Eastern Tamang Language Bible
लेवी 19
चोखोदेन निसाफ लबाला ठिमगदे
परमप्रभुसे मोशादा चुह्रङ् भिसी सुङ्जी, “इस्राएलला जम्मान य्हुल्दा चुह्रङ् भिसी पाङ्गो, एनीगदे जम्मान चोखो तउ, तिग्दा भिसम ङा परमप्रभु एनीगदेला परमेश्वर चोखो मुला।1 एनीगदे जम्मासेन ह्राङ ह्राङला आबा आमादा मान लउ, ओच्छे ङाइ स्होबा ब्लप्बा न्हबा धिनदा मानब लउ। ङा परमप्रभु एनीगदेला परमेश्वर हिन्ना।2
“एनीगदे मूर्तिगदेदा पूजा लसी आभ्रउ। ओच्छे एनीगदेसे खजिबै स्हे ङ्युना लसी लागदेला मूर्तिएनोन आस्होउ। ङा परमप्रभु एनीगदेला परमेश्वर हिन्ना।3
“एनीगदेसे ढिक्ना लबा बलि फुल्मा ठिम अन्छार फुल्तोःला। जमाहेन्से एनीगदेसे फुल्बा बलि परमप्रभुदा सेम निबा बलि दोला। एनीगदेसे बलि फुल्बा धिनकुनुन अथवा न्हङ्गरदाङधोनारी बलिला स्या चसी जिन्ना लतोःला। तर रेनीदाङधोनाएनोन तिगै लोङ्जी भिसम थे लेङ्बा स्या चा मेरी ख्राङ्गो। रेनीदाङएनोन चजी भिसम थे अशुद्ध तला। थे बलि परमप्रभुदा सेम निबा बलि आदो। थे चबा जम्मान म्हिसे थेसे लबा आज्यबा गेला जिम्मा थेसेन किन्तोःला। तिग्दा भिसम थेसे परमप्रभुला चोखो स्हेदा अशुद्ध तना लजी। ओच्छे थेदा थेला म्हिगदेला गुङ्ग्याम तेःगै।
“एनीगदेसे ह्राङला बाली दुइबा धुइरी भुला कानाकुनीला बाली आखान्गो। ओच्छे बाली खन्माहेन्से शिलो आम्हाइगो।4 एनीगदेसे ह्राङला अङ्गुर व्हाराला अङ्गुर थुमा जम्मान आथुउ, ओच्छे सरी ताइबा अङ्गुरएनोन आदुइगो। थे चा प्राङ्बोदेन विदेशीगदेला लागिरी थेरीन ख्लासी थान्गो। ङा परमप्रभु एनीगदेला परमेश्वर हिन्ना।
“एनीगदेसे य्हो आलउ।5
“फट्टा ताम आलउ।
“गिकसेम गिकदा धोका आपिन्गो।
“एनीगदेसे ङाला मिन किन्सी फट्टा तामरी घ्रान आचउ। थेह्रङ् लमा एनीगदेसे ह्राङला परमेश्वरला मिन न्होङ्ना लला। ङा परमप्रभु हिन्ना।6
“एनीगदेसे ह्राङला खिम्जेमदा नाङ्बाझ्याक्बा आलउ, ओच्छे थेनीगदेला तिगै स्हे आब्यन्गो। ज्यालारी गे लबा म्हिला ज्याला आपिन्ना म्हुन गिकएनोन कुटिसी आचिउ।7 नाब्यङ् आथेःबा म्हिदा आकेःगो। मी आम्राङ्बा म्हिला ङाच्छापट्टि तोइबा स्हे आथान्गो, तर ह्राङला परमेश्वरदा मान लउ। ङा परमप्रभु हिन्ना।8
“एनीगदेसे खालैदा अन्याय आलउ। जजा घ्रेन, प्राङ्बो, फ्युक्पो खालैलान ली च्यासी गे आलउ। तर जम्मान म्हिला ठीक निसाफ लउ।9 खालै म्हिला बिरोध लबान म्हिगदेला गुङ्री फट्टा ताम लसी आभ्रउ। ओच्छे एनीगदेसे ह्राङला खिम्जेमला ज्यान गोजाला धाररी परब तना आलउ। ङा परमप्रभु हिन्ना।
“एसे ह्राङला ज्योज्यो आलेदेन छ्याम इख आथान्गो। बरू एसे ह्राङला खिम्जेमदा सिधन पाङ्गो, आहिन्सम थेसे लबा आज्यबा गेग्याम एएनोन आज्यबा म्हि दोला। एसे ह्राङला म्हिगदेदा नाङ फाबारी आम्हाइगो ओच्छे इख आथान्गो। तर एसे ह्राङला खिम्जेमदा ह्राङदा ह्रङ्नोन माया लउ। ङा परमप्रभु हिन्ना।
“एनीगदे ङाला ठिम अन्छार भ्रउ।10
“बेग्लै बेग्लै जातला जन्तु न्हीदा दोङ्सी ठेमा आस्होउ।
“एनीगदेसे भु गिकरीन थरी न्हीला ब्लु आढ्वाउ।
“एनीगदेसे थरी न्हीला क दोङ्सी स्होबा क्वान आक्वान्गो।
“चुदे खालै म्हि अर्गु म्हिसे ब्याह लबारी ह्रीसी जिन्बा घ्याबास्यादेन छ्याम ब्रेल्बा मुला। तर थे म्हिसे ह्राङला म्रिङ् स्होबाला लागिरी थे घ्याबास्याला मालिकदा फातोःबा सय फाबा आरे, ओच्छे थे घ्याबास्यादा थेला मालिकसे ख्लाबाएनोन आरे भिसम थे न्हीदान सजाय पिन्तोःला। थे म्रिङ्म्हेमे दन्देधोनाएनोन घ्याबास्यानोन मुला। थेतबासेलमा थे न्हीदा साइबारी चा आत। तर थे ह्रेम्फेबेसे ह्राङला दोषबलि परमप्रभुदा फुल्बारी ह्रुप तबा पालला म्रापरी ग्यु बोको गिक भसी खगै। ओच्छे थेसे पाप लबासेलमा पूजाहारीसे दोषबलिला ग्यु बोको फुल्गै। ओच्छे थेदा परमप्रभुला ओन्छाङ्री परमप्रभुदेन छ्याम ढिक्ना लगै। जमाहेन्से थेला पाप माफ तला।
