Eastern Tamang Language Bible
यूह 1
बचन म्हि दोःसी न्हबा
जम्बुलिङ स्होबा भन्दा ङाच्छान बचन मुबा, थे बचन परमेश्वरदेन छ्याम मुबा, ओच्छे बचननोन परमेश्वर मुबा। जम्बुलिङ स्होबा भन्दा ङाच्छाहेन्सेन थे परमेश्वरदेन छ्याम मुबा।
परमेश्वरसे जम्मान स्हे थेनोन बचनग्याम स्होजी। परमेश्वरसे स्होबा स्हेगदे न्हङ्री बचनग्याम आस्होबा स्हे तिगैनोन आरे। बचनसे स्होबा जम्मान स्हेगदेसे थेनोन बचनग्याम जुनी याङ्जी। थेनोन जुनी जम्मान म्हिगदेला य्हाल हिन्ना। थे य्हाल धोपधोपरी य्हाल य्हाल तला, ओच्छे धोपसे थे य्हालदा खाइमै ढाबारी आखम।
परमेश्वरसे म्हि गिक पुइखबा मुबा, थेला मिन यूहन्ना मुबा।1 थे यूहन्नाग्यामसेन जम्मान म्हिगदेसे थे य्हालदा विश्वास लगै भिसी परमेश्वरसे थेदा थे य्हाल्ला बारेरी पाङ्बाला लागिरी पुइखबा मुबा। थे चा थे य्हाल आहिन मुबा। तर थे य्हाल्ला बारेरी म्हिगदेदा घोना लबारी थे खबा मुबा।
जम्मान म्हिगदेदा ज्ञान बुद्धि पिन्बा सत्य य्हाल चा जम्बुलिङरी फेप्खबान मुबा। थे जम्बुलिङरी मुबा, जम्बुलिङ थेग्यामसेन स्होबा हिन्ना। तसैनोन जम्बुलिङला म्हिगदेसे थेदा ङोआसेनी। थे ह्राङलान म्हिगदे मुबा ग्लारी फेप्खजी। तर थेदा ह्राङलान म्हिगदेसे मान आलनी। तर जुन म्हिसे थेदा मान लसी थेथोरी विश्वास लजी, थेनीगदेदा थेसे परमेश्वरला सन्तान दोबा हक पिन्जी। थेनीगदे म्हिला सेमसे म्हन्बा अन्छार खजिबै म्हिला ल्हुइग्याम न्हबा आहिन। थेनीगदे परमेश्वरसे स्होबा परमेश्वरलान कोलागदे हिन्ना।
चुनोन बचन म्हि दोःसी न्हजी, ओच्छे दयामायादेन सत्यसे प्लिङ्सी थे य्हाङला गुङ्री धन्छ्याजी। ङन्से थेला घ्रेन य्हालदेन शक्ति म्राङ्जी, थे य्हालदेन शक्ति परमेश्वरला गिकजेन झाला मुबा।
यूहन्नासे थेला बारेरी चुह्रङ् भिसी घ्रेन काइ तेःसी पाङ्जी, “ङा भन्दा लिच्छा फेप्खबा चा ङा भन्दा घ्रेन म्हि हिन्ना। तिग्दा भिसम थे ङा भन्दा ङाच्छाहेन्सेन मुबा। थे म्हिला बारेरी ङाइ ङाच्छान पाङ्बा मुबा।”
थे दयामायासे प्लिङ्बा मुला। थेतबासेलमा थेग्यामसेन य्हाङसे दयामायाथोरी दयामाया याङ्बा मुला। तिग्दा भिसम परमेश्वरसे य्हाङदा मोशाग्याम ठिम पिन्बा मुबा। तर येशू ख्रीष्टग्याम चा दयामायादेन सत्य ताम पिन्बा मुला। परमेश्वरदा खालैसेन खाइमै म्राङ्बा आरे। तर परमेश्वर आबादेन छ्याम मुबा थेला गिकजेन झासेन य्हाङदा परमेश्वर आबा खाह्रङ्बा मुला भिसी उन्बा मुला।
बप्तिस्मा पिन्बा यूहन्नासे पाङ्बा ताम
मत्ती ३:१-१२; मर्कू १:१-८; लूका ३:१-१८
यरूशलेम सहरग्याम यहूदीगदेसे पूजाहारीगदेदेन लेवीगदेदा यूहन्ना मुबा ग्लारी थे खाला चिम? भिसी ङ्योइबारी पुइमा यूहन्नासे थेनीगदेदा चुह्रङ् भिसी पाङ्बा मुबा। थेसे थेनीगदेदा “ङा थार्बा पिन्बा ख्रीष्ट हिन्नोन आहिन” भिसी सत्य ताम पाङ्जी।
जमाहेन्से थेनीगदेसे यूहन्नादा चुह्रङ् भिसी ङ्योइजी, “थेह्रङ् भिसम ए खाला हिन्ना? तिग ए एलिया हिन्ना।”
तर यूहन्नासे “ङा आहिन” भिसी जोहाब पिन्जी।
दोःसी थेनीगदेसे “तिग ए थेनोन अगमवक्ता हिन्ना?” भिसी ङ्योइमा,
यूहन्नासे “ङा थे अगमवक्ताएनोन आहिन” भिसी जोहाब पिन्जी2।3
जमाहेन्से दोःसीनोन थेनीगदेसे यूहन्नादा चुह्रङ् भिसी ङ्योइजी, “ए खाला हिन्ना? ङन्दा पाङ्गो। ङन्दा चुरी पुइखबा म्हिगदेदा एला बारेरी पाङ्तोःबा मुला। थेतबासेलमा ए खाला हिन्ना? ङन्दा पाङ्गो।”
यूहन्नासे थेनीगदेदा चुह्रङ् भिसी पाङ्जी, “यशैया अगमवक्तासे पाङ्बा ह्रङ्नोन ‘परमप्रभु भ्रबाला लागिरी थेला ग्याम सोझो स्होउ’ भिसी तोङ्तोङ्बा ग्लारी क्रिङ्बा म्हि गिकला काइ ङानोन हिन्ना।”4
थेनीगदे न्हङ्ला कोइ कोइ फरिसीगदेसे थेनीगदेसे यूहन्नादा चुह्रङ् भिसी ङ्योइजी, “ए थार्बा पिन्बा ख्रीष्टएनोन आहिन, एलियाएनोन आहिन, ओच्छे थे अगमवक्ताएनोन आहिन भिसम तिग्दा बप्तिस्मा पिन्बा?”
