Eastern Tamang Language Bible
व्हाइ 107:1
Verse 1 is marked below, with the whole chapter around it. Read from the start
भो ङ्हा (१०७-१५०)
परमेश्वरला दयाला लागिरी जयजयकार लबा
परमप्रभुदा धन्यवाद फुल्गो,
तिग्दा भिसम थे दया लबा परमप्रभु हिन्ना1,
थेला खाइमै आजिन्बा माया जुकजुकधोनान चिमुला।
एनीगदे जुन जुनदा परमप्रभुसे जोगब लबा मुला,
ओच्छे सय फासी एनीगदेदा शत्रुगदेला याग्याम फेबा मुला,
एनीगदेसे परमप्रभुदा धन्यवाद फुल्गो।
ओच्छे परमप्रभुसे स्यार, लो, न्हुप, झ्याङदेन
य्हुल्सा य्हुल्साग्याम दोःसी ग्ला गिकरीन भबा म्हिगदे,
एनीगदेसे परमप्रभुदा धन्यवाद फुल्गो।
एनीगदे न्हङ्ला कोइ कोइ चा ग्याम ङोआसेना तोङ्तोङ्बा ग्लारीक्यार कोल्सी भ्रजी,
ओच्छे चिबाला लागिरी एनीगदेसे खजिबै सहररी निबा ग्याम आस्याप्नी।
ख्रेन्बा फुइबासेलमा कमजोर तसी
सिला ह्रङ्नोन तबा मुबा।
जमाहेन्से थेनीगदेसे दुखला धुइरी क्राबान परमप्रभुदेन छ्याम बिन्ती लजी,
ओच्छे परमप्रभुसे थेनीगदेदा जम्मान दुखग्याम फेजी।
परमप्रभुसे थेनीगदेदा सोझो ग्यामसे भोर्जी,
ओच्छे चिबाला लागिरी थेनीगदेदा सहर गिकरी दोना लजी।
थेनीगदेसे परमप्रभुला खाइमै आजिन्बा मायाला लागिरी,
ओच्छे म्हिगदेला लागिरी परमप्रभुसे लबा उदेकला गेला लागिरी परमप्रभुदा धन्यवाद फुल्गै।
परमप्रभुसे क्युइ फुइबागदेला फुइबा म्हाना लमुला,
ओच्छे फोख्रेन्बागदेदा ज्यबा स्हे पिन्सी म्रेन्ना लमुला।
गादे म्हि धोपधोपरी सेम सिसी चिमुबा,
च्याल्दासे खीसी झ्याल्खानरी थान्बा म्हिसे ह्रङ् लसी थेनीगदेसे दुख नासी चिबा मुबा।
तिग्दा भिसम थेनीगदेसे परमेश्वरसे कुल्बा तामदा बिरोध लमुबा,
ओच्छे जम्मान भन्दा घ्रेन परमप्रभुसे पिन्बा सल्लाहदा वास्ता आलमुबा।
थेतबासेलमा परमप्रभुसे थेनीगदेदा दुख लसी गे लपुङ्सी सोझो तना लजी।
थेनीगदे ब्लप्सी सरी ह्रिल्मुबा,
तर थेनीगदेदा ह्रो लबा म्हि खालैनोन आरेमुबा।
जमाहेन्से थेनीगदेसे दुखला धुइरी परमप्रभुदा बिन्ती लजी।
ओच्छे परमप्रभुसे थेनीगदेदा जम्मान दुखग्याम फेजी।
परमप्रभुसे थेनीगदेदा लोङ्बा खबा धोपधोप्बा ग्लाग्याम तेःजी।
ओच्छे थेनीगदेदा खीबा च्याल्दा टागलटोगल लसी पिन्जी।
परमप्रभुला खाइमै आजिन्बा मायाला लागिरी,
ओच्छे थेनीगदेला लागिरी परमप्रभुसे लबा उदेकला गेगदेला लागिरी धन्यवाद फुल्गै।
तिग्दा भिसम परमप्रभुसे काँसला मूल म्रापगदे छ्याकछिक लसी पिन्मुला,
ओच्छे फाइला किलिङ्गदे टागलटोगल लमुला।
थेनीगदे न्हङ्ला कोइ कोइ म्हिगदे चा बिरोध लबा ह्राङलान बानीबेहोरसेलमान मूर्ख दोजी।
ओच्छे ह्राङलान नाइबा बानीबेहोरसेलमान दुखरी परब तजी।
थेनीगदेदा खजिबै खाल्ला चबा स्हे चइ आम्हन्बा तजी,
ओच्छे थेनीगदे सिबारीन छ्याइजी।
जमाहेन्से थेनीगदेसे ह्राङला दुखरी परमप्रभुदा बिन्ती लजी,
ओच्छे परमप्रभुसे थेनीगदेदा जम्मान दुखग्याम फेजी।
परमप्रभुसे ह्राङला शक्तिशाली बचनग्याम खम्ना लजी,
ओच्छे थेनीगदेदा कालग्याम फेजी।
परमप्रभुला खाइमै आजिन्बा मायाला लागिरी,
ओच्छे थेनीगदेला लागिरी परमप्रभुसे लबा उदेकला गेगदेला लागिरी धन्यवाद फुल्गै।