“थे य्हुल्सारी दोमाहेन्से एनीगदेसे चबारी तबा खजिबै खाल्ला रो रोबा दोङ सूजी भिसम थे दोङला रो एनीगदेसे सोम दिङ्धोना चबारी आत। तर थे दोङला रो ब्लि दिङ्री चा चोखो तला, ओच्छे परमप्रभुदा जयजयकारला भेटी फुल्बारी तला। ङ्हा दिङ्री चा एनीगदेसे थे दोङला रो चबारी तला, ओच्छे थे दोङरी ल्हानान रो रोबान निला। ङा परमप्रभु एनीगदेला परमेश्वर हिन्ना।
“एनीगदेसे खजिबै जन्तुदेन चराला का मुबा स्या आचउ।11
“एनीगदेसे ज्यबा साइतदेन आज्यबा साइत आच्यागो ओच्छे टुनामुना आलउ। एनीगदेसे ह्राङला न्हर्जला क्रा आथागो, ओच्छे ह्राङला दाह्रीला जो आक्रेप्गो।12 सिबा म्हिला लागिरी क्राबा क्रिङ्बा लसी ह्राङला ल्हुइरी चोट तना आलउ। ओच्छे एनीगदेसे ह्राङला ल्हुइरी छ्वासी तिगैलान छाप आस्होउ। ङा परमप्रभु हिन्ना।
“एनीगदेसे ह्राङला झामेदा वेश्या स्होसी अशुद्ध तना आलउ, आहिन्सम य्हुल्सान वेश्या गे लबा य्हुल्सा दोला, ओच्छे य्हुल्सा नाङ्नोन नाइबा गे जे तला।13 ङाइ स्होबा ब्लप्बा न्हबा धिनदा एनीगदेसे मानब लउ, ओच्छे ङाला चोखो पालदाएनोन मान लउ। ङा परमप्रभु हिन्ना।14
“एनीगदे बोन्बो, बोक्सीदेन जादू, टुनामुना लबा म्हि आदोगो। एनीगदेसे थेनीगदेदेन छ्याम सल्लाह किन्सी ह्राङसे ह्राङदान अशुद्ध तना आलउ। ङा परमप्रभु एनीगदेला परमेश्वर हिन्ना।15
“खेप्पा खुइगदेदा मान लउ। एनीगदेसे परमेश्वरदा मान लउ। ङा परमप्रभु हिन्ना।
“एनीगदेला गुङ्री चिबा विदेशीगदेदेन छ्याम आज्यबा व्यवहार आलउ।16 एनीगदेसे थेनीगदेदा ह्राङलान य्हुल्सारी न्हबा म्हिदा ह्रङ्नोन लउ। थेनीगदेदा एनीगदेसे ह्राङदा ह्रङ्नोन माया लउ। तिग्दा भिसम एनीगदेएनोन मिश्र य्हुल्सारी परदेशी मुबा। ङा परमप्रभु एनीगदेला परमेश्वर हिन्ना।
“दप्मादेन क्योइमा अथवा झ्यामा एनीगदेसे खालैदान झुक्याब आलउ।17 एनीगदेसे ठीक तराजुदेन ढक ओच्छे दप्बा स्हे चलब लउ। एनीगदेदा मिश्र य्हुल्साग्याम तेःसी भबा परमप्रभु एनीगदेला परमेश्वर ङानोन हिन्ना। एनीगदे ङाइ कुल्बा जम्मान तामदेन ङाला जम्मान ठिम अन्छार भ्रउ। ङा परमप्रभु हिन्ना।”
Source notes (17)
- Cross-reference लेवी ११:४४-४५
- Cross-reference थोन्बा २०:८,१२; ठिम ५:१२,१६
- Cross-reference लेवी २६:१; थोन्बा २०:२३; ३४:१७; ठिम २७:१५
- Cross-reference लेवी २३:२२; ठिम २४:१९-२२
- Cross-reference थोन्बा २०:१५-१६; ठिम ५:१९-२०
- Cross-reference थोन्बा २०:७; ठिम ५:११; मत्ती ५:३३
- Cross-reference ठिम २४:१४-१५
- Cross-reference ठिम २७:१८
- Cross-reference थोन्बा २३:६-८; ठिम १६:१९
- Cross-reference ठिम २२:९-११
- Cross-reference ठुङ् ९:४; लेवी ७:२६-२७; १७:१०-१४; ठिम १२:१६,२३; १५:२३; १८:१०
- Cross-reference लेवी २:५; ठिम १४:१
- Cross-reference ठिम २३:१७
- Cross-reference लेवी २६:२
- Cross-reference ठिम १८:११; १ शमू २८:३-२०; यशै ८:१९
- Cross-reference थोन्बा २२:२१; ठिम २४:१७-१८; २७:१९
- Cross-reference ठिम २५:१३-१६; बुद्धि २०:१०; इज ४५:१०
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.