जमाहेन्से यूहन्नासे थेनीगदेदा चुह्रङ् भिसी पाङ्जी, “ङाइ क्युइसे बप्तिस्मा पिन्बा मुला। तर एनीगदेला गुङ्री खालै गिक मुला, थेदा एनीगदेसे ङोसेबा आरे। ङा भन्दा लिच्छा फेप्खबा चा थेनोन हिन्ना। ङा थेला लखमला तुना ब्लबाधोनालाएनोन आरे।”
चु ताम यर्दन स्योङ्ला क्याम्सङ्पट्टि बेथानिया नाम्सारी तबा मुबा, थेरीन यूहन्नासे म्हिगदेदा बप्तिस्मा पिन्बान मुबा।
परमेश्वरला झा
न्हङ्गरदाङ येशू ह्राङ मुबा ग्लारी फेप्खबान लबा म्राङ्सी यूहन्नासे चुह्रङ् भिसी पाङ्जी, “च्यागो, जम्बुलिङरी मुबा जम्मान म्हिगदेदा पापग्याम फेबा परमेश्वरसे पुइखबा ग्ले!5 थेला बारेरी ङाइ ङाच्छान पाङ्बा मुबा, ‘ङा भन्दा लिच्छा म्हि गिक फेप्खबान मुला, थे ङा भन्दा शक्तिशाली मुला। तिग्दा भिसम थे ङा न्हबा भन्दा ङाच्छाहेन्सेन मुबा।’ थे खाला हिन्ना भिबा ताम ङादा था आरेमुबा। तर इस्राएलीगदेसे थेदा ङोसेगै भिसीन ङाइ क्युइग्याम बप्तिस्मा पिन्बान खबा हिन्ना।”
यूहन्नासे अझ ह्राङसे म्राङ्बा ताम चुह्रङ् भिसी पाङ्जी, “ङाइ पवित्र आत्मा ढुकुर ह्रङ् लसी स्वर्गग्याम फेप्खसी थेथोरी धन्छ्याबा म्राङ्जी। ङाइ अझ थेदा ङोसेबा आरेमुबा, तर क्युइग्याम बप्तिस्मा पिन्गो भिसी ङादा पुइखबासेन चुह्रङ् भिसी सुङ्जी, ‘एसे जुन म्हिथोरी पवित्र आत्मा फेप्खसी धन्छ्याबा म्राङ्ला, थेसेन पवित्र आत्माग्याम बप्तिस्मा पिन्ना।’ थेथोरी पवित्र आत्मा फेप्खबा ङाइ म्राङ्बा मुला। थेतबासेलमा ङाइ पाङ्बा चु ताम सत्य हिन्ना, परमेश्वरला झा चा थेनोन हिन्ना।”
येशूसे ङाच्छा धम्बा चेलागदे
दोःसी न्हङ्गरदाङ यूहन्ना ह्राङला चेलागदे न्हङ्ला न्हीदेन छ्याम राप्सी चिबा मुबा। येशू फेप्बान लबा म्राङ्सी यूहन्नासे “च्यागो, परमेश्वरसे पुइखबा ग्ले!” भिसी पाङ्जी। चु ताम थेःसी यूहन्नाला चेला न्ही येशूला लिच्छा लिच्छा निजी।
येशूसे फ्लिक दोःसी स्हीमा थेनीगदे लिच्छा लिच्छा खबान लबा म्राङ्सी येशूसे थेनीगदेदा “एनीगदेसे तिग म्हाइबा?” भिसी ङ्योइजी। जमाहेन्से थेनीगदेसे येशूदा चुह्रङ् भिसी ङ्योइजी, “गुरु, ह्राङ खानङ् धन्छ्यामुला?”
