबा म्हिगदेग्याम ह्राङसे ङादा जोगब लजी।
थेतबासेलमा य्हुल य्हुल्ला म्हिगदेला गुङ्री ङाइ ह्राङला जयजयकार लला,
ओच्छे ह्राङला जयजयकार लबान व्हाइ गोला।
परमप्रभुसे ह्राङला ग्लेदा ढाना लमुला,
ओच्छे थेसे ह्राङसे धम्बा दाऊद ग्लेदेन
थेला वंशदा खाइमै आजिन्बा माया लमुला।
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.