Eastern Tamang Language Bible
मत्ती 18
परमेश्वरला य्हुल्सारी खाला घ्रेन तला
मर्कू ९:३३-३७,४२-४८; लूका ९:४६-४८; १७:१-२
थे धुइरी चेलागदे येशू मुबा ग्लारी खसी “स्वर्गला य्हुल्सारी जम्मान भन्दा घ्रेन खाला तला?” भिसी ङ्योइमा,1 येशूसे कोला गिकदा ङ्योइजी। ओच्छे थेनीगदेला गुङ्री राप्पुङ्सी चुह्रङ् भिसी सुङ्बारी छ्याइजी, “च्यागो, एनीगदेसे ङाला ताम ङ्यन्गो, एनीगदेसे ह्राङ ह्राङला सेम पोसी चु कोलागदे ह्रङ्बा आतनी भिसम खाइमै स्वर्गला य्हुल्सारी वाङ्आम्याङ्।2 जुन म्हि चु कोला ह्रङ्बान सोझो तला, थेनोन स्वर्गला य्हुल्सारी जम्मान भन्दा घ्रेन तला। जुन म्हिसे चुह्रङ्बा कोलादा ङाला मिनरी वास्ता लला, थेसे ङादाएनोन वास्ता लला।
“तर खालै म्हिसे ङादा विश्वास लबा चु कोलागदेदा पाप लपुङ्बा भन्दा मि बरू थे म्हिदा खारेरी ह्रान्दा च्योसी समुद्ररी भ्याङ्बान थेला लागिरी ज्यबा तला। थेह्रङ् लसम थेसे परमेश्वरग्याम खबा घ्रेन सजाय नाआतोः। चु जम्बुलिङरी म्हिगदेदा पाप लपुङ्बा स्हेगदे मुला। थेतबासेलमा चु जम्बुलिङला म्हिगदेसे परमेश्वरग्याम सजाय याङ्ला। पाप लपुङ्बा स्हेगदे मि मुनोन मुला, तसैनोन जुन म्हिसे स्य्हान्दोदा पाप लपुङ्ला थे परमेश्वरग्याम सजाय याङ्बा म्हि हिन्ना।
“एला यादेन काङ्री खजिबासे चा एदा पाप लपुङ्ला थे थासी भ्याङ्गो। तिग्दा भिसम या काङ मुसी खाइमै आसिबा मेरी निबा भन्दा मि बरू ठुडे तसी जुकजुकधोनाला जुनी याङ्बा चा एला लागिरी ज्यबा तला। 3 एला मीसे एदा पाप लपुङ्जी भिसम तेःसी भ्याङ्गो। तिग्दा भिसम मी न्हीनोन मुसी नर्गरी खाइमै आसिबा मेरी निबा भन्दा मि बरू काना तसी जुकजुकधोनाला जुनी याङ्बा चा एदा ज्यबा तला।4
म्हाबा ग्युला उखान
लूका १५:३-७
“च्यागो, एनीगदेसे चु कोलागदे न्हङ्री खालैदान हेला आलउ। तिग्दा भिसम चु कोलागदेदा च्याबा स्वर्गदूतगदे स्वर्गरी धन्छ्याबा ङाला आबादेन छ्याम सदन तला। थेतबासेलमा एनीगदे होशियार तसी चिउ। 5 तिग्दा भिसम परमेश्वरसे पुइखबा म्हि म्हाबागदेदा म्हाइबारीदेन थार्बा पिन्बारी खबा हिन्ना।6