येशूसे थेनीगदेदा चुह्रङ् भिसी सुङ्जी, “ङादेन छ्याम खउ, एनीगदेसे म्राङ्ला।” जमाहेन्से थेनीगदे येशूदेन छ्याम निजी, ओच्छे येशू धन्छ्याबा ग्ला म्राङ्जी। जमाकुनु ओस्पन ङ्यसेला चार बजब तसी जिन्बासेलमा थेनीगदे येशूदेन छ्यामनोन चिजी।
यूहन्नासे पाङ्बा ताम थेःसी येशूदेन छ्याम निबा थे चेला न्ही न्हङ्ला गिक चा सिमोन पत्रुसला आले अन्द्रियास मुबा। थेसे ङाच्छा ह्राङला ज्योज्यो सिमोनदा स्याप्सी “ङन्से मसीहदा स्याप्जी” भिसी पाङ्जी। हिब्रू ग्योइरी “मसीह” भिबा चा “थार्बा पिन्बा ख्रीष्ट” भिबा हिन्ना। थेसे सिमोनदा येशू मुबा ग्लारी भजी।
येशूसे सिमोनदा स्हीसी चुह्रङ् भिसी सुङ्जी, “ए योनाला झा सिमोन हिन्ना, एला मिन केफास हिन्ना।” केफास भिबा चा ग्रीक ग्योइरी पत्रुस भिबा हिन्ना।6
फिलिपदेन नथानेल
न्हङ्गरदाङ येशू गालील अञ्चलरी नितोःजी भिसी फेप्मा फिलिपदा स्याप्जी। ओच्छे येशूसे थेदा “ङादेन छ्याम भ्रउ” भिसी सुङ्जी। फिलिपएनोन पत्रुसदेन अन्द्रियासलान सहर बेथसेदाला मुबा। जमाहेन्से फिलिप नथानेलदा ह्रुप तबारी निजी। ओच्छे नथानेलदा चुह्रङ् भिसी पाङ्जी, “मोशासे भ्रिबा ठिमदेन अगमवक्तागदेसे जुन म्हिला बारेरी पाङ्बा मुबा, ङन्से थे म्हिदा स्याप्बा मुला। थे योसेफला झा नासरतला येशू हिन्ना।”
नथानेलसे थेदा चुह्रङ् भिसी ङ्योइजी, “तिग नासरतग्यामसेनोन तिगै ज्यबा स्हे खला?” फिलिपसे थेदा “खसी च्यागो” भिसी जोहाब पिन्जी।
नथानेल ह्राङ मुबा ग्लारी खबान लबा म्राङ्सी येशूसे थेला बारेरी चुह्रङ् भिसी सुङ्जी, “तिगै लुसीला ताम आलबा पक्का इस्राएलीदा च्यागो।”
नथानेलसे येशूदा “ह्राङसे ङाला बारेरी खाह्रङ् लसी था याङ्जी?” भिसी ङ्योइमा, येशूसे थेदा चुह्रङ् भिसी जोहाब पिन्जी, “फिलिपसे एदा ङ्योइबारी निबा भन्दा ङाच्छान ङाइ एदा अञ्जीरला दोङ टारी म्राङ्मुबा।”
जमाहेन्से नथानेलसे येशूदा चुह्रङ् भिसी पाङ्जी, “रब्बी, ह्राङनोन परमेश्वरला झा इस्राएलला ग्ले हिन्ना।”
येशूसे थेदा चुह्रङ् भिसी सुङ्जी, “ङाइ एदा अञ्जीरला दोङ टारी म्राङ्जी भिबासेलमा एसे विश्वास लबा आहिन? एसे अझ चु भन्दान घ्रेन घ्रेन तामगदे म्राङ्ला।” दोःसी येशूसे थेनीगदेदा चुह्रङ् भिसी सुङ्जी, “च्यागो, एनीगदेसे ङाला ताम ङ्यन्गो, एनीगदेसे स्वर्ग ठोङ्बादेन परमेश्वरला दूतगदे परमेश्वरसे पुइखबा म्हिथोरी फाप्खबान लबा, तोर निबान लबा म्राङ्ला।”7
Source notes (7)
- Cross-reference मत्ती ३:१; मर्कू १:४; लूका ३:१-२
- Cross-reference ठिम १८:१५,१८; मला ४:५
- Footnote चु पदरी “थे अगमवक्ता” भिबा चा ठिमला किताबरी यहूदीगदेदा पुइखला भिसी पाङ्बा अगमवक्ताला बारेरी हिन्ना।
- Cross-reference यशै ४०:३
- Footnote “परमेश्वरसे पुइखबा ग्ले” भिसी भ्रिबा तामदा ग्रीक बाइबलरी परमेश्वरसे पुइखबा ग्यु बोको भिसी भ्रिबा मुला। चु ताम १:३६ पदरीनोन मुला।
- Footnote “पत्रुस” ला अर्थ चा युङ्बाला पहरा हिन्ना।
- Cross-reference ठुङ् २८:१२
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.