Eastern Tamang Language Bible
यर्मि 52
यरूशलेम नाश तबा
२ ग्ले २४:१८-२५:७
ग्ले दोबा धुइरी सिदकियाह बोगल गिकसे तिदिङ् तबा मुबा। थेसे च्युक गिक दिङ्धोना यरूशलेमरी शासन लजी। थेला आमा लिब्ना सहरला मुबा। थेला आमाला मिन हमुतल मुबा, हमुतल यर्मियाला झामे मुबा। चु यर्मिया चा अर्गु यर्मिया हिन्ना। सिदकियाह ग्लेसेनोन यहोयाकीमसे ह्रङ्नोन परमप्रभुला ओन्छाङ्री जुन ताम आज्यबा मुबा थेनोन ताम लजी। यरूशलेम ओच्छे यहूदाला म्हिगदेदेन छ्याम ल्हानान बोमो खबासेलमा परमप्रभुसे थेनीगदेदा ह्राङला ङाच्छापट्टिग्याम तेःजी।
सिदकियाह ग्ले बेबिलोनना ग्ले नबूकदनेसरला बिरोधरी रेःजी। थेतबासेलमा सिदकियाह ग्लेसे शासन लबा कू दिङ्री वाङ्बा मुबा, थेनोन दिङ्ला ल च्युइसे च्युइरे तमा बेबिलोनना ग्ले नबूकदनेसर यरूशलेमदेन छ्याम लडाइ लबाला लागिरी ह्राङला सिपाहीगदेदा छ्यामनोन भसी यरूशलेमरी खजी। नबूकदनेसरला सिपाहीगदेसे सहरला मङ्ग्यारपट्टि ह्राङ ह्राङला पाल फ्रेङ्जी। ओच्छे लडाइ लबाला लागिरी यरूशलेम सहरला क्युर्नोन नोबा नोबा ग्ला स्होसी यरूशलेमदा गुङ्री झाङ्जी।1 चुह्रङ् लसी सिदकियाह ग्लेसे शासन लबा च्युक गिक दिङ्री वाङ्मा थेनोन दिङ्ला ल ब्लिसे कू धिन तबा धुइधोना बेबिलोनना सिपाहीगदेसे यरूशलेम सहरदा गुङ्री झाङ्बाला झाङ्बान लजी। थेतबासेलमा सहर नाङ्नोन ल्हानान अनिकाल तजी, जमाहेन्से म्हिगदेला लागिरी चबा स्हे तिगैनोन आतनी। थेनोन धिनकुनु बेबिलोनना सिपाहीगदेसे यरूशलेम सहरला पर्खाल फुप्जी। बेबिलोनी सिपाहीगदे सहरला क्युर्सीन मुबा, तसैनोन यरूशलेमला जम्मान सिपाहीगदे पर्खाल न्हीला गुङ्री मुबा म्रापग्याम वाङ्सी ग्लेला बगैँचाग्याम तसी म्हुनङ्नोन सहरग्याम थोन्सी यर्दन स्योङ्ला चेपट्टि य्हार्जी।2 तर बेबिलोनी सिपाहीगदेसे सिदकियाह ग्लेदा ताप्बान निसी यरीहोला चेरी स्याप्जी। थेला जम्मान सिपाहीगदे थेग्याम फेसी छरपष्ट तजी। ओच्छे थेदा चुङ्जी। जमाहेन्से थेनीगदेसे ग्लेदा हमात य्हुल्साला रिब्लारी बेबिलोनना ग्ले मुबा ग्लारी भजी, ओच्छे बेबिलोनना ग्लेसे थेदा थेरीन सजाय पिन्जी। बेबिलोनना ग्लेसे रिब्लारीन सिदकियाहला झागदेदा थेलान ओन्छाङ्री साइजी, ओच्छे यहूदा य्हुल्साला जम्मान मूल म्हिगदेदाएनोन साइजी। जमाहेन्से थेसे सिदकियाहला मी तेःजी, ओच्छे थेदा काँसला च्याल्दासे खीजी। ओच्छे थेसे थेदा बेबिलोनरी भोर्सी आसिदेधोना झ्याल्खानरी थान्जी।3