“च्यागो, खालै म्हिला ग्यार्जा गिक ग्यु न्हङ्री गिक म्हाजी भिसम थेसे तिग लला? तिग थेसे बोगल ब्लिसे च्युक कू ग्युदा गङ्रीन ख्लासी म्हाबा ग्यु म्हाइबारी आनि? च्यागो, एनीगदेसे ङाला ताम ङ्यन्गो, चुदे थे म्हिसे म्हाबा ग्यु स्याप्जी भिसम थे आम्हबा बोगल ब्लिसे च्युक कू ग्युगदेला लागिरी भन्दा थे स्याप्बा ग्यु गिकला लागिरी ल्हानान ताङ्ला। थेह्रङ् लसीन स्वर्गरी धन्छ्याबा एनीगदेला परमेश्वर आबालाएनोन चु कोलागदे न्हङ्री खालैनोन नाश आतगै भिबा सेम मुला।
बिरोध लबा म्हि
“चुदे परमेश्वरदा विश्वास लबा खालै म्हिसे एला बिरोध लसी आज्यबा गे लजी भिसम ए गिक जे थे मुबा ग्लारी निसी थेदा घोना लउ। चुदे एला ताम ङ्यन्सी थेसे ह्राङसे लबा आज्यबा गे ख्लाजी भिसम थे एला ह्रो तला। 7 तर थेसे एला ताम आङ्यन्नी भिसम एसे ह्राङदेन छ्याम स्य्हान्दो म्हि गिक अथवा न्ही भोर्सी निउ। ओच्छे परमेश्वरला बचनसे पाङ्बा ह्रङ् म्हि न्ही अथवा सोम साक्षी थान्सी जम्मान ताम पक्का लउ।8 थे म्हिसे थेनीगदेला तामएनोन आङ्यन्नी भिसम एसे मण्डलीदा पाङ्गो। मण्डलीला तामएनोन आङ्यन्नी भिसम एसे थेदा परमेश्वरदा आतेन्बा म्हिदेन तिरो दुइबा म्हि ह्रङ्बान म्हन्सी ख्लापिन्गो। एनीगदेसे ङाला ताम ङ्यन्गो, एनीगदेसे जम्बुलिङरी जुन स्हे ढुङ्ला थे स्हे स्वर्गरीनोन ढुङ्ला। ओच्छे एनीगदेसे जम्बुलिङरी जुन स्हे ठोङ्ला, थे स्हे स्वर्गरीनोन ठोङ्ला।9
“दोःसी ङाइ एनीगदेदा पाङ्ला, जम्बुलिङरी एनीगदे न्हङ्ला म्हि न्ही ढिक्सी तिगै ताम ह्रीजी भिसम स्वर्गरी धन्छ्याबा ङाला आबासे एनीगदेदा पिन्ना। तिग्दा भिसम ङाला मिनरी म्हि न्ही सोम ढिक्सी खजिबै ग्लारी ह्रुप तजी10 भिसम ङा थेनीगदेदेन छ्याम तला।”
माफ आपिन्बा नोकरला उखान
जमाहेन्से पत्रुससे येशूदा चुह्रङ् भिसी ङ्योइजी, “प्रभु, परमेश्वरदा विश्वास लबा म्हिसे ङादा आज्यना लजी भिसम ङाइ थेदा गादे रेमधोना माफ लतोःला? निसरेमधोना?” येशूसे थेदा चुह्रङ् भिसी जोहाब पिन्जी, “निसरेमधोना जे आहिन, एसे थेदा सदन माफ लउ!1112 तिग्दा भिसम स्वर्गला य्हुल्सा मि ग्ले गिक ह्रङ्बान हिन्ना। थेसे ह्राङला नोकरगदेदेन छ्याम हिसाब किताब किन्बारी म्हाइजी। थे ग्लेसे हिसाब किताब किन्बारी छ्याइमा हजार च्युइ म्हारला डबल13 छे किन्बा नोकरदा ग्ले मुबा ग्लारी भजी। तर थे नोकरसे छे फाबारी आखम्बासेलमा ग्लेसे थेदा थेला म्रिङ, झा झामेदेन थेदेन छ्याम मुबा जम्मान स्हे चूङ्सी जम्मान टाङ्गा फागो भिसी कुल्जी।
