Eastern Tamang Language Bible
सुर्दा 1
यरूशलेमला लागिरी सुर्दा लबा
म्हिनोन म्हिसे प्लिङ्बा सहर दन्दे गादे सुनसान तबा मुला!
ङाच्छा थे सहरदा य्हुल य्हुल्ला म्हिगदेसे मान लमुबा,
दन्दे थे सहर ह्रेम्बो सिबा म्रिङ्म्हेमे ह्रङ्बान तबा मुला,
य्हुल य्हुल्ला म्हिगदेथोरी शासन लबा थे सहर चा ग्लेस्या ह्रङ्बान मुबा,
दन्दे थे सहरदा अर्गुसे तहरी थान्बा मुला।
म्हुन गिक थे ग्वाँ ग्वाँ क्रामुला,
थेला ग्रम्बाग्याम मिख्लीला भाल ताइबाला ताइबान मुला।
थेदा माया लबा ह्रेम्बोकोलागदे न्हङ्ला खालैसेन थेदा आँट आपिन्मुला,
जम्मान ह्रोगदेसे थेदा धोका पिन्बा मुला,
दन्दे थेला ह्रोगदे जम्मान थेलान शत्रु दोबा मुला।
यहूदाला म्हिगदेदा चुङ्सी जबरजस्ती अर्गु य्हुल्सारी भोर्बा मुला,
थेरी थेनीगदेदा घ्याबा स्होसी दुखन दुख न्हङ्री थान्बा मुला।
दन्दे थेनीगदे अर्गु य्हुल्ला म्हिगदेला गुङ्री चिबा मुला,
थेनीगदेला लागिरी ब्लप्बा साल्बा ग्ला खानङ्एनोन आरे,
शत्रुगदेसे क्युर्सीनग्याम ताप्सी ताप्सी थेनीगदेदा चुङ्बा मुला।
यरूशलेमरी निबा ग्यामगदेएनोन सुनसान1 तबा मुला।
तिग्दा भिसम परमेश्वरसे स्होबा चाडगदे धङ्बाला लागिरी थेरी खालैनोन आखमुला।
थेला मूल म्रापगदे चा सुनसान तबा मुला।
ओच्छे सुर्दासेलमा पूजाहारीगदेएनोन हुईया लसी चिमुला।
थेला कन्ये-केटीगदेला सेम दुखन दुखसे प्लिङ्बा मुला,
दन्दे थे सहरदा ल्हानान दुख तबा मुला।
दन्दे थेला शत्रुगदे चा थेलान मालिक दोबा मुला।
थेदा बिरोध लबागदे चा ढुक्क तसी चिबा मुला।
थेसे ल्हानान पाप लबासेलमा परमप्रभुसे चु दुख पिन्बा हिन्ना।
थेला कोलागदेदा शत्रुगदेसे चुङ्सी जबरजस्ती लसी अर्गु य्हुल्सारी भोर्बा मुला।
ङाच्छा मान याङ्बा यरूशलेम सहरला दन्दे बेइज्जत तबा मुला।
शासन लबा थेला म्हिगदे चा चआम्याङ्बा तङ्गीगदे ह्रङ्बान तबा मुला।
कमजोर तबासेलमा शत्रुगदेसे ताप्माएनोन थेनीगदे य्हार्बारी आखम्मुला।
ह्राङला दिमगदे नाश तबासेलमा यरूशलेमला म्हिगदेसे ल्हानान दुख याङ्जी,
ओच्छे थेनीगदे ग्ला ग्लारी ल्हेबान भ्रतोःजी।
थे धुइरी थेनीगदेसे ङाच्छा ह्राङदेन छ्याम मुबा ज्यबा ज्यबा स्हेगदे ढन्जी।
थे सहरला म्हिगदे शत्रुगदेला यारी परब तबा धुइरी थेनीगदेदा ह्रो लबा म्हि खालैनोन आरेमुबा।
