Eastern Tamang Language Bible
मर्कू 12
अधियाँ स्होबा म्हिगदेला उखान
मत्ती २१:३३-४६; लूका २०:९-१९
येशूसे थेनीगदेदा उखानग्याम चुह्रङ् भिसी सुङ्बारी छ्याइजी, “म्हि गिकसे व्हारारी अङ्गुर सूसी क्युर्सीन पर्खाल लजी। ओच्छे अङ्गुर म्हार्बारी कोल स्होसी अङ्गुर व्हारा ख्रुङ्बारी नोबा छाप्रो गिक स्होजी। जमाहेन्से अधियाँरी पिन्सी थे अर्गु य्हुल्सारी निजी।1 अङ्गुर मिन्बा धुइ तमाहेन्से थे फ्युक्पो म्हिसे ह्राङला भो किन्बाला लागिरी अधियाँ लबागदे मुबा ग्लारी ह्राङला नोकरदा पुइजी। तर थे अधियाँ लबागदेसे थेदा चुङ्सी तोबा ग्याङ्बा लसी तिगै आपिन्ना पुइजी। ओच्छे थेसे स्य्हान्दो नोकरदा पुइजी, तर थेनीगदेसे थेला थोबोरी तोसी बेइज्जत लसी पुइजी। थेसे अझ स्य्हान्दो नोकरदा पुइजी। थेनीगदेसे थेदाएनोन साइजी। चुह्रङ् लसी थेनीगदेसे कोइदा साइबा कोइदा तोबा लजी।
“दाहेन्से थेदेन छ्याम थेसे सेमहेन्सेन माया लबा झा गिक जे बाँकी मुबा। जम्मादान पुइसी जिन्माहेन्से ‘थेनीगदेसे ङाला झादा मि मान लला तला’ भिसी थेसे ह्राङला झादा थेनीगदे मुबा ग्लारी पुइजी। तर अधियाँ लबागदेसे ह्राङ ह्राङ न्हङ्री चुह्रङ् भिसी ताम लजी, ‘चु मि य्हाङला मालिकला झा हिन्ना, य्हाङसे थेदा साइगे। जमाहेन्से थेला सम्पत्ति य्हाङलान तला।’ ओच्छे थेनीगदेसे थेदा चुङ्सी साइसी थेदा व्हाराग्याम पाखारी भ्याङ्जी।
“दाहेन्से थे अङ्गुर व्हाराला धनीसे तिग लला? थे खसी अधियाँ लबा म्हिगदेदा साइला ओच्छे थे अङ्गुरला व्हारा स्य्हान्दोगदेदा स्होबारी पिन्ना। एनीगदेसे परमेश्वरला बचन खाइमै पढब लबा आरे?
“‘जुन युङ्बादा दिम स्होबा कर्मीगदेसे गे आखेल भिसी भ्याङ्बा मुबा,
थेनोन युङ्बा दिमला सुर युङ्बा दोजी।
चु परमप्रभुग्याम तबासेलमा
य्हाङला लागिरी उदेकला ताम हिन्ना’” 2
येशूसे सुङ्बा ताम य्हाङला बिरोधरी चिम भिसी यहूदी धर्मगुरुगदेसे था याङ्सी थेनीगदेसे येशूदा चुङ्बारी म्हाइजी। तिग्दा भिसम चु उखान येशूसे थेनीगदेलान बिरोधरी सुङ्बा हिन्ना भिबा ताम थेनीगदेदा था मुबा। तर म्हिला हुलसे लमा थेनीगदे लोङ्सी येशूदा चुङ्बारी आखम्नी। थेतबासेलमा थेनीगदेसे येशूदा ख्लासी निजी।
रोमी ग्याल्बोदा तिरो फातोःबा कि फाआतोःबा भिसी येशूदा ङ्योइबा
मत्ती २२:१५-२२; लूका २०:२०-२६
जमाहेन्से तामनोन तामरी येशूदा फसब लइ भिसी यहूदी धर्मगुरुगदेसे फरिसीदेन हेरोदीगदेला कोइ कोइ म्हिगदेदा येशू मुबा ग्लारी पुइजी। थेनीगदे येशू मुबा ग्लारी खसी चुह्रङ् भिसी पाङ्जी, “गुरु, ह्राङ सत्यला म्हि हिन्ना, ओच्छे खालैदा वास्ता आलमुला भिसी ङन्दा था मुला। तिग्दा भिसम ह्राङसे म्हिला ली च्यासी गे आलमुला। तर परमेश्वरला ग्याम ज्यना लसी लोप्मुला। थेतबासेलमा ङन्से रोमी ग्याल्बो3दा तिरो फाबा ठीक हिन्ना कि आहिन? सुङ्गो। ङन्से तिरो फागो कि आफागो?”