परमप्रभुला मन्दिर नाश लबा
२ ग्ले २५:८-१७
बेबिलोनना ग्ले नबूकदनेसरसे शासन लबा च्युक कू दिङ्री वाङ्बा मुबा, थेनोन दिङ्ला ल ङ्हासे च्युइरेकुनु ग्लेदा जोगब लसी थोबा सिपाहीगदेला मूल म्हि नबूजरदान यरूशलेमरी खजी, थेसे बेबिलोनना ग्लेला गे लमुबा। नबूजरदानसे परमप्रभुला मन्दिर, ग्लेखाङ्देन यरूशलेमला जम्मान दिमगदे मेसे ख्राङ्जी। ओच्छे थेसे मूल म्हिगदे चिबा जम्मान दिमगदेएनोन मेसे ख्राङ्जी।4 थेला तहरी मुबा बेबिलोनना सिपाहीगदेसे यरूशलेम सहर क्युर्लान पर्खाल फुप्जी। म्हिगदे न्हङ्री जम्मान भन्दा प्राङ्बोगदेदेन सहररी ख्लासी थान्बा म्हिगदे ओच्छे बेबिलोनना ग्ले मुबा ग्लारी य्हार्सी निबा म्हिगदेदेन बाँकी मुबा जम्मान गे लबारी सेबा म्हिगदेदा नबूजरदानसे चुङ्सी भोर्जी। तर जम्मान भन्दा प्राङ्बो म्हिगदेदा नबूजरदानसे अङ्गुरला खेतीदेन भु व्हारारी गे लबाला लागिरी य्हुल्सारीन ख्लासी थान्जी।
बेबिलोनीगदेसे परमप्रभुला मन्दिररी मुबा काँसला थामगदे, गाडागदेदेन काँसला घ्रेन खार्गन्डा टागलटोगल लसी मुदेबा काँस बेबिलोनरी भोर्जी।5 थेनीगदेसे ताङ्गदे, साबेलगदे नाङ्सलला बर्दन कार्बा सुङ्, का स्वाबा बाटागदे, क्युइला बाटा, खोरेगदेदेन परमप्रभुला मन्दिरला गेरी चलब लबा काँसला जम्मान सामानगदे भोर्जी। नबूजरदानसे नम्बरी म्हारदेन म्हुइसे स्होबा खोरेगदे, पोइमो ताङ्गदे का स्वाबा बाटागदे, ताङ्गदे, नाङ्सल थान्बा स्हेगदे अङ्गुरला निङ्गु फुल्बा खोरेगदे भोर्जी।
सोलोमन ग्लेसे परमप्रभुला मन्दिरला लागिरी स्होबा थे थाम न्ही, काँसला घ्रेन खार्गन्डा गिक, थेला धिपट्टि मुबा च्युक न्ही काँसला घ्लाबगदेदेन गाडागदे मुबा, थे काँसला जम्मान स्हेगदे क्योइसीन क्योइबारी आखम्बाधोनाला मुबा। थे थाम न्हीनोन च्युक भ्रे क्रु नोबा मुबा। थेला गोलाइ च्युक न्ही क्रु मुबा, ओच्छे थेला पाता अङ्गुल ब्लि रूङ्बा मुबा ओच्छे थे थामला तोरहेन्से मारधोनान गाल मुबा। थाम न्हीलान तोरपट्टि काँसला मेट मुबा, थे थाम न्हीलान मेट क्रु ङ्हा, ङ्हा नोबा मुबा। मेट न्हीलान क्युर्नोन काँसला जालीदेन अनारला बुट्टा स्होबा मुबा। थे थाम न्हीलान मेटला जालीथोरी ग्यार्जा गिक अनारगदे स्होबा मुबा। सग्याम च्यामा चा बोगल ब्लिसे च्युक ढु अनारगदे जे म्राङ्मुबा।
