Eastern Tamang Language Bible
अय्यू 3
अय्यूबसे परमेश्वरदा दुखला ताम पाङ्बा
जमाहेन्से अय्यूबसे ह्राङ न्हबा धिनदा केःबारी छ्याइजी।1 ओच्छे अय्यूबसे चुह्रङ् भिसी पाङ्जी,
“परमेश्वर, ङा न्हबा धिन चा सराप याङ्बा धिन तगै,
ङा आमाला फोरी खबा म्हुनएनोन सराप याङ्बा म्हुन तगै।
परमेश्वर, थे धिन चा धोपधोप्बा धिन तगै।
थे धिनदा दोःसी खालैसेन आढन्गै,
थे धिनकुनु दोःसी खाइमै य्हाल आतगै।
थे धिनदा ल्हानान धोपधोपसे घप्गै।
खसुसे थे धिनदा घप्गै,
थे धिनकुनु धिनीएनोन आफेगै।
थे धिनदा धोपधोपसे ग्लोङ्गै,
धिनगदे झ्यामा खजिबै दिङ्री थे धिन आझ्यागै।
ओच्छे थे धिन खजिबै लरी आझ्यागै
थे धिनकुनु खाइमै खालैनोन आन्हगै,
थे धिनकुनु ताङ्सी खालै आक्रिङ्गै।
क्युइ न्हङ्ला लिव्यातन भिबा लोङ्बा खबा जन्तुदा तहरी थान्बारी खम्बा म्हिसे केःबा धुइरी थे धिनदा केःगै।
स्य्होला खजिबै सारसे थे धिनदा य्हाल आपिन्गै।
थेसे स्य्होला य्हाल भ्रान्सी चिबा जे तगै।
थेसे शुरूरी थोन्बा स्य्होला य्हालएनोन म्राङ्आम्याङ्गै।
थे धिन चा सराप याङ्बा धिन तगै,
तिग्दा भिसम थेसे ङाला आमाला कोख बन्दा आलनी,
ओच्छे थेसे ङाला लागिरी दुखदेन आपत विपतला ग्याम ठोङ्सी पिन्जी।
आमाला कोखरीन ङा तिग्दा आसिनी?
ङा तिग्दा न्हमैछ्याम आसिनी?
आमासे तिग्दा ङादा कुरी किन्सी सयार लजी?
ओच्छे आमासे ङादा तिग्दा ङ्हे ख्वाजी?
थेह्रङ् आलबा हिन्सम ङा ज्यना लसी धुर्सारी चिसेला मुबा,
ङा सिबागदे चिबा ग्लारी म्हेर्सी ब्लप्बा न्हसी चिम्याङ्सेला मुबा,
ग्लेगदे ओच्छे सल्लाह पिन्बा म्हिगदेदेन छ्यामनोन ङाएनोन म्हेर्सी चिबा तसेला मुबा।
जम्बुलिङरी मुबा धुइरी थेनीगदेसे ह्राङ ह्राङला लागिरी दिमगदे स्होबा मुबा,
दन्दे थे दिमगदे फुप्सी नाश तसी जिन्बा मुला,
ह्राङला दिम म्हारदेन म्हुइसे प्लिङ्ना लबा ग्लेगदे ह्रङ्नोन लसी ङाएनोन दन्दे म्हेर्सी चिबा तसेला मुबा।
धुइ आछ्योना खेरो निबा कोला ह्रङ्नोन ङा स न्हङ्री म्हेर्सी चिबा तसेला मुबा।
नाइबा गे लबा म्हिगदेएनोन धुर्सारी नाइबा गे आलना चिमुला,
ओच्छे थेरी ब्लप्बा म्हिगदेला ब्लप्बा साल्मुला।
झ्यालखानरी परब तबा म्हिगदेएनोन थेरी ताङ्सी चिमुला,
थेरी थेनीगदेसे घ्रेन काइ लसी कुल्बा म्हिला काइ ङ्यन्आतोः।
थेरी जजा घ्रेन जम्मान म्हिगदे मुला,
थेरी घ्याबादेन घ्याबास्यागदेएनोन मालिकला तहरी चिआतोः।
म्हिगदेदा दुख न्हङ्री तिग्दा सोसी चिपुङ्बा?
सेम सिबा म्हिगदेदा तिग्दा जोगब लसी थान्बा?
थेनीगदेसे काल भ्रान्सी चिमुला,
तर थेनीगदेला लागिरी काल आखमुला।
स न्हङ्री ल्हुसी थान्बा सम्पत्तिदा भन्दैनोन थेनीगदेसे कालदा चा सेम लसी म्हाइमुला।
थेनीगदे सिसी धुर्सारी आदोदेधोना आताङ्मुला।
परमेश्वरसे थेनीगदेदा क्युर्सीनग्याम जोगब लसी थान्बा मुला,
ओच्छे थेनीगदे थोरी लिच्छा तसेला ताम खालैदा था आपिन्ना थान्बा मुला।
ब्लप्सी खबा हुईया चा सदन ङाला चबा स्हे ह्रङ्बान दोबा मुला,
ओच्छे दुखसेलमा क्राबा क्रिङ्बा लबा चा ङाला लागिरी क्युइ ह्रङ् लसीन भ्योङ्बाला भ्योङ्बान मुला।
जुन ताम म्राङ्सी ङा लोङ्मुला
थेनोन ताम ङाथोरी खबा मुला।
जुन जुन तामदेन छ्याम ङा लोङ्मुला,
थे थेनोन ताम ङादा तबा मुला।
ङाला सेमरी शान्ति आरे,
ङाला लागिरी ब्लप्बा न्हबा ग्ला आरे,
ङाला लागिरी मि दुख जे मुला।”
Source notes (1)
- Cross-reference यर्मि २०:१४-१८
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.