थेनीगदेसे बलि फुल्सी परमेश्वरदा धन्यवाद फुल्गै,
ओच्छे ताङ्सी ताङ्सी व्हाइ गोबान परमेश्वरसे लबा जम्मान गेगदेला बारेरी पाङ्तोःला।
थेनीगदे न्हङ्ला कोइ कोइ म्हि चा घ्रेन समुद्ररी पानी जहाज क्रेसी निजी।
थेनीगदे समुद्रग्याम व्यापार लबा म्हि मुबा।
थेनीगदेसे परमेश्वरसे लबा उदेकला गेगदे म्राङ्जी।
थेनीगदेसे समुद्रला नुप्बा ग्लारी परमप्रभुसे लबा उदेकला गेगदे म्राङ्जी।
परमप्रभुसे कुल्मा घ्रेन लाबालुङ्सर खजी
ओच्छे छाल रेःजी।
ओच्छे थेनीगदेला पानी जहाजदा छालसे तोर तोर ल्हीजी,
ओच्छे दोःसी समुद्ररीन ताइजी,
थेह्रङ्बा दुखला धुइरी थेनीगदेला सेमनोन सिजी।
थेनीगदे ङ्य्होइबा म्हि ह्रङ् लसीन तोर य्होङ मार य्होङ तबा मुबा,
ओच्छे थेनीगदेसे तिगैनोन लआखम्नी।
जमाहेन्से थेनीगदेसे ह्राङला दुखरी परमप्रभुदा बिन्ती लजी,
ओच्छे परमप्रभुसे थेनीगदेदा जम्मान दुखग्याम फेजी।
परमप्रभुसे घ्रेन लाबालुङ्सरदा बन्द लजी,
ओच्छे समुद्रला छालगदेएनोन म्हजी।
समुद्रला छाल म्हबासेलमा थेनीगदे ताङ्जी,
ओच्छे थेनीगदे निबारी म्हाइबा ग्लारी परमप्रभुसे थेनीगदेदा ज्यना लसी दोना लजी।
परमप्रभुला खाइमै आजिन्बा मायाला लागिरी,
ओच्छे थेनीगदेला लागिरी परमप्रभुसे लबा उदेकला गेगदेला लागिरी धन्यवाद फुल्गै।
थेनीगदेसे म्हिगदेला गुङ्री परमप्रभुला बारेरी पाङ्तोःला,
ओच्छे यहूदी गन्बागदेसे ह्रुप तबा दिमरी परमप्रभुला जयजयकार लगै।
परमप्रभुसे स्योङ्गदेदा ङार्ना लजी,
ओच्छे क्युइला मूलगदेदा सोङ्सोङ् खर्बा ग्ला दोना लजी।
थेरी चिबा म्हिगदेसे लबा नाइबा गेसे लमा
परमप्रभुसे ज्यबा सदा तिगै आरोबा चजान चजाला ग्ला दोना लजी।
तर परमप्रभुसे तोङ्तोङ्बा ग्लागदेदा घ्योइ दोना लजी,
ओच्छे सोङ्सोङ् खर्बा ग्लादा स्योङ् दोना लजी।
परमप्रभुसे फोख्रेन्बा म्हिगदेदा थेरी चिबा ग्ला पिन्जी।
ओच्छे थेनीगदेदा थेनीगदे चिबाला लागिरी सहर गिक स्होपुङ्जी।
थेनीगदेदा भु व्हारारी ब्लु ढ्वपुङ्जी, ओच्छे अङ्गुर सूपुङ्जी।
ओच्छे ज्यबा ज्यबा अन्नगदे ल्हानान रोजी।
परमप्रभुसे थेनीगदेदा मोलम पिन्जी,
ओच्छे थेनीगदेला सन्तान नार्बङ् ल्हेबा ह्रङ्नोन ल्हेसी निजी।
ओच्छे थेनीगदेला म्हेमुइएनोन घटब तआपुङ्नी।
थेनीगदेदा अर्गुसे नाङ्बाझ्याक्बा लबादेन आपत विपत ओच्छे दुख तबासेलमा
थेनीगदे घटब तबान निजी, ओच्छे थेनीगदेसे बेइज्जत नातोःजी।
जमाहेन्से थेनीगदेदा दुख पिन्बागदेदा परमप्रभुसे बेइज्जत तना लजी।
ओच्छे थेनीगदेदा तिगै आरेबा तोङ्तोङ्बा ग्लारी तोर छ्योङ् मार छ्योङ् तसी भ्रपुङ्जी।
तर खाँचो तबागदेदा परमप्रभुसे आपत विपतग्याम फेजी।
ओच्छे थेनीगदेला म्हेमेगदेदा ग्युला बथानगदे ह्रङ्नोन बढब तना लजी।
चु म्राङ्सी सोझो सेम मुबा म्हिगदे ताङ्मुला।
तर नाइबा गे लबा जम्मान म्हिगदेदा तामनोन पाङ्आखम्बा तना लमुला।
बुद्धि मुबा म्हिगदेसे चु तामरी सेम लगै,
ओच्छे परमप्रभुला खाइमै आजिन्बा मायादा सेमरी थान्गै।
Source notes (1)
- Cross-reference १ काइ १६:३४; २ काइ ५:१३; ७:३; एज्रा ३:११; व्हाइ १००:५; १०६:१; ११८:१; १३६:१; यर्मि ३३:११
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.