चुङ्सी जबरजस्ती लसी यहूदाला म्हिगदेदा बेबिलोनरी भोर्बा
२ ग्ले २५:१८-२१,२७-३०
ग्लेदा जोगब लसी थोबा सिपाहीगदेला मूल म्हि नबूजरदानसे मूल पूजाहारी सरायाहदेन, थेला धिरी चिसी गे लबा पूजाहारी सपन्याह ओच्छे परमेश्वरला मन्दिरला पाले सोमदाएनोन चुङ्सी भोर्जी। थेसे अझै सहररी मुबा सिपाहीगदेदा च्याबा मूल म्हिदेन ग्लेदा सल्लाह पिन्बा म्हि निसदा भोर्जी। थेसे य्हुल्साला म्हिगदेदा सिपाहीरी भर्ना किन्बा मूल म्हिदेन अर्गु बोगल सोम मूल म्हिगदेदाएनोन भोर्जी। ग्लेदा जोगब लसी थोबा सिपाहीगदेला हाकिम नबूजरदानसे थेनीगदे जम्मादान रिब्लारी बेबिलोनना ग्ले मुबा ग्लारी भोर्जी। बेबिलोनना ग्लेसे थेनीगदे जम्मादान थेनोन हमात य्हुल्साला रिब्लारी साइगो भिसी कुल्जी।
चुह्रङ् लसी यहूदाला म्हिगदेदा ह्राङला य्हुल्साग्याम चुङ्सी भोर्जी। नबूकदनेसर ग्लेसे ३,०२३ जना यहूदीगदेदा ह्राङसे शासन लबा निस दिङ्री वाङ्मा चुङ्सी भोर्बा मुबा। थेसे शासन लबा च्युक भ्रे दिङ्री वाङ्मा नबूकदनेसर ग्लेसे ८३२ जना भोर्जी। थेसे शासन लबा बोगल गिकसे सोम दिङ्री वाङ्मा ग्लेदा जोगब लसी थोबा सिपाहीगदेला मूल म्हि नबूजरदानसे ७४५ जना यहूदीगदेदा चुङ्सी भोर्जी। चुह्रङ् लसी चुङ्सी भोर्बा म्हिगदे चा ४,६०० जना मुबा।
यहूदाला ग्ले यहोयाकीनदा चुङ्सी जबरजस्ती लसी भोर्बा बोगल गिकसे च्युक निस दिङ्री वाङ्मा एबील-मरोदक बेबिलोनना ग्ले दोजी। थेसे थेनोन दिङ्ला च्युक न्ही लला बोगल गिकसे ङ्हा धिनकुनु यहूदाला ग्ले यहोयाकीनदा झ्याल्खानग्याम तेःजी।6 एबील-मरोदक ग्लेसे यहूदाला ग्ले यहोयाकीनदेन छ्याम ज्यबा व्यवहार लजी। ओच्छे बेबिलोनरी यहोयाकीन ग्लेदा ह्रङ्नोन लसी चुङ्सी थान्बा अर्गु ग्लेगदेदा भन्दा यहोयाकीनदा एबील-मरोदक ग्लेसे ल्हानान मान लजी। चुह्रङ् लसी यहोयाकीनसे ह्राङदा चुङ्सी थान्बा धुइरी क्वान्बा क्वान स्युजी ओच्छे सोदेधोना ग्लेलान टेबुलरी चिसी चबा थुङ्बा लजी। बेबिलोनना ग्लेसे यहोयाकीन ग्लेदा सोदेधोना सदन भत्ता पिन्जी।
Source notes (6)
- Cross-reference इज २४:२
- Cross-reference इज ३३:२१
- Cross-reference इज १२:१३
- Cross-reference १ ग्ले ९:८
- Cross-reference १ ग्ले ७:१५-४७
- Cross-reference २ ग्ले २५:२७-३०
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.