Eastern Tamang Language Bible
व्हाइ 103
परमेश्वरला माया
दाऊदला व्हाइ
ङाला प्राण, परमप्रभुला जयजयकार लउ,
ङाला आत्मा, थेला चोखो मिन किन्सी जयजयकार लउ!
ङाला प्राण, परमप्रभुला जयजयकार लउ,
ओच्छे थेसे लबा जम्मान गेगदे आम्लेःगो!
थेसे एला जम्मान पाप माफ लमुला,
ओच्छे एदा जम्मान रोगग्याम खम्ना लमुला।
थेसे एदा कालग्याम फेमुला,
ओच्छे एदा खाइमै आजिन्बा मायादेन दयाला मुकुट कूसी पिन्मुला।
थेसे ङाला ल्हुइ जम्मान भन्दा ज्यबा स्हेसे प्लिङ्ना लमुला,
ओच्छे एला भङ् क्वाक्लिङ्ला ह्रङ्नोन दोःसी छार दोला।
स्य्हान्दोसे नाङ्बाझ्याक्बा लसी थान्बागदे जम्मालान परमप्रभुसे ठीक निसाफ लसी पिन्मुला,
ओच्छे थेनीगदेसे याङ्तोःबा हक पिन्मुला।
परमप्रभुसे मोशादा ह्राङला ग्याम उन्जी,
ओच्छे इस्राएलीगदेदा ह्राङला शक्तिशाली गेगदे उन्जी।
परमप्रभु दया लबादेन, माया लबा,
योना बोमो आखबादेन खाइमै आजिन्बा मायासे प्लिङ्बा परमेश्वर हिन्ना।
परमप्रभुसे सदन दोष लबाला लबान आलमुला,
ओच्छे सदन बोमोएनोन आलमुला।
थेसे य्हाङदेन छ्याम य्हाङसे लबा पाप अन्छारला व्यवहार आलमुला,
ओच्छे य्हाङदा य्हाङसे लबा पापदेन नाइबा गे अन्छारला सजाय आपिन्मुला।
तिग्दा भिसम सदेन मु गादे नोबा मुला,
परमप्रभुसे होत्तेन ह्राङदा मान लबागदेदा खाइमै आजिन्बा माया लबा मुला।
स्यारग्याम न्हुप गादे थारेङ् मुला,
परमप्रभुसे य्हाङला पापगदेदा होत्तेन थारेङ् तना लबा मुला।
आबासे ह्राङला कोलागदेदा गादे माया लमुला,
परमप्रभुसे ह्राङदा मान लबागदेदा होत्तेन माया लमुला।
तिग्दा भिसम य्हाङदा खाह्रङ् लसी स्होजी भिबा ताम परमप्रभुदा था मुला,
य्हाङ साप्रा जे हिन्ना भिबा तामएनोन थेदा था मुला।
म्हिला आयु चा छे ह्रङ्बान मुला,
थे ह्रिरी सार्बा म्हेन्दो ह्रङ् सार्मुला।
लाबा थे म्हेन्दो थोग्याम निमुला,
ओच्छे थे म्हेन्दो म्हसी निमुला,
जमाहेन्से थेदा थे ग्लासेनोन आढन्मुला।
तर परमप्रभुदा तेन्बागदे थोरीदेन थेनीगदेला झा झामे
ओच्छे छायाछुया थोरी परमप्रभुला खाइमै आजिन्बा मायादेन सत्य ताम जुकजुकहेन्से जुकजुकधोना तला,
जुन जुन म्हिसे परमप्रभुसे लबा कबुल सेमहेन्सेन ङ्यन्मुला,
ओच्छे थेसे कुल्बा अन्छार भ्रमुला थेनीगदेथोरी थेला सत्य तामदेन खाइमै आजिन्बा माया तमुला।
परमप्रभुसे ह्राङला ठि स्वर्गरी स्होबा मुला,
ओच्छे थेसे ह्राङला शक्तिग्याम जम्मानथोरी शासन लमुला।
परमप्रभुला स्वर्गदूतगदे,
परमप्रभुला बचन अन्छार गे लबा शक्तिशाली म्हिगदे,
परमप्रभुला जयजयकार लउ।
स्वर्गला जम्मान सिपाहीगदे,
थेसे म्हन्बा अन्छार गे लबा म्हिगदे,
परमप्रभुला जयजयकार लउ।
परमप्रभुसे स्होबा जम्मान स्हेगदे,
परमप्रभुला य्हुल्सा नाङ्नोन चिबागदे,
परमप्रभुला जयजयकार लउ।
ङाला प्राण, परमप्रभुला जयजयकार लउ।
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.