Eastern Tamang Language Bible
व्हाइ 136
धन्यवादला व्हाइ
परमप्रभुदा धन्यवाद फुल्गो,
तिग्दा भिसम थे दया लबा परमप्रभु हिन्ना,
थेला खाइमै आजिन्बा माया जुकजुकधोनान चिमुला।
जम्मान ला लुगदे भन्दा घ्रेन परमेश्वरदा धन्यवाद फुल्गो,
थेला खाइमै आजिन्बा माया जुकजुकधोनान चिमुला।
प्रभुगदेलाएनोन परमप्रभुदा धन्यवाद फुल्गो,
थेला खाइमै आजिन्बा माया जुकजुकधोनान चिमुला।
परमप्रभुदा धन्यवाद फुल्गो, थेसे जे उदेकला गेगदे लमुला,
थेला खाइमै आजिन्बा माया जुकजुकधोनान चिमुला।
ह्राङला ज्ञान बुद्धिग्याम स्वर्ग स्होबा परमप्रभुदा धन्यवाद फुल्गो,
थेला खाइमै आजिन्बा माया जुकजुकधोनान चिमुला।
घ्रेन समुद्रथोरी जम्बुलिङ छ्याना लबा परमप्रभुदा धन्यवाद फुल्गो,
थेला खाइमै आजिन्बा माया जुकजुकधोनान चिमुला।
धिनीदेन लनी स्होबा परमप्रभुदा धन्यवाद फुल्गो,
थेला खाइमै आजिन्बा माया जुकजुकधोनान चिमुला।
धिनीदा धिनथोरी शासन लबाला लागिरी स्होबा परमप्रभुदा धन्यवाद फुल्गो,
थेला खाइमै आजिन्बा माया जुकजुकधोनान चिमुला।
म्हुनथोरी शासन लबाला लागिरी लनीदेन सार स्होबा परमप्रभुदा धन्यवाद फुल्गो,
थेला खाइमै आजिन्बा माया जुकजुकधोनान चिमुला।
मिश्रीगदेला थेबा झागदे साइबा परमप्रभुदा धन्यवाद फुल्गो,
थेला खाइमै आजिन्बा माया जुकजुकधोनान चिमुला।
इस्राएलीगदेदा मिश्र य्हुल्साग्याम तेःसी भबा परमप्रभुदा धन्यवाद फुल्गो,
थेला खाइमै आजिन्बा माया जुकजुकधोनान चिमुला।
ह्राङला शक्तिशाली छ्यासे चुङ्सी थेनीगदेदा थेग्याम तेःसी भबा परमप्रभुदा धन्यवाद फुल्गो,
थेला खाइमै आजिन्बा माया जुकजुकधोनान चिमुला।
वाला समुद्रदा गुङ्री फ्याक लसी भो न्ही स्होबा परमप्रभुदा धन्यवाद फुल्गो,
थेला खाइमै आजिन्बा माया जुकजुकधोनान चिमुला।
ह्राङला म्हिगदेदा समुद्रला गुङ्ग्याम क्याम्सङ् भोर्बा परमप्रभुदा धन्यवाद फुल्गो,
थेला खाइमै आजिन्बा माया जुकजुकधोनान चिमुला।
फारो ग्लेदेन थेला सिपाहीगदेदा वाला समुद्ररी बगब तना लबा परमप्रभुदा धन्यवाद फुल्गो,
थेला खाइमै आजिन्बा माया जुकजुकधोनान चिमुला।
ह्राङला म्हिगदेदा तोङ्तोङ्बा ग्लाला गुङ्ग्याम भोर्बा परमप्रभुदा धन्यवाद फुल्गो,
थेला खाइमै आजिन्बा माया जुकजुकधोनान चिमुला।
घ्रेन घ्रेन ग्लेगदेदा साइबा परमप्रभुदा धन्यवाद फुल्गो,
थेला खाइमै आजिन्बा माया जुकजुकधोनान चिमुला।
शक्तिशाली ग्लेगदेदा साइबा परमप्रभुदा धन्यवाद फुल्गो,
थेला खाइमै आजिन्बा माया जुकजुकधोनान चिमुला।
एमोरीगदेला ग्ले सीहोनदा साइबा परमप्रभुदा धन्यवाद फुल्गो,
थेला खाइमै आजिन्बा माया जुकजुकधोनान चिमुला।
बाशान य्हुल्साला ग्ले ओगदा साइबा परमप्रभुदा धन्यवाद फुल्गो,
थेला खाइमै आजिन्बा माया जुकजुकधोनान चिमुला।
थेनीगदेला य्हुल्सा ह्राङला म्हिगदेदा पिन्बा परमप्रभुदा धन्यवाद फुल्गो,
थेला खाइमै आजिन्बा माया जुकजुकधोनान चिमुला।
थेला य्हुल्सा ह्राङला गे लबा म्हि इस्राएलीगदेदा पिन्बा परमप्रभुदा धन्यवाद फुल्गो,
थेला खाइमै आजिन्बा माया जुकजुकधोनान चिमुला।
य्हाङ तिगै गेआखेल्बा म्हि दोबा धुइरीनोन य्हाङदा आम्लेःबा परमप्रभुदा धन्यवाद फुल्गो,
थेला खाइमै आजिन्बा माया जुकजुकधोनान चिमुला।
य्हाङदा य्हाङला शत्रुगदेग्याम जोगब लबा परमप्रभुदा धन्यवाद फुल्गो,
थेला खाइमै आजिन्बा माया जुकजुकधोनान चिमुला।
सा मुबा जम्मान जन्तुगदेदा चबा स्हे पिन्बा परमप्रभुदा धन्यवाद फुल्गो,
थेला खाइमै आजिन्बा माया जुकजुकधोनान चिमुला।
स्वर्गरी धन्छ्याबा परमेश्वरदा धन्यवाद फुल्गो,
तिग्दा भिसम थेला खाइमै आजिन्बा माया जुकजुकधोनान चिमुला।
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.