Eastern Tamang Language Bible
व्हाइ 147:3
Verse 3 is marked below, with the whole chapter around it. Read from the start
जम्मान भन्दा घ्रेन परमेश्वरला जयजयकार
परमप्रभुला जयजयकार लउ!
व्हाइ गोबान य्हाङला परमेश्वरला जयजयकार लबा चा गादे ज्यबा ताम हिन्ना।
परमेश्वरला जयजयकार लबा चा गादे ज्यबादेन ताङ्बा ताम हिन्ना।
परमप्रभुसे यरूशलेम सहरदा स्होबान मुला,
परमेश्वरसे अर्गु य्हुल्साला म्हिगदेला तहरी मुबागदेदा दोःसी भबान मुला।
थेसे सेम स्हु खबागदेला सेम खम्ना लमुला,
ओच्छे थेनीगदेला पोररी मान फोर्सी खीसी पिन्मुला।
परमप्रभुसे मुरी सारगदे गादे थान्बा भिसी पक्का लबा मुला,
ओच्छे थे सारगदे गिक गिकला मिन थान्बा मुला।
य्हाङला परमप्रभु जम्मान भन्दा घ्रेन परमेश्वर हिन्ना,
थे शक्तिशालीदेन जम्मान ताम था याङ्बा परमेश्वर हिन्ना।
परमप्रभुसे सोझो म्हिगदेदा तोर थीमुला,
तर नाइबा गे लबा म्हिगदेदा थेसे सरी भ्याङ्मुला।
व्हाइ गोबान परमप्रभुला जयजयकार लउ,
वीणा ह्राप्बान य्हाङला परमेश्वरला जयजयकार लउ।
थेसे मुरी खसु पुइखमुला,
ओच्छे जम्बुलिङरी नाम पुइखमुला,
गङ्गदेरी छे फुइना लमुला।
थेसे फोख्रेन्बा जन्तुगदेदा चबा स्हे पिन्मुला,
ओच्छे कावाला कोलागदेदा चबा स्हे पिन्मुला।
थे भङ्बा तागदे म्राङ्सी
ओच्छे भङ्बा सिपाहीगदे म्राङ्सीनोन आताङ्मुला।
तर थेदा मान लबागदेदेन छ्याम
ओच्छे थेला खाइमै आजिन्बा मायाथोरी भर लबागदेदेन छ्याम ताङ्मुला।
यरूशलेम, परमप्रभुला जयजयकार लउ!
सियोन, एला परमेश्वरला जयजयकार लउ!
तिग्दा भिसम थेसे एला सहरला म्रापगदे ज्यबादेन कोङ्बा स्होला,
ओच्छे एदेन छ्याम चिबा म्हिगदेदा थेसे मोलम पिन्ना।
थेसे एला साँध जोगब लला,
ओच्छे एदा जम्मान भन्दा ज्यबा ग्वा पिन्सी म्रेन्ना लला।
थेसे जम्बुलिङदा कुल्ला,
कुल्मैछ्याम जम्बुलिङसे थेला ताम ङ्यन्मुला।
थेसे ऊन ह्रङ् लसी घ्लिङ् ताइना लला,
ओच्छे मेफ्रा ह्रङ्नोन लसी भमा ठाम्सी पिन्ना।
थेसे गिट्टी ह्रङ्नोन सेर्बा पुइखला,
थेसे पुइखबा ग्योङ्ना लबा लाबा खाल्से ताखम्ला?
थेसे ह्राङला बचन पुइखमुला ओच्छे थे जम्मादान ङ्युना लमुला,
थेसे लाबा पुइखमुला ओच्छे घ्लिङ् ङ्युसी क्युइ बगब तमुला।
थेसे ह्राङला म्हिदा बचन पिन्मुला,
ओच्छे इस्राएलदा ह्राङला ठिमदेन अर्ती पिन्मुला।
थेसे अर्गु खजिबै य्हुल्ला म्हिगदेला लागिरी चुह्रङ्बा गे लबा आरे,
थेनीगदेदा थेला ठिमगदेला बारेरी था आरे।
परमप्रभुला जयजयकार लउ!
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.