जमाहेन्से येशूसे थेनीगदेला कप्टी सेम था याङ्सी चुह्रङ् भिसी सुङ्जी, “तिग्दा एनीगदेसे ङादा फसब लबारी म्हाइबा? खाइ डबल गिक भउ च्यागे।” थेनीगदेसे येशूदा डबल गिक पिन्जी, ओच्छे येशूसे थेनीगदेदा “चु डबलरी मुबा छापदेन मिन खाल्ला हिन्ना?” भिसी ङ्योइमा, थेनीगदेसे “रोमी ग्याल्बोला” भिसी जोहाब पिन्जी। जमाहेन्से येशूसे थेनीगदेदा चुह्रङ् भिसी सुङ्जी, “थेह्रङ् भिसम रोमी ग्याल्बोला जति रोमी ग्याल्बोदा पिन्गो, ओच्छे परमेश्वरला जति परमेश्वरदा पिन्गो।” चुह्रङ्बा ताम थेःसी थेनीगदे उदेक तजी।
सिबाग्याम सोना लबाला बारेरी ङ्योइबा
मत्ती २२:२३-३३; लूका २०:२७-३८
सिबा म्हि दोःसी आसो भिसी विश्वास लबा सदुकीगदे येशू मुबा ग्लारी खसी चुह्रङ् भिसी ङ्योइजी,4 “गुरु, मोशासे य्हाङदा पिन्बा ठिम अन्छार खालैला ज्योज्योसे ब्याह लसी कोलागदे आतनान सिजी भिसम ज्योज्योला लागिरी कोलागदे तगै भिसी आलेसे चाङदा ब्याह लतोःला भिसी भ्रिबा मुला।5 म्हि गिकला ज्योज्यो आले निस मुबा। थेबासे ब्याह लजी, तर कोलागदे आतनान थे सिजी। ओच्छे पाराङ्से चाङदा ब्याह लजी, थेएनोन कोलागदे आतनान सिजी, साँजीएनोन थेह्रङ् तसीन सिजी। चुह्रङ् लसी जम्मासेन पालोन पालो चाङदा ब्याह लजी। ओच्छे कोलागदे आतनान थेनीगदे सिजी। ओच्छे थे म्रिङ्म्हेमेएनोन सिजी। थेतबासेलमा ङन्दा सुङ्गो, सिबाग्याम सोना लजी भिसम थे म्रिङ्म्हेमे खजिबाला म्रिङ तला? तिग्दा भिसम थेनीगदे जम्मासेन थे म्रिङ्म्हेमेदेन छ्याम ब्याह लबा मुला।” येशूसे थेनीगदेदा चुह्रङ् भिसी सुङ्जी, “एनीगदे अन्दोलरीन चिम, तिग्दा भिसम एनीगदेसे परमेश्वरला बचनदेन परमेश्वरला शक्तिला बारेरी घोबान आरेम। तिग्दा भिसम सिबाग्याम सोना लबा धुइरी न्ह ब्याह लला, न्ह ब्याह तला। तर थेनीगदे स्वर्गरी मुबा स्वर्गदूतगदे ह्रङ्बान तला। सिबाग्याम सोना लबाला बारेरी अझ पाङ्गे भिसम परमेश्वरसे मोशादा लुङ्बा मेला झाङ्ग्याम ‘ङा अब्राहाम, इसहाकदेन याकूबला परमेश्वर हिन्ना’ भिसी सुङ्जी।6 परमेश्वर मि सिबागदेला परमेश्वर आहिन, तर सोबागदेला परमेश्वर हिन्ना। थेतबासेलमा एनीगदेसे घोबा जम्मान ताम गल्ती मुला।”
येशूसे लोप्बा जम्मान भन्दा मूल ताम
मत्ती २२:३४-४०; लूका १०:२५-२८
येशूसे म्हिगदेदा ज्यना लसी जोहाब पिन्बा म्राङ्सी यहूदी धर्मगुरुगदे न्हङ्ला गिकसे चुह्रङ् भिसी ङ्योइजी, “गुरु, परमेश्वरसे मोशादा पिन्बा ठिमरी जम्मान भन्दा मूल ताम चा खजिबा हिन्ना?” येशूसे थेदा चुह्रङ् भिसी सुङ्जी, “‘इस्राएलीगदे च्यागो, जम्मान भन्दा मूल ताम चा परमप्रभु गिक जे य्हाङला परमेश्वर हिन्ना। एसे परमप्रभु ह्राङला परमेश्वरदा जम्मान सेमसे, जम्मान प्राणसे, जम्मान बुद्धिसे, जम्मान शक्तिसे माया लउ।’7 ओच्छे परमेश्वरसे कुल्बा अर्गु मूल ताम चा ‘एसे ह्राङला खिम्जेमदा ह्राङदा ह्रङ्नोन माया लउ।’ परमेश्वरसे कुल्बा मूल ताम चु भन्दा अर्गु आरे।”8
चु ताम थेःसी यहूदी धर्मगुरुसे येशूदा चुह्रङ् भिसी पाङ्जी, “गुरु, ह्राङसे सुङ्बा ताम ठीक हिन्ना। परमेश्वर गिक जे मुला, ओच्छे परमेश्वर बाहेक स्य्हान्दो खालै आरे।9 ओच्छे परमेश्वरदान जम्मान सेमसे, जम्मान प्राणसे, जम्मान बुद्धिसे, जम्मान शक्तिसे माया लबा, ओच्छे ह्राङदा ह्रङ्नोन ह्राङला खिम्जेमदाएनोन माया लबा चा मेरी ख्राङ्सी फुल्बा बलिदेन अर्गु बलिगदे भन्दा मूल ताम हिन्ना।”10 थेसे होशियार तसी जोहाब पिन्बा म्राङ्सी येशूसे थेदा “ए परमेश्वरला य्हुल्साग्याम थारेङ् आरे” भिसी सुङ्जी। जमाकुनुहेन्से खालैसे येशूदा तिगै ताम ङ्योइबारी आँट आलनी।
येशू ख्रीष्ट खाल्ला झा हिन्ना?