थे सहर नाश तबा म्राङ्सी शत्रुगदेसे थेनीगदेदा खिसी लजी।
ल्हानान पाप लबासेलमा यरूशलेम अशुद्ध तबा मुला,
थेतबासेलमा थेदा मान लबागदे जम्मासेन थेदा हेला लबा मुला।
तिग्दा भिसम थेदा मान लबागदेसे थेदा लिगन्डीन तसी जिन्बा म्राङ्बा मुला।
थे ब्लप्सी हुईया लबान पेःसी लि घप्बा मुला।
थेसे लबा नाइबा खबा ताम प्रस्टन म्राङ्बा मुला,
थेसे ह्राङथोरी खबान लबा दुखला बारेरी खाइमै आखेन्नी।
थे ल्हानान आज्यना लसी नाश तबा मुबा,
थे धुइरी थेदा आँट पिन्बा म्हि खालैनोन आरेमुबा,
“परमप्रभु, चु दुखरी ङादा ह्रो लउ,
तिग्दा भिसम ङादा शत्रुगदेसे ब्रेना लबा मुला” भिसी थेसे बिन्ती लला।
थेला जम्मान धन सम्पत्ति शत्रुगदेसे ब्यन्सी भोर्बा मुला।
ओच्छे थेला म्हिगदेसे परमेश्वरला मन्दिर न्हङ्री अर्गु य्हुल्ला म्हिगदे वाङ्बान लबा म्राङ्जी,
तर परमप्रभुसे “ङाला म्हिगदे ह्रुप तबा थे ग्लारी अर्गु य्हुल्ला म्हिगदेदा खाइमै वाङ्आपुङ्गो” भिसी कुल्बा मुबा।
थेला जम्मान म्हिगदे हुईया लबान चबा स्हे म्हाइसी भ्रमुला,
थेनीगदेसे ह्राङला प्राण जोगब लबाला लागिरी धन सम्पत्ति चबा स्हेदेन छ्याम देप्मुला।
“परमप्रभु, ङादा ह्रो लउ,
तिग्दा भिसम ङा गेआखेल्बा तसी जिन्बा मुला” भिसी थेसे बिन्ती लमुला।
चु ग्याम तसी निबागदेदा थेसे चुह्रङ् भिसी पाङ्ला,
“एनीगदेदा ङाला तिगै वास्ता आरे?
क्युर्सीन च्यागो, ओच्छे ज्यना लसी खेन्गो,
ल्हानान बोमो खसी परमप्रभुसे ङादा पिन्बा ह्रङ्बा दुख अर्गु खालैदा पिन्बा मुला?
परमप्रभुसे तोरग्याम मे पुइखजी,
थे मेसे ङाला नख्रुन क्रोजी।
परमप्रभुसे ङाला लागिरी वा झुजी,
ओच्छे ङादा थेनोन ग्लारी दोःसी भजी।
परमप्रभुसे ङादा तोङ्तोङ्बा ग्ला ह्रङ्बान स्होसी दुखरीन थान्जी।
ङाइ लबा जम्मान पापगदे परमप्रभुसे ङादान काप्सी पिन्बा मुला।
थे जम्मान पापदा परमप्रभुसेन ङाला भमरी खीसी पिन्बा मुला,
थे पापला धोइसे लमा ङा कमजोर तबा मुला।
प्रभुसेन ङादा शत्रुगदेला यारी जिम्मा पिन्बा मुला,
थेनीगदेदेन छ्याम छेबाला लागिरी ङादेन छ्याम भङ् आरे।
ङाला जम्मान भङ्बा भङ्बा सिपाहीगदेदा प्रभुसे तिगै गेआखेल्बा तना लजी।
ङाला जम्मान भ्योन म्हिगदेदा नाश लबाला लागिरी थेसे ह्राङला सिपाहीगदे ल्हानान पुइखजी।
थेसे यहूदाला जम्मान म्हिगदेदा कोलरी अङ्गुर म्हार्बा ह्रङ् लसी छ्याकछिक लबा मुला।