“जमाहेन्से थे नोकरसे ग्लेदा फ्या लबान चुह्रङ् भिसी बिन्ती लजी, ‘ह्राङसे तिगै रेधोना भ्रान्गो। ङाइ ह्राङला जम्मान टाङ्गा फाला।’ थे नोकरदा म्राङ्सी ग्लेदा दया रेःजी। ओच्छे ग्लेसे थेदा ‘दाहेन्से तजी, एसे चु छे फाआतोः’ भिसी ख्लापिन्जी।
“जमाहेन्से थे नोकर निजी। निबानलमा थेसे ङाच्छा ग्यार्जा गिक म्हुइला डबल पिन्बा नोकरदा स्याप्जी। जमाहेन्से थेसे ह्रोला खारेरी न्हेप्सी ‘ङाला टाङ्गा दन्देन भउ’ भिसी पाङ्जी। जमाहेन्से थे ह्रोसे थेदा फ्या लबान, ‘तिगै रे भ्रान्गो, ङाइ एला जम्मान टाङ्गा पिन्ना’ भिसी बिन्ती लजी। तर थेसे आङ्यन्ना ह्रोदा टाङ्गा आपिन्देधोना झ्याल्खानरी झाङ्जी।
“थे घ्याबासे थेह्रङ् लबा म्राङ्सी स्य्हान्दो ह्रोगदेदा ल्हानान दुख ङ्हम्सी थेसे लबा जम्मान ताम ग्लेदा पाङ्जी। थेह्रङ्बा ताम थेःसी ग्लेसे थे घ्याबादा ह्राङ मुबा ग्लारी ङ्योइजी। ओच्छे थेदा चुह्रङ् भिसी पाङ्जी, ‘नाइबा गे लबा घ्याबा, एला ताम थेःसी ङाइ दया लसी एसे फातोःबा जम्मान टाङ्गा ख्लापिन्जी। ङाइ एदा दया लमाहेन्से एसेनोन एला ह्रोदा दया लआतोःबा?’ थे नोकरला बेहोर म्राङ्सी ग्लेदा ल्हानान बोमो खजी। जमाहेन्से थेदाएनोन जम्मान छे आफादेधोना सजाय पिन्बा म्हिगदेला यारी जिम्मा पिन्जी।
“थेह्रङ् लसीन एनीगदेसेनोन परमेश्वरदा विश्वास लबा खालै म्हिदा सेमहेन्सेन माफ आलनी भिसम स्वर्गरी धन्छ्याबा ङाला आबासेनोन एनीगदेदा थेह्रङ्नोन लला।”
Source notes (13)
- Cross-reference लूका २२:२४
- Cross-reference मर्कू १०:१५; लूका १८:१७
- Cross-reference मत्ती ५:३०
- Cross-reference मत्ती ५:२९
- Footnote येशूदा विश्वास लबा कोलागदे च्याबा स्वर्गदूतगदेसे कोलागदेला वास्ता लसी सदन थेनीगदेला बारेरी परमेश्वरदा पाङ्मुला।
- Footnote चु पदला ताम ल्हाना ह्रङ्बा ग्रीक बाइबलरी भ्रिबा आरे ( लूका १९:१० स्हीगो)।
- Cross-reference लूका १७:३
- Cross-reference ठिम १९:१५
- Cross-reference मत्ती १६:१९; यूह २०:२३
- Footnote “ङाला मिनरी ह्रुप तबा” भिबा चा येशूदा विश्वास लबा म्हिगदे हिन्ना।
- Footnote “सदन माफ लउ” भिबादा ग्रीक बाइबलरी चा सत्तरी गुणा सात रेम माफ लउ भिसी भ्रिबा मुला।
- Cross-reference लूका १७:३-४
- Footnote “हजार च्युइ म्हारला डबल” भिबा चा फासीन फाबारी आखम्बा टाङ्गा हिन्ना।
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.