Eastern Tamang Language Bible
व्हाइ 112
परमप्रभुदा तेन्बा म्हिसे याङ्बा सुख
परमप्रभुला जयजयकार लउ।
जुन म्हिसे परमप्रभुदा मान लमुला,
थेसे कुल्बा अन्छार ताङ्सी ताङ्सी भ्रमुला,
थेसे परमप्रभुग्याम मोलम याङ्मुला।
य्हुल्सारी थेला वंश शक्तिशाली तला,
सोझो म्हिगदेला सन्तानसे मोलम याङ्ला।
थेला दिमला म्हिगदेदेन छ्याम धन सम्पत्ति तला,
ओच्छे थेसे लबा ज्यबा गे सदन म्हिगदेसे ढन्ना।
सोझो म्हिगदेला लागिरी
ओच्छे दयामाया लबा, वास्ता लबादेन
परमेश्वरसे कुल्बा अन्छार भ्रबा म्हिगदेला लागिरी धोपधोपरीनोन य्हाल य्हाल तला।
ज्यबा सेमसे छे पिन्बादेन,
खालैला ली आच्याना गे लबा म्हिदा ज्यबा तमुला।
परमेश्वरसे कुल्बा अन्छार भ्रबा म्हि खाइमै य्हाङय्होङ आतमुला,
थेदा म्हिगदेसे सदन ढन्मुला।
आज्यबा समाचार थेःसी थे खाइमै आलोङ्मुला,
परमप्रभुथोरी भर लसी थे कोङ्सी चिमुला।
थेदा लोङ्बा डोबादेन धन्दा सुर्दासे तिगै आत।
थेसे ह्राङला शत्रुगदे ब्रेबा म्राङ्ला।
थेसे प्राङ्बोदा ज्यबा सेमसे पिन्मुला।
थेतबासेलमा थेसे लबा ज्यबा गे म्हिगदेसे सदन ढन्मुला।
थे शक्तिशाली तला ओच्छे थेसे मान याङ्ला।
चु म्राङ्सी नाइबा गे लबा म्हिगदेदा बोमो रेःला,
थेनीगदेसे बोमोसे स्वा क्रेला ओच्छे नाश तला।
ओच्छे थेनीगदेला आशएनोन म्हसी निला।
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.