Eastern Tamang Language Bible
बुद्धि 11
आढिक्बा उमाल चलब लबादा परमप्रभुसे हेला लमुला,
तर ज्यना लसी क्योइबा म्राङ्सी परमप्रभु ताङ्मुला।
घमण्ड लमाहेन्से बेइज्जतएनोन तमुला,
तर सोझो म्हिसे बुद्धि याङ्मुला।
ठीक गेसेन सोझो म्हिगदेदा ग्याम उन्मुला,
तर धोका पिन्बा म्हिगदे चा ह्राङसेन लबा फट्टा तामग्याम नाश तमुला।
बोमोला धिनरी धन सम्पत्तिसे तिगै लआखम,
तर ठीक गेसे कालग्याम जोगब लला।
तिगै दोष आरेबा म्हिगदेसे लबा ठीक गेसे थेनीगदेला ग्याम सोझो तला,
तर नाइबा गे लबागदे ह्राङला नाइबा गेसे लमा थेनीगदे जम्मान भन्दा मार तला।
सोझो म्हिगदेदा थेनीगदेसेन लबा ठीक गेसे जोगब लमुला,
तर विश्वास आलबा म्हिगदे आज्यबा तामरी लोभ लबासेलमा दुखरी परब तला।
नाइबा गे लबा म्हि सिमाहेन्से थेसे लबा आशएनोन म्हसी निमुला,
थेसे ह्राङला भङरी म्हाइबा जम्मान तामगदे तिगै गेआखेल्बा तमुला।
परमेश्वरसे कुल्बा अन्छार भ्रबा म्हिदा दुखग्याम जोगब लमुला,
ओच्छे थेला साटोरी नाइबा गे लबा म्हिथोरी थे दुख परब तमुला।
परमेश्वरदा आतेन्बा म्हिगदेला सुङ्से ह्राङलान खिम्जेमदा न्होङ्ना लमुला,
तर परमेश्वरसे कुल्बा अन्छार भ्रबा म्हिदा ज्ञानसे जोगब लमुला।
परमेश्वरसे कुल्बा अन्छार भ्रबा म्हिला फलिफाप तमा सहर नाङ्लान म्हिगदे ताङ्मुला,
ओच्छे नाइबा गे लबा म्हि सिमा जम्मान ताङ्मुला।
परमेश्वरसे कुल्बा अन्छार भ्रबा म्हिसे पिन्बा मोलमसे सहरदा फलिफाप तमुला,
तर नाइबा गे लबा म्हिगदेला सुङ्से सहरदा न्होङ्ना लमुला।
घोखम्बा शक्ति आरेबा म्हिसे ह्राङला खिम्जेमदा खिसी लमुला,
तर घोबा म्हिसे ह्राङला लेरी लगाम कार्मुला।
खालैदा पाङ्बारी आतबा ताम तामगन लसी भ्रबा म्हिदा पाङ्जी भिसम थेसे धोका पिन्मुला,
तर विश्वास लखम्बा म्हिसे थे ताम ह्राङलान सेमरी थान्मुला।
ग्याम उन्बा म्हि आरेमा य्हुल्सान नाश तला,
तर सल्लाह पिन्बा म्हि ल्हानान तबासेलमा पक्का ढाला।
स्य्हान्दो म्हिगदेला जमानी चिबासे नोक्सान पुइनोन तोःला,
तर स्य्हान्दोला गेरी या आझाङ्बा म्हि चा जोगब तला।
शीलस्वभाव मुबा म्रिङ्म्हेमेसे मान याङ्मुला,
तर दया आरेबा म्हिसे धन सम्पत्ति जे स्होमुला।
दया लबा म्हिदा ज्यबा तमुला,
तर दया आरेबा म्हिसे चा ह्राङसे ह्राङदान दुख तना लमुला।
नाइबा गे लबा म्हिसे ठगब लबाला ज्याला याङ्ला,
तर जुन म्हिसे ठीक गे लला, थेसे याङ्तोःबा इनाम याङ्ला।
सेमहेन्से ठीक गे लबा म्हिसे जुनी याङ्मुला,
तर नाइबा गे लबा म्हिला लिच्छा भ्रबा म्हि सिमुला।
नाइबा सेम थोबा म्हिदा परमप्रभुसे हेला लमुला,
तर तिगै दोष आरेबा बानीबेहोर थोसी भ्रबा म्हि म्राङ्सी परमप्रभु ताङ्मुला।
चु ताम पक्का हिन्ना, नाइबा गे लबा म्हिगदे सजाय आयाङ्ना स्योरआम्याङ्,
तर परमेश्वरसे कुल्बा अन्छार भ्रबा म्हिगदे जोगब तला।
ज्ञान आरेबा जेःबा म्रिङ्म्हेमे चा
ढ्वाला नारी म्हारला नत्था क्वान्बा ह्रङ्बान हिन्ना।
परमेश्वरसे कुल्बा अन्छार भ्रबा म्हिसे म्हन्बा ताम चा ज्यबान ताम दोसी थुम्मुला,
तर नाइबा गे लबा म्हिसे लबा आश चा बोमोरी दोसी थुम्मुला।
कोइ कोइ म्हिसे ज्यबा सेमसे पिन्मुला, तसैनोन थे झन फ्युक्पोन तमुला,
स्य्हान्दोसे चा पिन्बारी खम्सैनोन आपिन्मुला, तसैनोन प्राङ्बो तमुला।
ज्यबा सेम थोबा म्हिदा फलिफाप तमुला,
स्य्हान्दोदा आँट पिन्बा म्हि ह्राङसेनोन छार आँट याङ्मुला।
अन्न छुम्सी सोसी थान्बादा म्हिगदेसे केःमुला,
तर ज्यबा सेमसे अन्न चूङ्बा म्हि चा मोलमसे प्लिङ्मुला।
जुन म्हिसे ज्यबा लबारी म्हाइमुला, थेसे मान याङ्ला,
तर नाइबा गे लबारी म्हाइबा म्हिथोरी नाइबान ताम खमुला।
जुन म्हिसे ह्राङला धन सम्पत्तिथोरी भर लला, थे नाश तला,
तर परमेश्वरसे कुल्बा अन्छार भ्रबा म्हि चा पिङ्पिङ्बा भा ह्रङ्नोन ज्यबा तसी निला।
ह्राङला सन्तानदा दुख तना लबा म्हिला या थान्थान तला,
ओच्छे मूर्ख म्हि चा बुद्धि मुबा म्हिला घ्याबा दोःला।
परमप्रभुसे म्हन्बा अन्छार भ्रबा म्हि चा जुनी पिन्बा दोङ हिन्ना,
ओच्छे जुन म्हिसे म्हिगदेदा जोगब लला, थे म्हि चा बुद्धि मुबा म्हि हिन्ना।
चुदे परमेश्वरसे कुल्बा अन्छार भ्रबा म्हिगदेसे जम्बुलिङरी ह्राङसे लबा गेला इनाम याङ्मुला भिसम,
परमेश्वरदा आतेन्बादेन पापीगदेसे झन गादे ल्हाना सजाय याङ्ला?
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.