मत्ती २२:४१-४६; २३:१-३६; लूका २०:४१-४७
येशूसे परमेश्वरला मन्दिररी लोप्बान लबा धुइरी चुह्रङ् भिसी सुङ्जी, “यहूदी धर्मगुरुगदेसे तिग्दा थार्बा पिन्बा ख्रीष्टदा दाऊद ग्लेला सन्तान भिसी पाङ्बा? तिग्दा भिसम दाऊदसेन पवित्र आत्माग्याम चुह्रङ् भिसी पाङ्बा मुबा,
“परमप्रभुसे ङाला प्रभुदा चुह्रङ् भिसी सुङ्बा मुला, ‘ङाइ एला शत्रुगदेदा
एला काङ् धिरी आथान्देधोना
ए ङाला दाहिनेपट्टि चिउ।’” 11
“दाऊद ह्राङसेन मि ख्रीष्टदा ‘प्रभु’ पाङ्माहेन्से खाह्रङ् लसी ख्रीष्ट दाऊद ग्लेला सन्तान तला?” ओच्छे येशूसे लोप्बा ताम म्हिगदेसे सेम लसी ङ्यन्जी।
येशूसे यहूदी धर्मगुरुगदे म्राङ्सी होशियार तउ भिसी सुङ्बा
मत्ती २३:१-३६; लूका २०:४५-४७
येशूसे लोप्बान लबा धुइरी चुह्रङ् भिसी सुङ्जी, “यहूदी धर्मगुरुगदे म्राङ्सी होशियार तउ। तिग्दा भिसम थेनीगदे ज्यबा ज्यबा क्वान क्वान्सी कोर्बारी निबादेन बजाररी निबा धुइरी म्हिगदेसे मान लगै भिसी म्हन्मुला। ओच्छे यहूदीगदे ह्रुप तबा दिमरीदेन भोज लबा ग्लारीनोन मूल ठि म्हाइमुला। थेह्रङ् लसीन थेनीगदेसे ह्रेम्बो सिबा म्रिङ्म्हेमेगदेला दिमनाम ब्यन्मुला। ओच्छे म्हिगदेदा उन्बाला लागिरी ह्रेङ्बा ह्रेङ्बा प्रार्थना लमुला, थेह्रङ्बा म्हिगदेसे झन ल्हानान सजाय याङ्ला।”
ह्रेम्बो सिबा म्रिङ्म्हेमेसे पिन्बा भेटी
लूका २१:१-४
येशू परमेश्वरला मन्दिररी भेटी युबा ग्लाला ङाच्छापट्टि धन्छ्यासी म्हिगदेसे भेटी युबा बाकसरी भेटी युबान लबा स्हीबान मुबा। थेरी फ्युक्पो म्हिगदेसे ल्हानान टाङ्गा युजी। ओच्छे ह्रेम्बो सिबा प्राङ्बो म्रिङ्म्हेमे गिक खसी साङ्बोला सिगा गिकला डबल न्ही युजी। जमाहेन्से येशूसे चेलागदेदा ह्राङ मुबा ग्लारी ङ्योइसी चुह्रङ् भिसी सुङ्जी, “च्यागो, ङाला ताम ङ्यन्गो, भेटी युबा बाकसरी चु ह्रेम्बो सिबा प्राङ्बो म्रिङ्म्हेमेसे स्य्हान्दो म्हिगदेसे भन्दा ल्हाना भेटी युबा मुला। तिग्दा भिसम स्य्हान्दो म्हिगदेसे ह्राङदेन छ्याम मुबा ल्हानान सम्पत्तिग्याम युजी। तर चु म्रिङ्म्हेमे प्राङ्बो तसीनोन ह्राङदेन छ्याम मुबा जति जम्मान युबा मुला।”
Source notes (11)
- Cross-reference यशै ५:१-२
- Cross-reference व्हाइ ११८:२२-२३
- Footnote रोमी ग्याल्बो ग्रीक बाइबलरी रोमी ग्याल्बोदा कैसर भिसी भ्रिबा मुला।
- Cross-reference मूल २३:८
- Cross-reference ठिम २५:५
- Cross-reference थोन्बा ३:६
- Cross-reference ठिम ६:४-५
- Cross-reference लेवी १९:१८
- Cross-reference ठिम ४:३५
- Cross-reference होशे ६:६
- Cross-reference व्हाइ ११०:१
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.