थेतबासेलमा ङा क्राबान मुला,
ङाला मीग्याम मिख्लीला धारा ताइबा मुला।
ङादा आँट पिन्बा म्हि ङाला ङाम्री खालैनोन आरे,
ङाला सेम ताङ्ना लबा म्हि खालैनोन आरे।
ङाला म्हिगदेला बिजोग तबा मुला,
तिग्दा भिसम शत्रुगदेसे ङादा ब्रेना लबा मुला।
यरूशलेमला म्हिगदेसे ह्रो याङ्बाला लागिरी बिन्ती लमा थेनीगदेदा आँट पिन्बा म्हि खालैनोन आतनी।
परमप्रभुसे थेनीगदेला खिम्जेम य्हुल्साला म्हिगदेदा थेनीगदेला शत्रु दोगो भिसी कुल्जी।
शत्रुगदेला ओन्छाङ्री यरूशलेम चा अशुद्ध स्हे ह्रङ्बान तबा मुला।
परमप्रभु चा ठीक निसाफ लबा परमेश्वर हिन्ना,
तर थेसे कुल्बा अन्छार आभ्रबा चा ङानोन हिन्ना।
थेतबासेलमा य्हुल य्हुल्ला जम्मान म्हिगदे ङ्यन्गो,
ओच्छे ङाइ नाबा दुख च्यागो।
ङाला ह्रेम्बोकोला, म्रिङ्कोला जम्मानदा चुङ्सी जबरजस्ती लसी भोर्बा मुला।
ङाइ ङादा माया लबा ङाला म्हिगदेदा ङ्योइजी,
तर थेनीगदे जम्मासेन ङादा धोका पिन्जी।
सोबाला लागिरी पूजाहारी ङाला म्हिगदेदेन गन्बागदेसे चबा स्हे म्हाइजी,
तर तिगै चबा स्हे आयाङ्बासेलमा थेनीगदे फोइथाननोन सहरला ग्याम ग्यामरी सिजी।
ङाला परमप्रभु स्हीगो, ङादा ल्हानान दुख तबा मुला।
ङाइ ह्राङदा ल्हानान बिरोध लबासेलमा ङाला सेम न्हङ् न्हङ्री क्रोबा मुला।
ङाला सेम औदिन छटपट तबा मुला,
मङ्ग्यार निसैनोन साइबा मुला,
दिम न्हङ्री चिसैनोन सिमुला।
ङाइ हुईया लबा म्हिगदेसे थेःबा मुला,
तर ङादा आँट पिन्बा म्हि चा खालैनोन आरे।
ङाथोरी आपत विपत खबा ताम ङाला शत्रुगदेसे थेःबा मुला,
ह्राङसेन ङादा चुह्रङ् लबासेलमा थेनीगदे ताङ्बा मुला।
ह्राङसे सुङ्बा निसाफ लबा धिन योनान खगै,
ओच्छे ङाला शत्रुगदेसेनोन ङाइ ह्रङ्नोन दुख नातोःगै।
थेनीगदेसे लबा जम्मान नाइबा गेगदे स्हीसी थेनीगदेला दोष उन्सी पिन्गो।
पाप लबासेलमा ह्राङसे ङादा सजाय पिन्बा ह्रङ्नोन लसी थेनीगदेदाएनोन सजाय पिन्गो।
दुखसेलमा ङाइ ल्हानान रेम हुईया लबा मुला,
ओच्छे ङाला सेम ल्हानान कमजोर तबा मुला।”
Source notes (1)
- Footnote ग्यामगदेएनोन सुनसान हिब्रूदेन अर्गु ग्योइला बाइबलरी चा सुर्दासेलमा ग्यामगदेसेएनोन क्राबा क्रिङ्बा लमुला भिसी पाङ्बा मुला।
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.